Salmos

95 Lapayki shapäkamuy TAYTA DIOSTA kushishqa alabanantsipaq.

Tsapämaqnintsita y salvamaqnintsita adorashun.

 2 Tayta Diospa nawpanman aywaykur* agradëcikushun.

Alabanzakunata cantashpantsi alabashun.

 3 TAYTA DIOSQA lapanpaq munayniyuq reymi kaykan.

Paymi lapan dioskunapita mas munayniyuq rey kaykan.

 4 Paypa makinchömi patsa rurinpis kaykan.

Paypami jatun puntakunapis kaykan.

 5 Pay kamashqa kaptinmi lamarpis paypa kaykan.

Kikinmi makinwan kay patsatapis kamashqa.*

 6 Lapayki shapäkamuy qonqurpaykur TAYTA DIOSTA adoranantsipaq.

Paypa nawpanman qonqurpakushun.

Paymi kamamaqnintsi.

 7 Paymi noqantsipa Diosnintsi.

Noqantsimi akrashqan runakuna kaykantsi.

Majädancho kaykaq uyshanmi kaykantsi.

Tayta Dios nishqanta kanan junaq mayaykarqa

 8 Meriba particho unay ayluykikuna chukru shonqu kashqanno ama kapäkuytsu.

Masah chunyaq jirkacho 9 yanapashqäta rikaykarpis paykunaqa munashqantami ruratsimayta munarqan.*

10 Tsaymi paykunapita chusku chunka (40) wata rabyashqa kar kayno nirqä:

“Kay runakunaqa oqrakashqanömi karkaykan.

Yätsishqätapis manami cäsukärintsu”.

11 Tsaymi pasaypa rabyar kayno nir jurarqä:

“Paykunaqa promitishqä jamayman manami yaykupäkunqatsu”.*