Ezequiel
Tiro markapaq lakikushqan
27 TAYTA DIOS kaynömi nimarqan: 2 “Runapa tsurin, Tiro markapaq wanupakuy cantata cantay. 3 Tiro markamanmi *büquikuna lamarpa maytsaypitapis aywapäkun. Tsay markamanmi rantipakuq chayapäkun lamar kuchun karu markakunapita. Tiro marka ushakänanpaq kashqanta wilakur kayno ninki:
“ ‘TAYTA DIOSMI kayno nin:
Tiro marka, qamqa yarpaykanki lapanpitapis mas kuyaylapaq kashqaykitami.
4 Munashqaykipami lamar jananpa aywanki.*
Carpintërukunami mas kuyaylapaqta rurashushqanki.
5 Senir jirkapita apamushqan pïnu yörapitami rurashushqanki.
Líbanupita apamushqan cedru yörapitami mastilnikita* rurapäshushqanki.
6 Basánpita apamushqan encina yörapitami rëmuykikunatapis* rurapäshushqanki.
Lamarcho kaykaq Quitim islapita* apamushqan pïnu tablawanmi entablashushqanki.
Nirkur *marfilwanmi adornashushqanki.
7 “ ‘Wayra apashunaykipaq kaq jatun rakta tëlaykikunami Egiptucho bordashqan lïnupita kashqa.
Bandëraykikunapis tsay tëlapitami kashqa.
Azul tëlakunapita y granäti tëlakunapita rurashqami tolduykikunapis kashqa.
Tsay tëlata lamar kuchuncho kaykaq Elisa markapitami apamushqa.
8 “ ‘Sidón runakuna y Arvad runakunami rëmaqkunapis kashqa.
Buqui manijaqkunapis yachaq Tiro runakunami kashqa.
9 Yachaq Gebal carpintërukunapis qamwanmi maypapis aywaq.
Tsay carpintërukunami malograkaptikipis altsarishushqanki.
Negociantikunapis maytsaypitami büquikunawan negociunkunata qam kaqman apapäkamuq.
10 Soldäduykikunapis Persiapita, Ludpita y Futpitami kashqa.
Adornashushpaykimi tsapakunan escüdunkunata y cascunkunatapis qam kaqcho shawarkäriq.
11 “ ‘Arvadeo runakunawan soldäduykikunami marka murällayki janancho tsapäshunaykipaq jiruruypa kaykashqa. Rikachakuna törrikikunachönami Gamad runakuna kaykashqa. Escüdunkunapis perqaykicho jiruruypa warkaraptinmi kuyaylapaq kashqanki.
12 “ ‘Imaykayuqpis kaptikimi Tarsispita shapäkamuq negociuta rantikunanpaq. Qellayta, fiërruta, estäñuta y plömuta apakurkurmi qamkunawan trukapakunanpaq shapäkamuq.
13 “ ‘Tsaynölami Javán, Tubal y Mesec runakunapis ashmay runakunata y broncipita rurashqa manëjukunata rantikushuq kanki.
14 “ ‘Bet-togarma runakunapis carga cawallukunawan, guërra cawallukunawan y mulakunawanmi jaqaykikunata pägashuq kanki.
15 “ ‘Rodaspita shamuq runakunapis y lamar kuchun nacionkunacho taq runakunapis negociuykikunawan trukananpaqmi marfilta y ébano yörakunata apapäkamuq.
16 “ ‘Imaykayuqpis kaptikimi rantikushunaykipaq edomita runakunapis apamuq kuyaylapaq coloryuq rumikunata, granätiman tinishqa tëlakunata, bordashqa röpakunata, lïnupita awashqa fïnu tëlakunata, coral nishqan adornukunata y rubí rumikunatapis.
17 “ ‘Minit partipitami Judá runakuna y Israel runakunapis trïguta, biscöchuta, abëjapa mishkinta, aceitita y balsamu nishqan jampikunata trukapäkunaykipaqmi apapäkamuq.
18 “ ‘Imaykayuqpis kaptikimi Damasco runakunapis Helbónpita apamushqan vïnuta y Saharpita apamushqan milwata rantikushuq kanki. 19 Tsaynölami Uzalpita patsa apamushqan vïnuta, fiërruta, canëlata y ali asyaq* cäñakunata rantikushuq kanki.
20 “ ‘Dedánpita shamuqkunanami silla jananman churananpaq kuyaylapaq chalpakunata rantikushuq kanki.
21 “ ‘Arabia runakuna y Cedarcho taq mandaqkunapis uyshakunata, carnikunata y chïvukunatami rantikushuq kanki.
22 “ ‘Sabácho y Raamacho taq negociantikunapis qampitami rantipäkuq. Paykunami mas alinnin kaq perfümikunata, chanin cuestaq kuyaylapaq rumikunata y qorita rantikushuq kanki.
23 “ ‘Tsaynölami Harán, Cane y Edén markakunapita y Sabá, Asiria y Media nacionkunapita negociunkunata apamur rantikushuq kanki. 24 Paykunami rantikushuq kanki fïnu tëlakunata, bordashqa azul jakukunata, tukuy color alfombrakunata y kuyaylapaq color hïlukunawan piltashqa watukunata.
25 “ ‘Tsaynölami negociuykikunata Tarsis runakuna büquinkunawan maytsaypapis rantikunanpaq apapäkuq.
“ ‘Tiro marka, maytsaymanpis riquëzata apaq büquinömi kashqanki.
26 Juk kutimi büqui manijaqkuna lamar chawpinpa rëmunkunawan apashushqanki.
Tsaychömi elaqpita inti jeqamunan kaq lädupita shamuq wayra laktikätsishushqanki.*
27 Tsawraqa riquëzaykikunapis y rantikunaykipaq kaq negociuykikunapis lapanmi ushakashqa.
Tsaynöpis ushakashqa büqui rëmaq runakuna, büqui manijaqkuna, büqui uchkukaptin tsapaqkuna, rantikuqnikikuna, soldäduykikuna y büquicho aywaq wakin runakuna.
28 “ ‘Büqui manijaqkuna qaparaptin lamar kuchunkuna siksikyashqami.
29 Rëmu amiqkunapis büqui manijaqkunapis büquita kachariykurmi lamar kuchunman aywakärishqa.
30 Pasaypa lakikur qaparayparaq qampaq waqashqanmi maytsaymanpis mayakashqa.
Umankunaman alpata winakushpanmi uchpa janancho qochpapäkushqa.
31 Qampaq lakikushpanmi qara putuypa rutukärishqa.
Qachqa röpata jatikurkurmi lakikur waqapäkushqa.
32 “ ‘Wanushkunapaq cantashqan cantata cantapäshushpaykimi kayno nipäkun:
“Lamarcho kaykaq Tiro marka, ¿mayqan markalaraq qamman tinkunman karqan?
33 Büquikikunawanmi maytsay nacionkuna nistashqanta chayatsipaq kanki.
Tsaytsika riquëzaykikunata apaparmi reykunatapis rïcuyätsiq kanki.
34 Lamar chawpincho ushakashqana kaptikimi lapan negociuykipis ushakashqa.
Qamwan kaykaq runakunapis chipyaqmi ushakashqa.
35 “ ‘ “Tsayno ushakashqaykita rikarmi lamar kuchunkunacho taqkuna mantsakashqa rikakushqa.
Reykunapis mantsakuypita siksikyashpanmi pasaypa almatakashqa.
36 Juk lädu nación negociantikunapis mantsakashqami wichyakärishqa.
Mantsakaypaq ushakashpayki manami imaypis kankipaqnatsu” ’ ”.*