Ezequiel
Cürakunapa cuartunkuna
42 Tsaypitanami tsay runa norti kaq läducho kaykaq jatun patiuman pushamar chayatsimarqan cürakunapaq cuartukuna kashqanman. Tsay cuartukunaqa templupa qepancho kaykaq patiu lädupa y tsaycho jatun wayi lädupami rikararqan. 2 Cuartukunapa largunta tupuptinmi karqan pitsqa chunka (50) metru. Anchunnami karqan ishkay chunka pitsqa (25) metru.
3 Tsay cuartukunapa waqtanchömi templu qepancho kaykaq chunka metru anchu patiu karqan. Frentinchönami karqan rumiwan läjashqa jatun patiu.
Tsay cuartukunaqa kimsa grädaman qatashqami karqan. 4 Punkunkunaqa norti kaq lädupami rikararqan. Tsay lädupami juk pasadïsu karqan pitsqa metru anchu y pitsqa chunka (50) metru largu.
5 Ultimu grädacho kaykaq cuartukunaqa karqan mas takshami. Chawpi kaq grädacho kaykaq cuartukunami itsanqa mas jatulan karqan. Pampacho kaykaq cuartukunami karqan mas jatun. 6 Cuartukuna kimsa pïsu kaykarpis manami patiucho kaq cuartukunanötsu columnayuq karqan. Tsaymi cada pïsucho cuartukuna urapita janayaq mas taksha karqan.
7 Tsay cuartukunapa largunmi karqan ishkay chunka pitsqa (25) metru. Punku nawpancho perqanami karqan ishkay chunka pitsqa (25) metru. Frenticho kaykaq pasadïsunami karqan pitsqa chunka (50) metru. 8 - 9 Jatun patiupita cuartukunaman yaykunanpaqmi punku karqan inti jeqamunan läducho.
10 Tsaynölami sur kaq lädupapis cuartukuna karqan. Tsay cuartukunaqa karqan templu qepancho kaykaq wayi frentincho y templu qepancho kaykaq patiu frentinchömi. Tsay wayipa y patiupa waqtanchömi tsay cuartukuna karqan.
11 Norti läducho kaykaq cuartukunapa frentincho pasadïsu kashqannölami sur kaq lädu cuartukunapa frentinchöpis pasadïsu karqan. Tsaynölami sur kaq lädu cuartukunapa largunpis, anchunpis, yarqunanpis y punkunkunapis norti kaq lädu cuartukunapanöla karqan.
12 Sur kaq lädu cuartukunaman yaykunanpaqmi pasadïsu qalaykunancho punku karqan. Tsay punkuqa inti jeqamunan kaq lädupami rikararqan.
13 Pushamaq runami kayno nimarqan: “Norti läducho y sur läducho kaykaq cuartukuna *sagrädumi kaykan. Tsay cuartukunachömi TAYTA DIOSPA nawpancho sirviq cürakuna* mas sagrädu kaq ofrendakunata mikupäkunqa. Tsay cuartukuna sagrädu kaptinmi tsayman churapäkunqa tsaki mikuy ofrendakunata, purificatsina sacrificiukunata y consagratsina sacrificiukunata.
14 “Templucho kaykashqanpita jatun patiuman manaraq yarqurmi röpanta cürakuna trukakunqa. Tsayno rurapäkunqa templucho jatikushqan röpa sagrädu kaptinmi. Juk röpata jatikurkurraqmi runakunawan tinkunanpaq yarqapäkamunqa”.
15 Templuta y tsaycho kaykaq patiukunata tupuyta usharkurnami tsay runa inti jeqamunan kaq lädu punkupa yarqatsimarqan. Nirkurmi perqatana tumariq tupurqan. 16 Aptaraykashqan varïllawan inti jeqamunan kaq lädupa tupuptinmi karqan ishkay pachak pitsqa chunka (250) metru. 17 Norti kaqpa tupuptinmi karqan ishkay pachak pitsqa chunka (250) metru. 18 Sur kaq lädupapis tupuptinmi karqan ishkay pachak pitsqa chunka (250) metru. 19 Tsaypita inti jeqanan kaq lädupana tupuptinmi karqan ishkay pachak pitsqa chunka (250) metru. 20 Tsaymi tsay perqapa largun y anchunpis karqan ishkay pachak pitsqa chunka (250) metru. Tsay perqami rakirqan sagrädu kaqpita mana sagrädu kaqta.