Ezequiel
Gogta vincinanpaq nishqan
39 “Runapa tsurin, jutïcho mandaq Gogpa contran wilakur kayno ninki: ‘TAYTA DIOSMI kayno nin: Mesec y Tubal nacionkunapa mandaqnin Gog, qampa contraykimi kaykä. 2 Norti kaq lädu karupita qarachashqa apamushpämi Israel jirkakunaman chayatsishayki. 3 Tsaychömi itsuq kaq makikicho aptaraykashqayki flëcha jitakunaykita pakirishaq. Alawqa kaq makikicho aptaraykashqayki flëchaykikunatapis jitarishaqmi. 4 Soldäduykikunawan y juk nacionkunapita shamuq soldädukunawanmi Israel jirkakunacho lapayki wanupäkunkipaq. Tsaychömi wiskulkuna y jirka uywakuna mikupäkushunaykipaq kamakätsishaq. 5 Jäkuq pampakunachömi wanushqa jitarpankipaq. Noqa TAYTA DIOSMI tsayno nï.
6 “ ‘Tsaynöpis Magog runakuna tarkaykashqan markakunata ninawanmi rupatsishaq. Costacho ali sigurashqa markakunatapis tsaynölami rurashaq. Tsayraqmi TAYTA DIOS kashqäta musyapäkunqa. 7 Kuyashqä Israel runakunata salvaptïmi *santu kashqäta pïmaypis tantiyapäkunqa. Mananami imaypis santu jutïta manakaqman churanqanatsu. Tsaynöpami maytsay nacioncho Israel runakunapa santu TAYTA DIOSNIN kashqäta musyapäkunqa. 8 Nishqäno kananpaq kaq junaq chayamuptinmi lapan nishqäkuna cumplikanqa’. TAYTA DIOSMI tsayno nin.
9 “ ‘Tsaymi Israel runakuna markankunapita aywakur contrankunapa escüdunkunata, flëchankunata, taksha lanzankunata y jatun lanzankunata rupatsinanpaq shuntapäkunqa. Tsay shuntashqanmi qanchis wata yanukärinanpaq yanta kanqapaq. 10 Tsaymi jirkakunapita yantata mana apamunqanatsu ni muntiman qeru mutuqpis aywanqanatsu. Tsaypa trukanqa shuntashqan armakunami yantan kanqa. Imaykanta qechunanpaq yaykuptinpis kikinkunatami qechupäkunqa. Suwapayta munaptinpis kikinkunatami suwapanqa’. TAYTA DIOSMI tsayno nin.
11 “ ‘Tsay witsanmi Gog y soldädunkunata pampapäkunanpaq Israelcho juk partita rakishaq. Tsay kanqa *Kachi Lamar tsimpan Viajëru jutiyuq pampachömi. Tsaycho mandaq Gog lapan soldädunkunawan pamparaptinmi runakuna tsaypa mana purinqanatsu. Tsaymi tsay partipa jutinta churapanqa Hamón-gog Pampa* jutin kananpaq. 12 Israel runakuna qanchis killataraqmi tsay ayakunata pampayta ushanqa. Tsayraqmi Israel nación pitsashqa quëdanqapaq. 13 Israel runakunaqa lapanmi aya pampayman churakashqa kanqa. Munayniyuq kar contrankunata ushakätsishqätami imaypis yarparanqa’. TAYTA DIOSMI tsayno nin.
14 “ ‘Ayakunata pampayta qalaykushqanpita qanchis killa pasarkuptinmi runakunata kachanqa intëru nacionpa aywar tulukunata ashi ashiykur pampananpaq. 15 Rikapakuq aywaqkuna runapa tulunta tarirqa juk señalta churapäkunqa pampaqkuna shuntananpaq. Hamón-gog Pampa nishqanmanmi tsay tulukunatapis pampapäkunqa. 16 Tsaynöpami Israel nación pitsashqa quëdanqa.
“ ‘Tsaynöpis tsay pamparashqan pampachömi juk marka kanqa. Tsay markapa jutintami Hamona* jutin kananpaq churapanqa’ ”.
17 TAYTA DIOS kaynömi nimarqan: “Runapa tsurin, wiskulkunata, condorkunata y lapan chucaru jirka uywakunata juntakänanpaq ninki. Maytsaypitapis juntakämutsun kamarishqä mikuyta mikupäkunanpaq.* Israel jirkakunachömi paykunapaq mikuyta kamarishaq. Tsaychömi aytsata mikupäkunqa y yawarta upupäkunqa. 18 Basáncho kaykaq wera carnipa, wera uyshapa, wera chïvupa y wera törukunapa aytsanta mikuqno y yawarninta upuqnömi soldädukunapa aytsanta mikupäkunqa y kay patsacho mandaqkunapa yawarninta upupäkunqa. 19 Wanutsishqa runakunapa wiranta ajayashqanyaqmi mikupäkunqa. Shinkashqanyaqmi yawarnintapis upupäkunqa. 20 Tsaychömi saksashqanyaq mikupäkunqa cawallu aytsakunata, muntädu aywaq runakunapa aytsankunata y lapan soldädukunapa aytsankunata”.* TAYTA DIOSMI tsayno nin.
21 “ ‘Tsaynöpami maytsay nación runakuna munayniyuq kashqäta musyapäkunqa. Paykunami rikanqa lutanta rurashqankunapita juzgar castigashqäta. 22 Israel runakunapis tsay junaqpita patsami musyapäkunqa paykunapa TAYTA DIOSNIN kashqäta.
23 “ ‘Israel runakunata tsayno salvaptïmi maytsay nación runakunapis musyapäkunqa munayniyuq kashqäta. Manami munayniynaq kaptïtsu Israel runakuna juk lädu nacionkunacho nakarkaykan, sinöqa jutsata rurashqanpita y nishqäta mana cumplishqanpitami. Tsaymi paykunata yanapanäpa trukan contrankunata yanapashqä guërracho wanutsinanpaq. 24 Mana cäsukamaypa jutsata rurashqanman tupumi Israel runakunata castigashqä’.
25 “Tsaymi TAYTA DIOS kayno nin: ‘Jacobpita miraq Israel runakunata kuyaparmi juk lädu nacionkunacho taykaqta Israel nacionman kutitsimushaq. Tsayno kutitsimuptïmi pïmaypis santu jutïta respitapäkunqa. 26 Nacionnincho pipis achäquita mana ashipaptinmi jawkana kawapäkunqa. Tsaymi nawpata conträ sharkur lutanta rurashqanpita pasaypa penqakärinqa.
27 “ ‘Juk lädu nacionkunacho y chikiqninkunapa markankunacho tashqanpitami paykunata shuntamushaq. Tsayno rurashqäta maytsay nacionkunacho taq runakunami rikapäkunqa. Tsaynöpami santu Dios kashqäta musyapäkunqa. 28 Jäpa nacionkunaman prësu aywapäkunanpaq noqami kamakätsirqä. Maytsaymanpis qarqushqänölami ni juktapis mana kachaypa markankunaman shuntamushaq. Tsayraqmi TAYTA DIOSNIN kashqäta musyapäkunqa. 29 Israel runakunamanmi Espïritüta kachamushaq. Yapayqa manami paykunata kacharishaqnatsu’. TAYTA DIOSMI tsayno nin”.