Salmos

90 (1b) Tayta Dios, qammi imayyaqpis noqakunapa pakakunä kaykanki.

 2 Jirkakuna manaraq kaptinpis y kay patsa manaraq kaptinpis unaypita patsa imayyaqpis qamlami Dios kaykanki.

 3 Qam munaptikimi runakuna wanun.

Qam niptikimi wanur alpaman tikran.

 4 Qampaqqa waranqa (1,000) watapis juk junaqnölami kaykan.

Paqaspa juk ishkay höra pasaqnölami kaykan.*

 5 Elaqpitami runakunata yaku apaqno apakunki.

Runakunaqa juk qepishtaynölami karkaykan.

Lulu qewanölami karkaykan.*

 6 Tukturaykar warämuq waytano kaykarpis tardipaqa äjusyashqanömi karkaykan.

 7 Rabyashpaykiqa juklami noqakunata ushakätsimanki.

Rabyakuptikiqa pasaypami mantsakärï.

 8 Lapan jutsata rurashqäkunata musyaykankimi.

Pakaylapa mana alita rurashqäkunatapis rikaykankimi.

 9 Pasaypa rabyakuptikiqa chipyaqmi ushakäshaq.

Noqakunaqa jämaynölami karkaykä.

10 Wakinnïqa qanchis chunka (70) watayaqnami kawapäkü.

Mas fuerti kaqkunalami pusaq chunka (80) watayaq kawapäkun.

Tsayno atska wata kawarpis aruywan nitipakashqalami kawapäkü.

Watakuna pasashqannömi noqakunapis manaraqpis aykäta ushakäshaq.*

11 Imajinanpa rabyashqaykita manami pipis musyantsu.

Tsayjinanpa ajanashqaykita manami pipis tantiyantsu.

12 Yupashqa watala kawapäkunäpaq kashqanta tantiyaykatsilämay.

Tsaynöpami tantiyakärishaq munashqaykino kawapäkunäpaq.

13 Tayta Dios, noqakunata yapay yanapaykalämay.

¡Imayyaqraq qonqaykamanki!

Sirvishuqniki karkaykaptïqa kuyapaykalämay.

14 Kuyamashqaykita cada tuta tantiyaykatsilämay.

Tsaynöpami wanunäyaq imaypis kushishqa alabapäkushayki.

15 Atska wata lakikur kawapäkunäpaqmi nakayman churamashqanki.

Tsayman tupu atska wata kushishqa kawapäkunäpaq yanapaykalämay.

16 Sirvishuqniki karkaykaptïqa noqakunatapis y tsurïkunatapis yanapamar kushikuypaq kaqkunata ruraykulay.

17 TAYTA DIOSNILÄ, kuyakuq kashqaykita tantiyaykatsilämay.

Lapan aruynïkunamanpis bendicionnikita churaykalämuy.