Mateo
Herodes Bautizaq Juanta wanutsishqan
14 Tsay witsanmi Galileapa mandaqnin Herodes mayarqan Jesúspaq pïmaypis parlapäkushqanta. 2 Tsaymi yanapaqninkunata Herodes kayno nirqan: “Tsay runaqa Bautizaq Juanmi kawarimushqa kanqa. Tsaymi munayniyuq kaykan milagrukunata rurananpaq”.
3 Nawpatami Juanta Herodes prësu tsaritsir cadinawan watarkur carcilman wichqatsishqa karqan. Tsayno rurarqan Herodías jutiyuq warmi manakuptinmi. Herodías karqan Herodespa wawqin Felipipa warminmi. 4 Herodíasta Herodes warminpaq apashqa kaptinmi Juan kayno nirqan: “Wawqikipa warminta tsararashpayki jutsatami ruraykanki”.*
5 Tsayno niptinmi Herodesqa Juanta wanutsiyta munarqan. Wanutsiyta munarpis profëta kashqanta lapan runakuna niptinmi mantsakurqan.
6 Tsaypita Herodespa diyancho fiestata ruraptinmi Herodíaspa jipash wawan lapan qayatsishqankunapa nawpancho shumaq qatswarqan. Tsayta rikarmi Herodes pasaypa kushikushpan 7 Tayta Diospa jutincho jurar tsay jipashta promitirqan kayno nir: “Imatapis manakamashqaykitami qoykushayki”.
8 Tsayno niptinmi jipashqa maman yachatsishqannöla Herodesta kayno nirqan: “Bautizaq Juanpa umanta juk plätucho qoykamay”.
9 Tsayta manakuptinmi rey Herodes fiyupa lakikurqan. Tsayno kaptinpis qayatsishqankunapa nawpancho jurashqa karmi manakushqanta qoykunanpaq wardiakunata nirqan. 10 Tsaymi wardiakunaqa Juanpa umanta carcilcho roqurir 11 juk plätucho apamur jipashta ayaparkurqan. Jipashnami mamanta ayaparqan.
12 Tsayno rurashqanta mayaykurmi Juanpa discïpulunkuna ayanta shuntarkur pampapäkurqan. Tsaypitanami Jesúsman aywaykur Juanta wanutsishqanta wilapäkurqan.
Pitsqa waranqa runakuna mikunanpaq milagruta Jesús rurashqan
Marcos 6.30-44; Lucas 9.10-17; Juan 6.1-14
13 Tsayta musyaykurmi *büquiman witsarkur chunyaqninman Jesús japalan aywakurqan. Aywakushqanta musyaykurnami runakuna markakunapita chakilapa aywapäkurqan Jesústa tarishqanyaq. 14 Büquipita urarpurnami Jesús tarirqan atska runakuna shuyarpaykaqta. Tsaymi kuyapashpan qeshyaykaqkunata aliyätsirqan.
15 Tardiyaptinnami discïpulunkuna Jesús kaqman aywaykur kayno nipäkurqan: “Chunyaqchömi kaykantsi. Patsapis tardiyaykannami. Runakunata niykuy markakunapa aywar mikuyninkuna rantipäkamunanpaq”.
16 Tsayno niptinmi Jesús kayno nirqan: “Manami mikuy ashiq aywapäkunmantsu. Qamkuna mikuyta qarapäkuy”.
17 Tsayno niptinmi discïpulunkuna kayno nipäkurqan: “Pitsqa tanta y ishkay pescädulami mirkapäkuna kaykan”.
18 Tsawraqa Jesús kayno nirqan: “Tsay mirkapaykita apapäkamuy”.
19 Nirkurmi runakunata Jesús nirqan pashpaman jamakärinanpaq. Pitsqa tantata y ishkay pescäduta aptarkurmi jana patsata rikärishpan Tayta Diosta Jesús yusulpäki nirqan. Tantata pakirirnami discïpulunkunata makyarqan runakunata aypupäkunanpaq. 20 Saksashqanyaq mikurkuptinnami putsushqankunata chunka ishkay canasta juntata shuntapäkurqan. 21 Tsaycho mikuqkuna karqan pitsqa waranqano (5,000), warmikunata y wamrakunata mana yupaylapami.
Yaku jananpa Jesús aywashqan
22 Tsaypitanami discïpulunkunata Jesús nirqan *büquiman witsarkur wak tsimpaman nawpapäkunanpaq. Nirkurnami tsaycho kaq runakunata despacharkur 23 Tayta Diosta manakunanpaq kikilan jirkaman witsarqan. Tsaychömi patsa tsakashqanyaq manakurqan. 24 Tsayyaqqa discïpulunkuna qocha chawpintanami büquiwan aywarkaykarqan. Fiyupa wayrar yakuta pulchaqyätsiptinmi pasaypa nakarkaykarqan.
25 Patsa waraykaptinnami discïpulunkuna kaqman yaku jananpa Jesús aywarqan. 26 Tsayta rikaykurmi discïpulunkuna fiyupa mantsakar qapararqan kayno nir: “¡Achachalay! ¡Almachaq aywaykämun!”
27 Tsawraqa Jesús kayno nirqan: “¡Noqami kaykä! ¡Ama mantsakamaytsu!”
28 Tsawraqa Pedro kayno nirqan: “Rasunpa qam karqa noqapis yaku jananpa shamunäpaq niykalämay, tayta”.
29 Tsayno niptin Jesús kayno nirqan: “Shamuy”.
Tsawraqa büquipita yarqurir yaku jananpa Jesús kaqman aywayta qalaykurqan. 30 Fiyupa wayraptinmi mantsakashpan talpukarqan. Tsaymi qapararqan kayno nir: “¡Salvaykalämay, tayta!”
31 Tsawraqa makinpita jukla tsutarkur Jesús kayno nirqan: “Janan shonqula yärakuq runa, ¿imanirtaq mana yärakamankitsu?”
32 Büquiman witsarkuptinnami wayra chawarqanna. 33 Tsayta rikaykurmi büquicho kaykaqkuna qonqurpakuykur kayno nipäkurqan: “¡Rasunpami Tayta Diospa Tsurin kaykanki, tayta!”
Genesaretcho qeshyaqkunata Jesús aliyätsishqan
34 Qochata tsimparkurnami Genesaret pampaman chayapäkurqan. 35 Tsaycho runakuna Jesústa reqirkurmi maytsaypa wilakatsirqan. Tsaymi lapan qeshyaqkunata apapäkurqan aliyätsinanpaq. 36 Chayaykatsirmi Jesústa ruwakärirqan qeshyaqninkuna röpanpa kuchulantapis yataykunanpaq. Tsaychömi lapanpis yataq kaqqa aliyarqan.