Génesis
Ishkay runakuna sueñushqanta José tantiyatsishqan
40 Tsaypitanami vïnu ruraqkunapa y tanta ruraqkunapa mandaqninkuna lutanta rurar 2 Egipto nacionpa mandaqnin rey Faraónta fiyupa rabyatsirqan. 3 Tsaymi paykunata prësu apatsirqan wardiakunapa capitanninpa wayincho kaykaq carcilman. Tsay carcilchömi Josépis wichqararqan. 4 Paykunatami wardiakunapa capitanninqa Josépa makinman churarqan. Tsay ishkay runakunami atska killa carcilcho wichqararqan.
5 Juk tsakaymi vïnu ruraqkunapa y tanta ruraqkunapa mandaqninkuna sueñupäkurqan imapis pasananpaq kashqanta. 6 Josémi tuta tutala watukuq aywar pasaypa lakishqa karkaykaqta tarirqan. 7 Tsawraqa tapurqan kayno nir: “¿Imanirtaq pasaypa lakishqa karkaykanki?”
8 Tsawraqa kayno nipäkurqan: “Mana alitami sueñushqä. Manami pipis kantsu sueñushqä imapaq kashqantapis tantiyatsimänanpaq”.
Tsayno niptin José kayno nirqan: “Tsay sueñushqayki imapaq kashqantapis Tayta Dioslami tantiyatsimäshun. Mä, wilapäkamay imata sueñushqaykitapis”.
9 Tsayno niptinmi vïnu ruraqkunapa mandaqnin kayno wilaparqan: “Sueñuynïchömi rikashqä juk üva yöra 10 kimsa rämayuq kaykaqta. Tsay rämakunami tsintsimur tuktushpan poquraykaq üvakunaman tikrashqa. 11 Tsay poqushqa üvata Faraónpa väsunta aptaraykashqäman qapirkurmi Faraónta makyaykashqä”.
12 Tsayno wilaptinmi José kayno nirqan: “Sueñuynikicho kimsa rämakunata rikashqaykiqa kimsa junaqmi kaykan. 13 Kananpita kimsa junaqtami kay carcilpita Faraón jorqushushpayki puntata arushqaykiman kutitsishunkipaq. Tsaymi väsuwan vïnuta yapay sirvinkipaq. 14 Nishqänöla arushqaykiman kutiykur noqatapis yarparkalämanki ari. Kuyapämashpayki tayta Faraónta ruwakuykulanki kaypita jorqamänanpaq. 15 Hebreo runakuna tashqanpitami liyarkur kay markaman apamashqa. Jutsaynaq kaykarmi kaycho wataraykä”.
16 Alipaq sueñushqanta wilaptinmi tanta ruraqkunapa mandaqninpis Joséta kayno nir wilaparqan: “Sueñuynïchömi kimsa taksha canastakunawan janak janak umächo tantakunata puriykätsishqä. 17 Janan kaq canastachömi tukuy niraq böllukuna kaykashqa Faraón mikunanpaq. Tsay böllukunatami pishqukuna shamur mikukurkushqa”.
18 Tsayno wilapaptinmi paytapis José kayno nirqan: “Sueñuynikicho rikashqayki kimsa taksha canastakunaqa kaykan kimsa junaqmi. 19 Kananpita kimsa junaqtami umaykita roquratsir Faraónqa qeruman warkutsishuptiki ayaykita wiskulkuna mikunqapaq”.
20 Tsaypita kimsa junaqtanami Faraónpa diyan karqan. Tsawraqa Faraón mandäshiqninkunawan fiestata rurar mikur y upur qoyarqan. Tsay junaqmi carcilpita jorqatsimurqan tanta ruraqkunapa y vïnu ruraqkunapa mandaqninkunata. 21 Nirkurmi vïnu ruraqkunapa mandaqninta yapay churarqan nawpata arushqanman. Tsaymi vïnuta väsuwan Faraónta yapay sirvirqan. 22 Tanta ruraqkunapa mandaqnintami itsanqa José wilashqannöla wanurkatsir ayanta qeruman warkutsirqan. 23 Vïnu ruraqkunapa mandaqninqa José ruwakushqanta manami yarparqantsu.