Salmos

96 Mushuq alabanzawan TAYTA DIOSTA alabapäkuy.

Kay patsacho taqkuna, lapayki TAYTA DIOSTA alabapäkuy.

 2 Tayta Diospa jutinta joqarir cantapäkuy.

Salvakuq kashqanta waran waran wilakäriy.

 3 Munayniyuq kashqanta maytsay nacionkunachöpis wilakäriy.

Mantsariypaq rurashqantapis maytsay markakunachöpis wilakäriy.

 4 Tsayno wilakäriy TAYTA DIOS alilata ruraq kashqanpita.

Lapan runakuna payta alabananpaq wilakäriy.

Payqa ima diospitapis mas mantsaypaqmi kaykan.

 5 Wakin markakunapa diosninkunaqa ïdulukunalami kaykan.

TAYTA DIOSQA munayniyuq karmi jana patsatapis kamashqa.

 6 Espantaypaq kaqkunata ruraptinmi nawpancho pïmaypis alabapäkun.

Munayniyuq karmi templuntapis kamarätsin.

 7 Maytsay markacho taqkuna, TAYTA DIOSTA alabapäkuy.

Munayniyuq kashqanpita payta adorapäkuy.

 8 TAYTA DIOSPA jutinta joqarir adorapäkuy.

Ofrendata apakurkur templunman aywapäkuy.

 9 Munayniyuq *santu TAYTA DIOSTA adorapäkuy.

Intëru patsacho taq runakuna nawpancho siksikyätsun.

10 Maytsay nacionkunacho taq runakunata kayno wilapäkuy:

“TAYTA DIOS japalanmi rey kaykan.

Paymi kay patsata kamashqa mana kuyukuq kananpaq.

Paymi lapan runakunatapis mana jananpaypa juzganqa”.

11 Jana patsapis kay patsapis kushikäritsun.

Lamarpis y tsaycho kaykaqkunapis bunyaypa bunyar kushikäritsun.

12 Chakrakunapis y tsaycho kaykaqkunapis kushikäritsun.

Munticho kaq yörakunapis kushikäritsun.

13 TAYTA DIOSPA nawpancho kushishqa cantapäkutsun.

Paymi aywaykämun kay patsacho juzgananpaq.

Paymi lapan nación runakunata mana jananpaypa juzganqapaq.