Salmos
Tayta Diosta lapan runakuna alabananpaq nishqan
(1) Cantaqkunapa mandaqninpaqmi. Cuerdayuq instrumentuta tukar cantapäkunki. Kay salmuqa cantanantsipaqmi kaykan.
67 (2) Tayta Dios, kuyapämashpayki bendicionnikita churaykalämuy.
Ali rikamashpayki noqakunata yanapaykalämay. Selah
2 (3) Tsaynöpami wilakuynikita maytsaychöpis musyapäkunqa.
Salvakuq kashqaykitami lapan nación runakunapis tantiyapäkunqa.
3 (4) ¡Tayta Dios, lapan runakuna alabaykushunki!
¡May markachöpis alabaykushunki!
4 (5) Kay patsacho lapan nacionkunatami ali rikaykanki.
May markacho taq runakunatapis mana jananpaypami juzganki.
Tsayno kashqaykipita lapan nacionkunacho pasaypa kushikäritsun. Selah
5 (6) ¡Tayta Dios, lapan runakuna alabaykushunki!
¡May markacho taqkunapis alabaykushunki!
6 (7) Chakracho mikuykuna alimi wayunqa.
Tayta Diosnintsimi bendicionninta churamunqa.
7 (8) Tsaynöla bendicionninta imaypis churaykalämutsun.
Kay patsacho juk kuchunpita jukaq kuchunyaq lapan runakunapis payta *mantsakutsun.