Oseas
12 (2) Efraín runakunaqa pasaypa lulakuylaman y wanutsinakuylaman uman churakashqa karmi Asiria runakunawan *pactuta rurarkaykan.
Egipto nacionwanpis pactuta rurashpanmi aceitita aparkaykätsin.
Tsay nacionkunawan pactuta rurarqa wayralawan pachan juntananpaq kashqanta yarpaq runanömi manakaqlapaq rurarkaykan.
Inti jeqamunan kaq lädupita shamuq akaq wayrata qoyayta qatikachaq runanömi manakaqkunata rurarkaykan”.
2 (3) Judá runakunapitapis TAYTA DIOS rabyashqami kaykan.
Tsaymi jutsata rurashqanman tupu castiganqa.
3 (4) Unay ayluntsi Jacobpis wawqinpa talonninta* aptakushqami yurirqan.*
Awkisna kaykarmi Tayta Dioswan pelyarqan.
4 (5) *Angilwan pelyar* vinciykurmi bendicionninta qonanpaq waqapashpan ruwakurqan.*
Tsaypitanami Bet-elcho Tayta Dios yuriparkur parlaparqan.*
5 (6) Paymi lapanta mandaq TAYTA DIOS kaykan.
¡Paypa jutinpis *Yahwehmi kaykan!
6 (7) Tsayno kaykaptinqa jutsa ruraykunata kacharir Tayta Diosta perdonta manakäriy.
Tayta Diosta promitishqaykinöla leyninkunata cäsukur kawapäkuy.
Kuyashuqniki Tayta Diosman imaypis yärakäriy.
7 (8) TAYTA DIOSMI kayno nin:
“Qamkunaqa cananeo runakunanömi runa mayikita pësuwan engañarkaykanki.
Runa mayikita engañar mishkipäkunkiraqmi.
8 (9) Tsayno engañarmi kushishqa kayno nirkaykanki:
‘Aläpami rïcuyashqä.
Negociupaq suertï kanmi.
Runakunata engañashqäta manami pipis cuentata qokuntsu’.
9 (10) Tsayno nipäkurpis tantiyakäriy unay ayluykikuna Egiptucho kashqanpita patsa TAYTA DIOSNIKI kashqäta.
Tsaymi castigaptï toldukunalacho tankipaq *Ramäda fiestata rurar tashqaykino.*
10 (11) “Jutsa ruraykunata kacharinaykipaqmi profëtakunawan wilakatsimurqä.
Wilapäshunaykipaqmi sueñuynincho yaparir yaparir revelarqä.
Imamanpis tinkutsiypa tantiyatsishunaykipaqmi kachamurqä.
11 (12) “Galaad particho taq runakunaqa ïdulukunata manakaqlapaqmi sirvipäkun.
Gilgalcho taq runakunapis törukunata pishtarkur manakaqlapaqmi juk dioskunapaq sacrificiukunata *altarkunacho ruparkaykätsin.
Tsaymi altarninkunata lapanta talamar ushashaq.
Perqashqan rumikunapis chakrachömi mashtaranqa”.
12 (13) Unay ayluntsi Jacobqa Aram partimanmi qeshpir aywakurqan.
Tsaychömi uyshata mitsipakuypa warmita ashirqan.
13 (14) Tsaypita unaytanami Israel runakunata Egiptupita juk profëtawan TAYTA DIOS jorqamurqan.*
Tsay profëtawanmi paykunata cuidatsirqan.
14 (15) Tsayno kaykaptinpis qamkunaqa Tayta Diosta pasaypami rabyanaykätsinki.
Pasaypa jutsayuq kapäkushqaykipitami Tayta Dios castigashunkipaq.
Castigashqa kanaykipaqqa kikikikunami jutsayuq karkaykanki.