Levítico
Jawka kawakuy sacrificiupita tantiyatsishqan
3 “ ‘TAYTA DIOSPA nawpanman* jawka kawakuy sacrificiuta apamurqa turituta karpis o ternërata karpis sänuta apamunqa. 2 Sacrificiupaq apamuq runami uywapa umanman makinta churaykur Tinkuna Toldu patiucho pishtanqa. Aarónpita miraq cürakunami uywapa yawarninwan *altarpa lädunkunata tsaqtsupanqa.
3 “ ‘Nirkurnami TAYTA DIOSPAQ rupatsipäkunanpaq uywapa pacha wirankunata cürakunata entreganqa. 4 Tsaynöla entreganqa wirantinta ishkan rurunkunata, washancho kaykaq wirankunata y natincho kaykaq wirankunata. Natincho kaykaq wirankunata y rurunta jorqurkurmi 5 rupatsina sacrificiu jananman cürakuna churanqa rupananpaq. Tsay rupatsishqanpa ali asyayninta* mayarmi TAYTA DIOS kushikunqa.
6 “ ‘Jawka kawakuy sacrificiupaq uyshata o cabrata apamurqa chinata karpis orquta karpis sänuta apamunqa. 7 Uyshata TAYTA DIOSPA nawpanman apamurqa 8 uyshapa umanman makinta churaykur Tinkuna Toldu patiucho pishtanqa. Tsay uyshapa yawarninwanmi cürakuna altarpa lädunkunata tsaqtsupanqa.
9 “ ‘Jawka kawakuy sacrificiupaq apamurqa uyshapa chupanta* sapipita kutsurir y pacha wirankunata jorqurir cürakunata entreganqa. 10 Tsaynöla entreganqa rurunninkunata wirantinta, washancho kaykaq wirankunata y natinnincho kaykaq wirankunata. Natincho kaykaq wirankunataqa rurunnintawan jorquykur 11 altarcho cüra rupatsinqa. Tsay rupatsishqanqa TAYTA DIOSPAQ mikuymi kanqa.
12 “ ‘Cabra kaptinqa TAYTA DIOSPAQ pishtashqan höra 13 uywapa umanman makinta churaykur Tinkuna Toldu patiucho pishtanqa. Tsay uywapa yawarninwanmi Aarónpita miraq cürakuna altarpa lädunkunata tsaqtsupanqa.
14 “ ‘Tsay apamuq runami cabrapa pacha wirankunata cürakunata entreganqa TAYTA DIOSTA adorar altarcho rupatsinanpaq. 15 Tsaynöla entreganqa ishkan rurunninkunata wirantinta y washancho kaykaq wirankunatapis. Natincho kaykaq wirankunataqa rurunnintawan jorqurir 16 altarcho cüra rupatsinqa. Tsay rupatsishqanpa ali asyayninta mayarmi TAYTA DIOS kushikunqa. Wirankunaqa TAYTA DIOSLAPAQMI kanqa.
17 “ ‘Maycho tarpis wirata ni yawarta ama mikupäkunkitsu. Tsay nishqäkunaqa imayyaqpis leymi kanqa qamkunapaq y qamkunapita miraqkunapaqpis’ ”.