1 Crónicas
Saúl y tsurinkuna guërracho wanushqan
10 Gilboa jirkacho filisteo runakuna atacaptinmi Israel runakuna qeshpir aywakärirqan. Tsayno qeshpiykaqtami filisteo runakuna atskata wanutsipäkurqan. 2 Tsaynölami Saúlta y tsurinkunatapis qatikacharqan. Tsaychömi wanutsipäkurqan Saúlpa tsurinkuna Jonatánta, Abinadabta y Malquisúata.
3 Tsaypitana filisteo runakuna Saúlta flëchaykärirqan. Tsaymi qeshpiyta mana kamäpakur 4 armanta apapaq yanapaqnin soldäduta Saúl kayno nirqan: “Espädaykiwan wanuratsimay. Manami munätsu Diosta mana reqiq filisteo runakuna wanurkatsimar kushikärinanta”.
Tsayno niptinpis yanapaqnin soldädu pasaypa mantsakushpan manami wanutsiyta munarqantsu. Mana munaptinmi espädanta jawirkur puntanman Saúl lätakuykurqan. 5 Saúl wanushqanta rikaykurmi yanapaqnin soldädupis kikin tuksikurirqan. 6 Tsaynöpami Saúl, kimsa tsurinkuna y paywan kaykaq aylunkuna wanurqan. 7 Israel soldädukuna qeshpishqanta y tsurinkunawan Saúl wanushqanta mayaykurmi Jezreel pampacho taq Israel runakuna markankunapita qeshpir aywakärirqan. Tsaymi filisteo runakunana tsay markakunacho tarqan.
8 Saúl wanushqanpita jukaqnin junaqnami wanushkunapa imaykantapis apakunanpaq filisteo runakuna aywapäkurqan. Tsaychömi Saúlta y tsurinkunata Gilboa jirkacho wanushqa jitarpaykaqta taripäkurqan. 9 Tsawraqa Saúlpa umanta roqurishpan espädanta y pelyananpaq kaq röpanta shuntapäkurqan. Nirkurmi intëru markakunaman diosninkunapa templunman wilakuqkunata kachapäkurqan Saúl wanushqanta wilakärinanpaq. 10 Saúlpa espädanta y pelyananpaq kaq röpantanami churapäkurqan diosninkunapa templunman y umantanami warkurqan *Dagón diosninpa templunman.
11 Saúlta tsayno rurapäkushqanta Galaad particho kaykaq Jabes markacho taq Israel runakuna mayaykurmi 12 alinnin kaq soldädukuna wilanakurkur Saúlpa y tsurinkunapa ayankunata shuntapäkurqan. Nirkurmi tsay ayakunata Jabesman apaykur encina yöra sikinman pampaykur qanchis junaqyaq ayunapäkurqan.
13 TAYTA DIOSTA mana cäsukushqanpita y TAYTA DIOSTA tapukunanpa trukan brüjaman rikatsikuq aywashqanpitami Saúl tsayno wanurqan.* 14 Tsaymi Tayta Dios kamakätsirqan filisteo runakuna payta wanutsipäkunanpaq. Nirkurnami Isaípa tsurin Davidtana churarqan rey kananpaq.*