Job

 2 “Nakaykaptï tsayno nimarqa ¿yanapaykämankitsuraq?

Kalpä mana kaptinpis ¿valuraykätsimankitsuraq?

 3 Yätsimaptikiqa alichari kawäman ¿aw?

Mana yachaq kaptïchari tsayno tantiyaykätsimanki ¿aw?

 4 ¡Pitaq tsayno parlanaykipaq yachayta qoshushqanki!

¡Pitaq tsayjinanpa ali yarpayta qoshushqanki!

5 “Wanushqa runakunapa almanqa lamarpita mas rurincho karmi fiyupa mantsakärin.

 6 Tsaycho kaptinpis paykunataqa Tayta Dios rikaykanmi.

Maycho kashqantapis musyaykanmi.

 7 Imapis mana kaykaptinmi jana patsata y kay patsatapis Tayta Dios kamashqa.

 8 Paymi yakutapis pukutaycho tsararan.

Yaku mayjina lasarpis pukutayta manami rachikätsintsu.

 9 Killapa atsikyaynintapis pukutaywanmi tsakätsin.

10 Tsaynölami intitapis nishqa lamarpa juk kuchunpa jeqarkamur atsikyänanpaq y jukaq kuchunpa jeqarpur tsakänanpaq.

11 “Tayta Dios rabyakuptinqa jana patsata tuknaraqkunapis mantsakushpanmi siksikyan.

12 Munayniyuq karmi lamartapis pulchaqyaykaqta chawätsin.

Poderösu karmi *Rahab uywatapis vincishqa.*

13 Pükariptinmi jana patsapis atsikyarkurqan.

Mantsakuypaq jatunkaray culebratapis* qeshpiykaqta paymi tsarirkur wanutsishqa.

14 “Tsaykunaqa kaykan Tayta Dios juk ishkay rurashqan kaqkunalaraqmi.

Pay rurashqankunataqa ichiklatami musyantsi.

Pasaypa munayniyuq kashqantaqa ¿piraq shumaq tantiyanman?”