Salmos

76 (2) Judá nacioncho lapanmi musyan Tayta Dios kashqanta.

Israel nacionchöpis lapanmi musyan Tayta Dios munayniyuq kashqanta.

 2 (3) Jerusalénchömi templun kaykan.

*Sión jirkanchömi pay taykan.

 3 (4) Tsayman atacaq chayaqkunata vincirmi flëchankunata, escüdunkunata, espädankunata y lapan armankunatapis pakir usharqan. Selah

 4 (5) Lapanpitapis mas munayniyuqmi kaykanki, Tayta Dios.

Atska uywayuq jirkapitapis qamqa mas kuyaypaqmi kaykanki.

 5 (6) Ali chölu kaqkunatapis lapantami ushakätsirqayki.

Munayniyuq karpis manami ima ruraytapis kamäpakurqantsu.

Paykunataqa chipyaqmi wanutsirqayki.

 6 (7) Jacob yärakushqan Tayta Dios, qam olquptikimi carrëta manijaqkunapis y cawallunkunapis mantsakärishpan chiyakäkurqan.

 7 (8) ¡Qamqa pasaypa mantsariypaqmi kaykanki!

Rabyakuptikiqa ¿piraq nawpaykicho kaykanman?

 8 (9) Jutsa ruraqkunata castiganaykipaq kashqanta jana patsapitami musyaykätsinki.

Kay patsacho lapan runakunapis mantsakurmi upälakärin.

 9 (10) Tsayno mantsakärin kay patsacho juzganaykipaq kashqanta musyarmi.

Juzgashpaykimi nakaykaqkunapa favornin sharkunki. Selah

10 (11) Tsaynöpami rabyashqa kaykaq runakunapis alabashunki.

Castïguykipita qeshpiqkunaqa tantiyakushpanmi alabashunki.

11 (12) TAYTA DIOSNINTSITA promitishqaykita mana qonqaypa cumplipäkuy.

Vecïnuntsi nacionkunapis paypaq ofrendakunata apamutsun.

Payqa mantsariypaqmi castigan.

12 (13) Paymi mandaq autoridäkunatapis wanutsin.

Kay patsacho kaq reykunapis paytaqa mantsakunmi.