Isaías

 2 Tsay witsanmi Tayta Dios kayno ninqa:

“Ali mishkiq üva wayuq chakrata* cantapay.

 3 Noqa TAYTA DIOSMI tsay üva chakrata shumaq rikaykä.

Mana kachaypami parquykä.

Pipis mana jarukunanpaqmi paqasta junaqta rikaykä.

4 “Nawpata rabyashqa karpis kananqa tsay chakrapita manami rabyänatsu.

Tsayno karpis kashakunata y mana ali qewakunata tarirqa lapantami rupatsishaq.

 5 Yärakamar manakamaqkunatami itsanqa kuyapäshaq.

Pipis ali rikanäta munarqa noqawan amistatsun.

Yapaymi kayno nï: ¡Noqawan amistatsun!”

6 Shamuq watakunachöqa Jacobpita miraq Israel runakuna ali winaykaq yöranömi nacionnincho kawapäkunqapaq.

Sapitsar shumaq tsintsimushqannömi kanqapaq.

Ali tuktur wayushqanmi* maytsay nacionkunamanpis chayanqapaq.

7 Israel runakunata Tayta Dios castigarpis manami contran runakunata castigashqannötsu castigashqa, sinöqa kuyapashqami.

Tsaymi contrankunata ushakätsirpis Israel runakunataqa mana ushakätsishqatsu.

 8 Ushakätsinanpa trukanqa nacionninpita juk läduman prësu apatsirmi castigashqa.

Chunyaq jirkapita fiyupa wayrämur wakpa kaypa imaykatapis mashtaypa mashtashqanömi mashtakätsishqa.

9 Tsayno kaptinpis Jacobpita miraqkunapa jutsankunataqa perdonanqami.

Itsanqa perdonanqa juk dioskunata adorakunan *altarkunata ushakätsiptin,

altarta perqashqan rumikunata isku rumitano chipyaq rupatsir ushakätsiptin,

*Asera diösapaq raku qerukunata manana jawiptin

y juk dioskunapaq inciensuwan qoshtatsikunan altarkunatapis juchutsiptinmi.

10 Nacionninpita Israel runakunata apakuptin ali murallashqa markankuna chunyaqmi rikakushqa.

Tsaytsika runakuna tashqan markakunachöpis manami pipis kashqanatsu.

Mitsikuna jirkakunalanami rikakushqa.

Tsaychömi turitukunalana qewata mikur pacha junta punurkaykan.

11 Rämakuna tsakir pakikaqkunatami warmikuna tsaycho yantakurkaykan.

Tsaycho taq runakuna mana tantiyakuqmi kashqa.

Tsaymi paykunata kamaq Tayta Dios mana kuyapashqatsu ni lakipashqatsu.