Salmos

98 (1b) Mushuq alabanzata cantar TAYTA DIOSTA alabapäkuy.

Paymi mantsariypaq kaqkunata rurashqa.

Munayniyuq karmi lapan contrankunata vincishqa.

 2 Contrankunata vincishqantami TAYTA DIOS wilakushqa.

Chikiqninkunata castigashqantami lapan nacioncho taq runakunata musyatsishqa.

 3 Israel runakunata kuyar promitishqantami cumpliykan.

Intëru kay patsachömi pïmaypis musyaykan Tayta Diosnintsi salvakuq kashqanta.*

 4 Kay patsacho taqkuna, kushikushpayki Tayta Diosta alabapäkuy.

Lapan shonquykiwan alabanzakunata cantapäkuy.*

 5 Arpata tukapalanpa TAYTA DIOSTA alabapäkuy.

Cuerdayuq instrumentukunata tukapalanpa alabapäkuy.

 6 TAYTA DIOSQA mandamaqnintsi reymi kaykan.

*Cornëtakunata y waqrakunata tukapalanpa alabapäkuy.

 7 Lamarpis y tsaycho kaykaqkunapis kushishqa qaparpätsun.

Kay patsapis y kay patsacho taqkunapis pasaypa kushikäritsun.

 8 Mayukunapis kushikuypita paqchipätsun.

Jirkakunapis kushishqa cantapäkutsun.*

 9 TAYTA DIOSPA nawpancho alabapäkutsun.

Payqa lapan runakunata juzgananpaqmi aywaykämun.

Paymi kay patsacho taqkunata mana jananpaypa juzganqa.