Salmos

82 (1b) Jana patsacho munayniyuqkuna juntakashqanchömi Tayta Dios juzgananpaq sharkun.

Paykunapa chawpincho karmi juezkunata kayno nin:

 2 “¡Imayyaqraq mana ali juzgarkaykanki!

¡Imayyaqraq fiyu runakunapa favornin sharkurkaykanki! Selah

 3 “Pïninpis mana kaqkunata y waktsakunata shumaq arreglapäkuy.

Pobrikunapa y muchuycho kaqkunapa favornin sharkapäkuy.*

 4 Waktsakunata y pobrikunata fiyu runakunapa makinpita jorqapäkuy.

Pïninpis mana kaqkunapa favornin sharkapäkuy.

 5 Mana ali arreglarqa upa runanömi karkaykanki.

Imata rurashqaykitapis manami musyankitsu ni tantiyankitsu.

Mana ali juzgaptikimi patsata tuknaraq cimientupis siksikyan.

 6 “Noqami nirqä: ‘Qamkunaqa dioskunami karkaykanki.*

Lapaykipis poderniyuq Tayta Diospa wamrankunami karkaykanki.*

 7 Tsayno karpis wakin runakunanölami wanupäkunkipaq.

Wakin mandaqkunanölami qamkunapis ushakankipaq’ ”.

 8 Tayta Dios, lapan nacionkunapapis qammi duëñun kaykanki.

Aywaykalämuy runakunata juzganaykipaq.