Hechos
Mikuyta aypunanpaq akrashqan
6 Tsay witsanmi discïpulukuna atskayarqan. Paykunacho waktsa viüdakuna kaptinmi waran waran mikuyta aypupäkuq. Hebreo parlaq viüdakunata mas yanapaptinmi griego rimaqkuna jamurpar kayno nipäkurqan: “Griego rimaq viüdakunata mana cäsuypami hebreo rimaqkunaqa kikinpurala mikuyta aypunakärin”.
2 Tsayno niptinmi lapan discïpulukunata shuntaykur chunka ishkay apostolkuna kayno nipäkurqan: “Wawqikuna, manami alitsu kaykan Diospa wilakuyninta kachaykur viüdakunata atiendir täkäriptï. 3 Tsawraqa mikuyta aypunanpaq qamkunapita qanchis wawqikunata akrapäkuy. Paykuna katsun ali rikashqa runakuna, Espíritu Santupa munaynincho kawaqkuna y ali yarpayniyuq runakuna. 4 Tsaynöpami noqakunapa tiempü kanqa Tayta Diosta manakärinäpaq y ali wilakuyninta wilakärinäpaq”.
5 Tsayno wilanakurkurmi akrapäkurqan Estebanta, Felipita, Prócoruta, Nicanorta, Timónta, Parmenasta y Antioquía markapita kaq Nicolásta. Estebanqa Tayta Diosman shumaq yärakuq y Espíritu Santupa munaynincho kawaqmi karqan. Nicolásqa Israel runa kananpaq nawpatanami *señalakushqa karqan. 6 Nirkurmi *apostolkuna tsay akrashqan wawqikunapa umankunaman makinta churaykur Tayta Diosta manakärirqan.
7 Tsawraqa Tayta Diospa wilakuyninta wilakäriptin discïpulukuna Jerusaléncho atskayarqan. Tsaynölami cürakunapis tsay wilakuyta atskaq chaskikärirqan.
Estebanta prësu tsaripäkushqan
8 Runakunapa nawpancho milagrukunata y señalkunata* rurananpaqmi Estebanta Tayta Dios yanaparqan. 9 Paywanmi Librina nishqan *sinagögacho juntakaq wakin Israel runakuna rimanakuyta qalaykurqan. Tsay runakuna karqan Cirene nacionpita, Alejandría markapita, Cilicia provinciapita y Asia provinciapitami. 10 Espíritu Santupa munayninwan shumaq tantiyaykur parlaptinmi Estebanta upälatsiyta mana kamäpakärirqantsu.
11 Tsaymi pakaylapa runakunata pägar yachatsipäkurqan Estebanpa contran kayno parlapäkunanpaq: “Moiséspa y Tayta Diospa contran Esteban parlaykaqtami mayapäkushqä”.
12 Tsayno nipäkuptinmi Israel mayor runakuna, ley yachatsiqkuna y wakin runakunapis fiyupa rabyakurqan. Tsawraqa Estebanta prësu tsarirkur apapäkurqan *Sanedrín juezkuna juntaraykashqanman. 13 Tsaychömi manakaqta jitapar Estebanpa contran kayno nipäkurqan: “Kay runaqa *sagrädu templuntsipa y leynintsipa contranmi imaypis parlaykan. 14 Tsaynöpis nin Nazaretpita kaq Jesús templuntsita juchutsinanpaq kashqanta y Moisés yachatsishqan costumbrintsikunata mana cäsukunantsipaqmi”.
15 Tsaycho jamarpaykaq juezkuna Estebanpa qaqlanta rikärishpan *angilpa qaqlantanömi rikapäkurqan.