Lucas
Chunka ishkay discïpulunkunata Jesús kachashqan
9 Tsaypitanami chunka ishkay discïpulunkunata qayaykur munayninta Jesús qorqan runakunapita *supaykunata qarqunanpaq y qeshyaqkunata aliyätsinanpaq. 2 Nirkurna paykunata kacharqan Tayta Dios *mandaykashqan chayamushqanta wilakärinanpaq y qeshyaqkunata aliyätsinanpaqpis. 3 Kachashpanmi kayno nirqan: “Aywar ama apapäkunkitsu tukruykita, qepikita, mirkapaykita, qellaynikita, ni trukakunaykipaq röpaykitapis. 4 Pipa wayiman patsakurpis tsay markapita aywakärishqaykiyaq tsaylacho patsaräkunki. 5 May markachöpis mana chaskishuptikiqa chakikicho kaykaq polvuta tapshiriykur aywakärinki. Tsayno rurapäkunki Tayta Dios castigananpaq kashqanta tantiyakärinanpaq”.
6 Tsayno niptinmi discïpulunkuna markan markan aywar Tayta Diospa ali wilakuyninta wilakärirqan. Qeshyaqkunatapis maytsaychömi aliyätsirqan.
Jesústa Herodes reqiyta munashqan
7 Jesús rurashqankunata mayaykurmi Galileapa mandaqnin Herodes pasaypa yarpachakuyman churakarqan. Wakin runakunaqa nipäkurqan Bautizaq Juan kawarimushqanta. 8 Wakin nipäkurqan profëta Elías kashqanta. Wakinnami nipäkurqan unay profëtakuna mayqanpis kawarimushqanta. 9 Tsaymi Herodes kayno nirqan: “Juanpa umanta jorquykätsiptïqa ¿piraq kanman tsay runa? ¿Pipaqtaq wiyä imaykata rurashqantapis?”
Tsayno nirmi Jesústa imanöpapis reqiyta munarqan.
Pitsqa waranqa runakuna mikupäkunanpaq milagruta Jesús rurashqan
Mateo 14.13-21; Marcos 6.30-44; Juan 6.1-14
10 Wilakärishqanpita *apostolkuna kutiykamurmi lapan rurashqanta Jesústa wilaparqan. Tsaypitanami paykunata pushakurkur Betsaida marka cercancho kaykaq chunyaqman Jesús aywarqan. 11 Tsaypa aywapäkushqanta musyaykurmi qepanta atska runakuna aywapäkurqan. Chayaykuptinnami Tayta Dios *mandaykashqanpita Jesús yachatsirqan y qeshyaqkunatapis aliyätsirqan.
12 Tardiyaptinnami chunka ishkay discïpulunkuna Jesús kaqman aywaykur kayno nipäkurqan: “Runakunata niy mikuyninkuna y posädankuna ashiq aywapäkunanpaq. Kay chunyaqchöqa manami imapis kantsu”.
13 Tsawraqa Jesús kayno nirqan: “Qamkuna mikuyta qarapäkuy”.
Tsayno niptinmi kayno nipäkurqan: “Noqakunapaqa pitsqa tanta y ishkay pescädulami kaykan. Kaytsika runakunapaqqa ¡rantimur imaraqchi aypätsishwan!”
14 Tsaycho runakuna pitsqa waranqanömi (5,000) kaykarqan. Tsawraqa discïpulunkunata Jesús kayno nirqan: “Runakunata pitsqa chunka kamala jamatsipäkuy”.
15 Niptinmi lapanta jamatsirqan. 16 Tsaypitanami pitsqa tantata y ishkay pescäduta aptarkur jana patsata rikärishpan Tayta Diosta Jesús yusulpäki nirqan. Tantata pakirirnami discïpulunkunata makyarqan runakunata aypupäkunanpaq 17 Saksashqanyaq mikurkuptinnami putsushqankunata chunka ishkay canasta juntata shuntapäkurqan.
Tayta Dios kachamushqan Cristo kashqanta Pedro nishqan
Mateo 16.13-19; Marcos 8.27-29
18 Juk kutichömi discïpulunkunalawan kaykar Tayta Diosta Jesús manakurqan. Manakuyta usharkurmi discïpulunkunata tapurqan kayno nir: “¿Pï kashqätataq runakuna nirkaykan?”
19 Tsawraqa discïpulunkuna nipäkurqan: “Wakin nipäkun Bautizaq Juan kashqaykita. Wakinnami nipäkun profëta Elías kashqaykita. Y wakinnami nipäkun mayqan profëtapis kawarimushqa kashqaykita”.
20 Nipäkuptinmi yapay tapurqan: “Qamkunaqa ¿pï kashqätataq yarpapäkunki?”
Tsawraqa Pedro kayno nirqan: “Qamqa Tayta Dios kachamushqan Cristumi kaykanki”.
Wanutsinanpaq kashqanta Jesús wilakushqan
Mateo 16.20-28; Marcos 8.30—9.1
21 Tsayno niptinmi discïpulunkunata Jesús nirqan pitapis mana wilapänanpaq.* 22 Nirkurmi kayno nirqan: “*Runapa Tsurintami pasaypa nakatsipäkunqa. Mayor runakuna, mandaq cürakuna y ley yachatsiqkunami contran sharkur wanutsipäkunqa. Tsaypita kimsa junaqtaqa kawarimunqami”.
23 Nirkurmi lapan runakunata kayno nirqan: “Pipis discïpulü kayta munarqa kikin munashqanno ama kawatsuntsu, sinöqa waran waran cruzninta apaqno noqata qatirämätsun.* * 24 Kawayninta salvayta munaqkunaqa kawayninta oqranqami. Kawayninta noqa rayku oqraqkunami itsanqa kawayninta salvanqa.* *
25 “Infiernuman qaykushqa kananpaq kaptinqa ¿imapaqtaq välin intëru munduta munaynincho tsararashqanpis? 26 Pipis noqapita y wilakuynïpita penqakuptinqa Runapa Tsurinpis Tayta Diospa, *santu *angilkunapa y kikinpa chipchipyayninwan shamurmi paypita penqakunqa. 27 Rasunpami kayno nï: Manaraqpis wanurmi wakinniki rikapäkunki Tayta Dios *mandaykashqanta”.
Jesús chipchipyaykaq rikakushqan
28 Tsaypita pusaq junaqtanönami Pedruta, Juanta y Santiaguta pushakurkur Tayta Diosta manakunanpaq juk jirkaman Jesús witsarqan. 29 Tayta Diosta Jesús manakuykaptinmi qaqlanpis chipchipyarqan y röpanpis pasaypa yoraq rikakur chipchipyarqan. 30 Tsaychömi Moisés y Elías Jesúswan parlarkaykarqan. 31 Paykunapis chipchipyarraqmi Jerusaléncho Jesús wanunanpaq kashqanta parlarkaykarqan.
32 Tsay hörami Pedro ishkay discïpulu mayinkunawan pasaypa pununarkaykashqanchömi rikapäkurqan Jesús chipchipyaykaqta y ishkay runakuna paywan kaykaqta. 33 Moisés y Elías aywakurkaykaptinmi mana yarpachakuypa Jesústa Pedro kayno nirqan: “Alipaqmi kaycho karkaykä, tayta. Kimsa tsuklata rurapäkushaq: jukta qampaq, jukta Moiséspaq y jukta Elíaspaq”.
34 Tsayno parlaykaptinmi pukutay tsapakurkurqan. Tsaymi discïpulukuna fiyupa mantsakarqan. 35 Tsawraqa pukutay rurinpitami Tayta Dios kayno nimurqan: “Paymi akrashqä* Tsurï. Pay nishushqaykita wiyakäriy”.
36 Tsayno parlayta usharkuptinnami discïpulunkuna Jesúslatana rikapäkurqan. Jirkacho rikashqantaqa manami pitapis tsay witsan wilaparqantsu.
Juk mözuta Jesús aliyätsishqan
Mateo 17.14-21; Marcos 9.14-29
37 Tsaypita jukaqnin junaqnami jirkapita kutirkaykämuptin atska runakuna Jesústa tariparqan. 38 Tsay runakunapa chawpinpitami juk runa kayno qayakamurqan: “¡*Rabí, kay tsurïta kuyapaykulay! Pay japalanmi tsurï kaykan. 39 *Supaymi payta elaqpita qaparätsin, fiyupa siksikyätsin, poqshaytapis aqtutsin. Mana kachaypami pasaypa nakatsin. 40 Tsaymi supayta qarqunanpaq discïpuluykikunata ruwakuptïpis mana kamäpakushqatsu”.
41 Tsaymi Jesús kayno nirqan: “¡Yärakuyniynaq jutsasapa runakuna! ¡Imayyaqraq qamkunawan kaykäshaq! ¡Imayyaqraq qamkunata awantashayki! Mä tsurikita apamuy”.
42 Tsawraqa Jesúspa nawpanman chayaykätsiptin wamrata pampaman supay saqtariykur fiyupa siksikyätsirqan. Tsayta rikaykur supayta Jesús olqüpaptinmi wamrapita yarqurqan. Yarquptinmi wamrata aliyashqatana papäninta janchaparkurqan. 43 Tayta Diospa munayninwan aliyätsishqanta rikaykurmi lapan runakuna kushikärirqan.
Wanutsinanpaq kashqanta Jesús yapay wilakushqan
Mateo 17.22-23; Marcos 9.30-32
Rurashqankunata rikaykur runakuna kushikäriptinmi discïpulunkunata Jesús kayno nirqan: 44 “Shumaq tantiyakäriy. *Runapa Tsurinta chikiqninkunapa makinmanmi entreganqa”.
45 Tsayno wilaptinpis discïpulunkuna manami tantiyarqantsu imata niykashqantapis. Mana tantiyarpis tapuytami itsanqa mantsakärirqan.
Mayqan mas mandaq kananpaqpis discïpulukuna tapushqan
46 Tsaypitanami discïpulunkuna mas mandaq kayta munar kikinpura rimanakuykarqan. 47 Shonquncho imata yarpashqantapis musyarmi juk wamrata nawpanman ichiykatsir 48 Jesús kayno nirqan: “Pipis kay wamratano jutïcho chaskirqa noqatapis chaskiykämanmi. Noqata chaskimarqa kachamaqnïtapis chaskiykanmi. Qamkunachöpis mas humildi kaqmi mas mandaq kanqa”.
Supayta qarquptin mana michänanpaq Jesús tantiyatsishqan
49 Tsayno niptinmi Juan kayno nirqan: “Tayta, noqakuna rikapäkushqä juk runa jutikicho *supaykunata qarquykaqta. Noqantsiwan mana puriptinmi michäpäkushqä”.
50 Tsawraqa Jesús kayno nirqan: “Ama michankitsu. Pipis contrantsi mana karqa favornintsimi kaykan”.
Santiaguta y Juanta Jesús olqüpashqan
51 Jana patsaman kutikunanpaq walkalana pishiptinmi mana mantsakuypa Jerusalénman Jesús aywarqan. 52 Aywaykashqanchömi kacharqan Samaria particho juk markaman posäda ashiq. 53 Jerusalénpa aywaykashqanta musyarmi tsay markacho runakuna patsatsiyta mana munapäkurqantsu. 54 Tsaymi discïpulunkuna Santiago y Juan kayno nipäkurqan: “Tayta, jana patsapita nina shamur kay runakunata ushakätsinanpaq ¿Tayta Diosta [Elíasno] manakärïmanku?”
55 Tsawraqa Jesús olqüparqan [kayno nir: “Tsayno yarparqa manami Tayta Dios munashqannötsu yarparkaykanki. 56 *Runapa Tsurinqa manami runakunata ushakätsinanpaqtsu shamushqa, sinöqa runakunata salvananpaqmi”.]
Tsaypitanami juk markapana aywakärirqan.
Paywan puriyta munaqkunata Jesús tantiyatsishqan
57 Nänipa aywarkaykaptinmi Jesústa juk runa kayno nirqan: “Maypa aywaptikipis qatiräshaykimi, tayta”.
58 Tsayno niptinmi Jesús kayno nirqan: “Atuqkunapaqa machayninkuna kanmi. Pishqukunapapis qeshwankuna kanmi. *Runapa Tsurinpami itsanqa maycho punuykunalanpaqpis mana kantsu”.
59 Tsaypitanami juk runata kayno nirqan: “Qatirämay”.
Niptin kayno nirqan: “Qatiränäpaq papänïtaraq puntata pampaykamushaq, tayta”.
60 Tsawraqa Jesús kayno nirqan: “Wanushkunataqa wanushqa mayinkuna pampakäritsun. Qamqa Tayta Dios *mandaykashqanta wilakur puriy”.
61 Tsaynömi juk runapis nirqan: “Qatiräshaykimi, tayta. Itsanqa wayïcho kaqkunataraq wilaykamushaq”.
62 Tsawraqa Jesús kayno nirqan: “Pipis qepapa rikaraykar yuntawan aruqno karqa Tayta Dios mandaykashqanpaq manami sirvintsu”.