Jueces
Gedeónta Tayta Dios qayashqan
6 Israel runakunaqa yapaymi TAYTA DIOSTA mana cäsukur juk dioskunata adorayta qalaykurqan. Tsaymi paykunata madianita runakunapa munayninman TAYTA DIOS kachaykurqan qanchis wata nakatsipäkunanpaq. 2 Madianita runakuna fiyupa nakatsiptinmi Israel runakunaqa mantsakushpan pakakunankunata rurapäkurqan qaqakunacho, machaykunacho y pipis mana yaykunankunacho.
3 Cada watami cosëcha witsan madianita runakuna, amalecita runakuna y inti jeqamunan kaq läducho taq wakin runakunapis yaykapäkuq Israel runakunata atacananpaq. 4 Tsaynömi Israel runakunapa chakrankunacho campamentunta ruraykur chakran wayushqankunata ushapäkuq hasta Gaza partiyaq. Israel runakuna mikupäkunanpaq ima mikuytapis manami kachaparqantsu. Tsaynölami uyshankunata, cabrankunata, wäkankunata y bürrunkunatapis apakäriq. 5 Tsay runakunaqa toldunkunata apaykurmi uywankunawan maypapis aywapäkuq. *Camëllunkunapis yupayta mana atipaypaqmi karqan. Maypapis aywarqa chakracho lapan wayuq kaqtaqa tsaytsika chukluskunanöraqmi ushapäkuq. 6 Madianita runakuna tsayno ruraptinmi Israel runakuna pasaypa waktsayarqan. Tsayno nakarmi TAYTA DIOSTA manakärirqan yanapananpaq.
7 Madianita runakunapita salvananpaq manakäriptinmi 8 TAYTA DIOS kacharqan wilakuqnin profëtata. Tsay profëtami kayno nirqan: “Israel runakunata kuyaq TAYTA DIOS kaynömi nin: ‘Egiptucho ashmay kar nakarkaykaptikimi noqa jorqamushqä. 9 Wakin nación runakuna nakatsishuptikipis qamkunata salvashqä. Tsaynölami contrayki runakunata ushakarkatsir paykuna tashqan partita qamkunatana qoykushqä. 10 Qamkunata kaynömi nirqä: “Noqaqa TAYTA DIOSNIKIMI kaykä. Amorreo runakunapa markankunacho tashpayki paykuna adorashqan dioskunata ama adorapäkunkitsu”. Tsayno niykaptïpis qamkunaqa manami wiyakamashqankitsu’ ”.
11 Tsaypita juk kutimi TAYTA DIOSPA angilnin* Ofracho kaykaq encina yöra sikincho jamaykurqan. Tsay yöraqa Abiezer aylupita miraq Joáspa chakranchömi karqan. Tsaychömi madianita runakuna mana rikananpaq Joáspa tsurin Gedeónqa* üvata jarukunan kaqcho trïguta pakaylapa wayraykarqan. 12 Tsaycho wayraykaptinmi TAYTA DIOSPA angilnin yuriparkur kayno nirqan: “Kalpayuq y geniuyuq runa, TAYTA DIOSMI qamta yanapaykäshunki”.
13 Tsayno niptinmi Gedeón kayno nirqan: “Ay, tayta. TAYTA DIOS yanapaykämaptinqa ¿imanirtaq kayno nakarkaykä? Unay aylükuna nipäkurqan Egiptupita Israel runakunata jorqapäkamushqantami. Kananqa ¿imanirtaq noqakunata tsayno mana yanapamantsu? Yanapamänanpa trukanqa TAYTA DIOS qonqaykamarmi madianita runakunapa munayninman kachaykamashqa”.
14 Tsawraqa Gedeónta rikärir TAYTA DIOS kayno nirqan: “Qamqa madianita runakunata ichipankimi. Paykunapa makincho kashqanpita Israel runakunata jorqunaykipaq kikïmi qamta kachaykä”.
15 Tsayno niptinmi Gedeón kayno nirqan: “Ay, tayta. ¿Imanöpataq Israel runakunata salväman? Manasés trïbu runakunacho noqapa aylüqa waktsami kaykan. Tsaynöpis noqaqa alqu wiruqlanpaqpis manami välïtsu”.
16 Tsawraqa TAYTA DIOS kayno nirqan: “Tsayno kaptinpis madianita runakunata juk runatanöla lapanta ushakätsinaykipaq kikïmi qamta yanapashayki”.
17 TAYTA DIOS tsayno niptinmi Gedeón kayno nirqan: “Rasunpa yanapamänaykipaq kashqanta musyanäpaq ima milagrulatapis ruraykulay. 18 Imano kaptinpis yanukamushqäyaq kaycho jamapaykay, tayta”.
Tsawraqa TAYTA DIOS kayno nirqan: “Tsayno kaptinqa kaycho shuyaraykäshayki”.
19 Tsayno niptinmi Gedeónqa manta cabrata pishtarir yanukurqan. Tsaynöpis ishkay chunka (20) kïlu harinapita levadüraynaq tantata masararqan. Nirkurmi aytsata canastawan y calduntana mankawan encina yöra sikinman aparqan.
20 Chayatsiptinmi Tayta Diospa angilnin kayno nirqan: “Aytsata y levadüraynaq tantata kay jatun rumi jananman churay. Nirkur caldutapis jananman winapay”.
Ángel nishqannölami lapanta Gedeón rurarqan. 21 Tsaymi TAYTA DIOSPA angilnin tukrunwan töparkurqan aytsata y tantata. Tsawraqa rumipita nina ratar aytsata y levadüraynaq tantata rupar usharqan. Nirkurnami TAYTA DIOSPA angilnin elqakäkurqan.
22 Tsayno elqakäkuptinmi Gedeón tantiyarqan TAYTA DIOSPA angilnin kashqanta. Tsaymi kayno nirqan: “¡Kaychi kaylaqa, Tayta! ¡Tayta Diospa angilnintami rikashqä! ¡Kanan wanushaqchari!”
23 Niptin TAYTA DIOS kayno nirqan: “Ama lakikuytsu ni mantsakaytsu. Manami wanunkipaqtsu”.
24 Tsawraqa TAYTA DIOSPAQ *altarta Gedeón rurarkur jutinta churaparqan Yahweh-shalom* jutin kananpaq. Tsay altarqa kananyaqmi Abiezer aylu runakuna tashqan Ofracho kaykan.
25 Tsay tsakaymi Gedeónta TAYTA DIOS kayno nirqan: “Papänikipa wäkanpita qanchis watayuq alinnin kaq töruta apamunki. Nirkur *Baalpaq papäniki rurashqan altarta talamarir nawpancho kaykaq *Asera diösapaq jawishqan qerutapis tseqtarinki. 26 Nirkur qaqa janancho noqapaq juk altarta ruraykur apamushqayki töruta pishtanki. Nirkur *Asera diösapaq jawishqan qeruta tseqtashqaykiwan altar janancho tsay töruta rupatsina sacrificiupaq rupatsinki”.
27 Tsayno niptinmi Gedeónqa chunka ashmayninkunawan TAYTA DIOS nishqannöla lapanta rurarqan. Itsanqa papäninpa aylunkunata y marka mayinkunata mantsakurmi tsakaylapa lapanta rurarqan. 28 Patsa waraptinnami markacho taq runakuna rikarqan Baalpa altarnin juchushqa kaykaqta y altarpa nawpancho kaykaq Asera diösapaq jawishqan raku qerupis manana kashqanta. Tsaynölami mushuq altarcho alinnin kaq töruta rupatsishqa kaykaqta taripäkurqan. 29 Tsawraqa runakuna juknin jukninpis kayno nipäkurqan: “¿Piraq kayta ruraykushqa?”
Tsayno tapukuptinmi wilapäkurqan Joáspa tsurin Gedeón rurashqanta.
Tsayno niptinmi Joásman aywaykur kayno nipäkurqan: 30 “¡Tsuriki Gedeónta jukla jorqamuy wanutsipäkunäpaq! ¡Paymi Baalpa altarninta juchutsishqa y nawpancho Aserapaq jawishqantsi qerutapis tseqtashqa!”
31 Tsayno niptinmi Joásqa tsaycho juntaraykaq runakunata kayno nirqan: “Qamkunaqa ¿imanirtaq Baalpa favornin sharkuykanki? ¡Pipis Baalpa favornin kaqqa manaraqpis patsa waraptin wanutsishqa katsun! Rasunpa dios karqa altarnin juchutsiqta kikin Baal pitapis castigatsun”.
32 Baalpa altarninta juchutsishqan junaqpita patsami Gedeónta Jerobaal jutiwan reqipäkurqan. Jerobaal ninanqa “kikin Baal castigatsun” ninanmi.
33 Tsay witsanmi madianita runakuna, amalecita runakuna y inti jeqamunan kaq läducho taq wakin runakunapis juntakashpan Jordán mayuta tsimparir Jezreel pampacho campamentuta rurapäkurqan. 34 Tsaymi TAYTA DIOSPA Espïritun Gedeónta valuratsiptin cornëtata* tukarqan runakuna juntakänanpaq. Tukaptinmi Abiezer aylu mayinkuna Gedeónwan juntakarqan. 35 Mas runakuna juntakänanpaqmi kachakunata kacharqan intëru Manasés trïbu runakuna tashqankunaman. Tsaynölami wilakatsirqan Aser trïbu runakunaman, Zabulón trïbu runakunaman y Neftalí trïbu runakunaman. Qayatsiptinmi Gedeón kaqman lapan juntakarqan.
36 Lapan juntakarkuptinmi Tayta Diosta manakur Gedeón kayno nirqan: “Nimashqaykino Israel runakunata salvanäpaq yanapamänayki kaptinqa 37 kanan tsakaymi milwa qaratsata ëraman churashaq. Waraynin* tutapaq milwa qaratsa ushmashqa kaptinpis pampa tsakila kaptinqa rasunpami musyashaq nimashqaykino Israel runakunata salvanaykipaq kashqanta”.
38 Tsawraqa Gedeón manakushqannölami waraynin tuta sharkur milwa qaratsata qaptsir juk tazón juntata shulya yakuta jorqurqan. 39 Tsayno kaptinpis yapaymi Tayta Diosta Gedeón kayno nir manakurqan: “Yapay manakuptï ama rabyakuykulaytsu, Tayta. Yapaymi uysha qaratsata pampaman churashaq. Pampa ushmashqa kaptinpis milwa tsakila warämuptinqa yanapamänaykipaq kashqantami musyashaq”.
40 Tsaymi Gedeón manakushqanno Tayta Dios warätsimurqan pampa ushmashqata y qaratsataqa tsakilata.