Miqueas

5 (4.14) Jerusalén runakuna, contraykikunata ichipänaykipaq kamarikäriy.

Qamkunata atacashunaykipaq jäpa runakunami chayamunqa.

Paykunami vincishushpayki mandaqniki reyta qaqlancho fiyupa wirupäkunqapaq.

2 (1) Belén Efrata marka, Judácho kaq wakin markakunapita mas takshala kaptikipis qamchömi Israel runakunapa mandaqnin rey yurinqa.*

Payqa unaypita patsami kaykan.

 3 (2) Wamrata warmi wachashqanyaqlami contrankunapa makincho Israel runakunata Tayta Dios kachaykunqa.

Wamra yuriykuptinnami Israel runakuna mashtakashqa kaykashqanpita kutipäkamunqa.

 4 (3) Tsay wamra winarkurnami TAYTA DIOS yanapaptin uysha mitsiqno kuyashqan runakunata shumaq rikanqa.

Maytsaychöpis runakuna payta adoraptinmi Israel runakuna pitapis mana mantsakuypa jawka kawapäkunqa.

 5 (4) Paymi salvamäshun jawka kawanantsipaq.

Tsay witsan Asiria runakuna markantsita atacar palaciuntsikunaman yaykamuptinpis ichipänanpaq atska capitankunatami kachashun.

 6 (5) Tsay capitankunami espädankunawan Asiria runakunata vincirkur munayninman churapäkunqa.

Tsaynöpami Nimrodpa* markanpita salvamäshunpaq.

 7 (6) Jacobpita miraqkunata wakinta wanutsiptinpis kawaykar quëdaqkunataqa maytsay markakunachöpis respitapäkunqami.

Shulyapis y tamyapis TAYTA DIOSPA bendicionnin kashqannömi paykunapis lapan marka runakunapaq bendición kanqapaq.

8 (7) Mayqan markapis contran sharkur atacaptinqa munti uywakunata león atacaqnöraqmi Israel runakuna atacanqapaq.

Manta león uyshakuna kaykashqanman yaykur wanutsir ushashqannömi paykunapis contrankunata wanutsir ushapäkunqapaq.

Kawaykaqtaqa manami juklaylatapis kachaykunqatsu.

 9 (8) TAYTA DIOS, tsaynöpami Israel runakunapa lapan contrankunata ushakätsinkipaq.

10 (9) Tsay contran runakunatami TAYTA DIOS kayno nin:

“Tsay junaqmi cawalluykikunatapis chipyaq wanutsishaq.

Guërra carrëtaykitapis lapantami ushakätsishaq.

11 (10) Markaykikunatapis y amparakunaykipaq sharkatsishqayki jatun wayikunatapis lapantami juchutsir ushakätsishaq.

12 (11) “Brüjukunatapis lapantami ushakätsishaq.

Rikakuqkunapis qamkunacho manami kanqanatsu.

13 (12) Adorapäkushqayki ïdulukunatapis y wankakunatapis ushakätsiptï kikiki rurashqayki dioskunata manami imaypis adorankipaqnatsu.

14 (13) *Asera diösapaq jawipäkushqayki raku qerukunatapis lapantami ushakätsishaq.

Markaykikunatapis lapantami juchutsir ushashaq.

15 (14) Pasaypa rabyashpämi mana cäsukamaq runakunataqa may markacho taptinpis castigashaqpaq”.