Zacarías
11 ¡Líbano nación, punkuykikunata kichay nina yaykur cedru qeruykikunata rupar ushananpaq!
2 Ciprés yörakuna, waqapäkuy cedru yörakuna tunishqanpita.
Kuyaylapaq cedru yörakuna ushakashqanami kaykan.
Basáncho kaq encina yörakuna, jatun munti ushakashqa kaptin waqapäkuy.*
3 Loqyuypa loqyur kaykaq qewakuna tsakishqanami kaykan.
Tsaymi uysha mitsiqkuna qaparpayparaq waqarkaykan.
Jordán mayu pampacho muntikunapis ushakashqanami kaykan.
Muntikuna manana kaptinmi leonkunapis qaparpaykan.
Ishkay mitsikuqman tinkutsiypa tantiyatsishqan
4 TAYTA DIOSNÏMI kayno nimarqan: “Pishtaypaq kaykaq uyshakunata shumaq mitsiy. 5 Uyshakunata rantiqkunaqa mana kuyapaypami pishtarkaykan. Rantikuqkunapis kaynömi nipäkun: ‘¡Yusulpäki! ¡TAYTA DIOSPA bendicionninwanmi rïcuyashqä!’ Uysha mitsiqkunapis manami uyshankunata kuyapantsu.*
6 “Tsayno kaptinmi noqapis kay nacioncho taq runakunata mana kuyapäshaqnatsu. Tsaymi contrankunapa y mandaq reykunapa munayninman kachaykushaq. Nacionta contrankuna asulaptin manami salvashaqtsu. Noqa TAYTA DIOSMI tsayno nï”.
7 Tsaymi uyshata rantiq negociantikuna minkakamaptin pishtananpaq kaykaq uyshankunata ali rikarqä. Ali rikanäpaqmi ishkay tukruta ashirqä. Jukaq tukrunpa jutinta churaparqä Ali Kaway jutin kananpaq. Jukaq tukrunpatana jutinta churaparqä Juklatsashqa jutin kananpaq. Tsay tukrükunawanmi* uyshakunata mitsirqä. 8 Makïcho kaykaq kimsaq mitsiqkuna chikimar rabyanätsimaptinmi juk killalacho paykunata qarqurqä.
9 Tsaypitanami uyshakunata kayno nirqä: “¡Manami qamkunata mitsishaykinatsu! ¡Wanuptikipis, wanutsishuptikipis y kikikipura wanutsinakuptikipis manami imapis qokamannatsu!”
10 Tsayno nirmi Ali Kaway jutinta churapashqä tukrüta pakirirqä. Tsayno pakirmi musyatsishqä maytsay nación runakunawan rurashqan *pactuta Tayta Dios ushakätsishqanta. 11 Tsaymi tsay junaq ushakarqan paykunawan Tayta Dios pactu rurashqan. Pakishqäta rikarmi uyshata rantiq negociantikuna tantiyapäkurqan pactu rurashqanta TAYTA DIOS ushakätsishqanta.
12 Tsaymi kayno nirqä: “Qamkunapaq ali kaptinqa mitsishqäpita pägapäkamay. Pägamayta mana munarqa amapis pägamaytsu”.
Tsaymi mitsipashqäpita pägapäkamarqan kimsa chunka (30) qellayta.
13 Tsayno pägamaptinmi TAYTA DIOS kayno nimarqan: “Mitsinaykipaq qamta churaykaptïqa walkalata pägashushpayki noqatapis manakaqmanmi churarkaykäman. Arupashqaykipita pägashushqayki qellaytaqa templucho kaykaq babulman winay”.
Tsaymi tsay kimsa chunka (30) qellayta aparkur templucho kaykaq babulman winarqä.* 14 Tsaypitanami Juklatsashqa jutiyuq tukrüta pakirirqä. Tsaynöpami musyatsirqä Judá runakunawan Israel runakuna chikinakur kawapäkushqanta.
15 Tsaypitanami TAYTA DIOS kayno nimarqan: “Kananqa mana ali mitsikuq runa kashqanno kay. 16 Kananpitaqa kay nacionman juk mitsikuqta churashaq oqrakashqatapis mana ashiqta, malwatapis mana cäsuqta, chakin pakishqatapis mana jampiqta y uyukunatapis ali qewaman mana qatiqta. Tsay mitsikuqqa shumaq mitsinanpa trukanqa wera weranlanta mikurmi shillulantana jitarinqa”.*
17 ¡Wawalaw, mana väliq mitsikuq runa!
Mitsiykashqayki uyshata kacharishqaykipita alawqa kaq makikitapis pishtaypa pishtatsun.
Alawqa kaq nawikitapis espädawan oqtitsun.
Rikraykipis wanukätsun.
Alawqa kaq nawikipis qaprayar ama rikatsunnatsu.