1 Samuel
Saúlta David mana wanutsishqan
24 (2) Filisteo runakunata vincishqanpita Saúl kutikuykaptinmi wilapäkurqan En-gadi jirkacho David kaykashqanta. 2 (3) Tsaymi Israel runakunapita kimsa waranqa (3,000) alinnin kaq soldädukunawan Saúl aywarqan munti cabrakuna purikunan qaqakuna lädupa Davidta ashishpan. 3 (4) Aywaykashqanchömi uysha kunchakuna nawpancho kaykaq jatun machayman chayarqan. Tsay machay rurinchömi yanapaqnin runakunawan David pakaraykarqan. Machaycho David kaykashqanta mana musyarmi Saúl yaykurqan ishpakunanpaq.
4 (5) Saúlta rikarmi Davidwan kaykaq runakuna kayno nirqan: “Kanan junaqmi TAYTA DIOS cumplishqa contraykita makikiman churamunanpaq nishqanta. Tsayno kaykaptinqa yarpashqaykino imatapis ruray”.
Tsaymi Davidqa mishi jaruylapa witiykur Saúl tunkuraykaptin tünicanpa kuchunta mana mayakätsiylapa kutsurirqan.
5 (6) Tsayta rurarkurmi lutanta rurashqanta tantiyakur David pasaypa lakikurqan. 6 (7) Tsaymi yanapaqnin runakunata kayno nirqan: “Qamkuna yätsimashqaykita ruranäpaq TAYTA DIOS tsapaykalämätsun. Kikin TAYTA DIOS Saúlta rey kananpaq akraykaptinqa noqapapis mandamaqnïmi kaykan. Tsaymi paytaqa yataylapis mana yatashaqtsu”.
7 (8) Tsayno nirmi yanapaqnin runakunata David micharqan Saúlta mana wanutsinanpaq. Saúlnami ishpakurir machaypita aywakurqan.
8 (9) Karu qepalanta machaypita Davidpis yarqurirmi qayakurqan kayno nir: “¡Rey Saúl!”
Saúl tikraykur rikäriptinmi urkunpis pampaman töpashqanyaq David qonqurpakuykur 9 (10) kayno nirqan: “Contrayki sharkuykashqäta runakuna nishuptiki ¿imanirtaq chaskipanki? 10 (11) Kananqa TAYTA DIOSMI nawpäman pushamushushqanki. Contrayki rasunpa karqa kay machaylachönami wanutsïman karqan. Yanapamaqnï runakuna qamta wanutsinäpaq nimaptinpis manami wanutsishqätsu. Tsaypa trukanqa rey kanaykipaq TAYTA DIOS akrashushqaykita musyaykarqa manami imaypis yataykushaykitsu. Tsaytaqa kikikimi rikaykanki.
11 (12) “Tayta, kay tsararaykashqä träputa rikay. Kayqa ¿manaku tünicaykipa kuchun? Wanutsiyta munarqa tünicaykipa kuchunta kutsuqnölami wanuratsïman karqan. Tsayno kaykaptinqa tantiyakuy wanutsiyta mana yarpashqäta ni contrayki mana kashqäta. Tsayno kaykaptïpis ¿imanirtaq qatikachaykämanki wanutsimänaykipaq? 12 (13) Mayqantsipis jutsayuq kaptintsiqa TAYTA DIOS castigamäshun. Noqaqa manami imaypis wanutsishaykitsu.
13 (14) “Unay runakuna kaynömi nipäkuq: ‘Fiyu runakunapitami lutan ruraykunaqa kaykan’. Tsaymi noqaqa imaypis wanutsishaykitsu. 14 (15) Pikinöla y wanushqa alqunöla mana väliq kaykaptïqa ¿imanirtaq qatikachaykämanki? 15 (16) Mayqantsitapis jutsayuq kaptintsiqa TAYTA DIOSMI juzgamäshun. Payqa musyanmi imata yarpashqätapis. Paymi makikipita salvamanqa”.
16 (17) Tsawraqa David parlayta usharkuptinmi Saúl kayno nirqan: “¡David! ¿Rasunpaku qam kaykanki, hïju?”
Tsayno nirmi qaparayparaq waqar 17 (18) kayno nirqan: “Pasaypa chikiykaptïpis ali runa karmi kuyapämashqanki. 18 (19) TAYTA DIOS qampa makikiman churamashqa kaykaptinpis manami wanutsimashqankitsu. Tsaymi kanan musyä kuyamashqaykita. 19 (20) Manami pï runapis contranta tariykurqa kawaykaqta kachaykuntsu. Tsayno kaptinpis qamqa kuyamashpayki manami wanutsimashqankitsu. Mana wanutsimashqaykipita TAYTA DIOS imachöpis yanapaykuläshunki.
20 (21) “Kananmi itsanqa tantiyakü rey kanaykipaq kashqanta. Rey kaptiki Israel runakuna alimi kawapäkunqapaq. 21 (22) TAYTA DIOS mayaykämaptintsi kanan promitimay rey kashpayki aylükunata mana wanutsinaykipaq y jutïpis mana qonqakänanpaq”.
22 (23) Tsayno niptinmi Davidqa Saúlta promitirqan aylunkunata mana wanutsinanpaq. Tsaypita palaciunman Saúl kutikuptinnami Davidpis aywakurqan pakarashqan kaqman.