Eclesiastés
8 Tantiyakuq kashqantsiqa kushikuypaqmi kaykan. Tantiyakuq runapa cäranqa kushikuypita atsikyanraqmi.
2 Tayta Diospa nawpancho promitishqaykinöla rey nishushqaykita imaypis cäsukuy. 3 Reypa contran ama sharkuytsu ni fiyu runakuna rurashqanta ama ruraytsu. Reyqa tsayno kaqkunata fiyupami castiganqa.
4 Tsaynöpis rey nishqantaqa pïmaypis cumplinmanmi. Paytaqa imata ruraptinpis manami pipis michayta kamäpakuntsu. 5 Rey nishqanta cäsukuq runataqa manami castiganqatsu. Tantiyakuq karqa rey mandashqanta imano cumplinanpaqpis yarpachakunmi. 6 Cumplinanpaq sasa kaptinpis yarpachakurqa y paciencian kaptinqa cumplinqami. 7 Itsanqa manami musyankitsu ni pipis wilashunkitsu wara warantinkuna ima pasananpaq kashqantapis.
8 Manami pipis wanuypita qeshpintsu ni imay junaq wanunanpaq kashqantapis akrayta kamäpakuntsu. Wanuypitaqa manami imapis tsapantsu. Fiyu kashqanpis manami wanuypitaqa salvanqatsu.
9 Kay patsacho imanir lapan pasashqankunatapis tantiyanäpaq yarpachakur y runakuna runa mayinta imanir nakatsishqanta yarpachakurmi lapan tsaykunata tantiyashqä.
Ali runa y fiyu runa imano kashqanpis
10 Tsaynöpis rikashqämi wakin runakuna *sagrädu templuman aywarpis fiyu kashqanta. Wanuptinnaqa fiyu kashqanta qonqaykurmi ali runa kashqanta nishpan pampapäkun. Tsaypis lakikuypaqmi kaykan.
11 Fiyu runata jutsanpita mana castigaptinqa wakinpis lutanta ruranalanpaqmi yarpachakunqa.
12 Fiyu runakuna pachak (100) kuti jutsata ruraptinpis y atska wata kawaptinpis noqaqa musyämi Tayta Diosta *mantsakuqkuna alipaq cäsukushqanta. 13 Fiyu runaqa Tayta Diosta mana mantsakur mana alimi kawanqa. Tsaynöpis manami atska watatsu kawanqa. Tsaypa trukanqa lantuy pasaqnölami ushakanqa.
14 Tsaynöpis rikashqämi ali runakuna jutsata ruraqnöpis pasaypa nakaykaqta. Tsaynöpis rikashqämi fiyu runakuna alita ruraqnöpis ali kawaykaqta.* Tsaypis lakikuypaqmi kaykan. 15 Tsaymi kayno nï: Tsaykunapita lakikunantsipa trukanqa kushishqa kawashun. Kay patsacho nakarpis mikushun, upushun y kushishqa kawashun.
16 Kay patsacho imanir lapan pasashqankunatapis musyayta munarmi shumaq yarpachakushqä. Tsaymi rikashqä punuytapis mana tariypa runakuna arushqanta.
17 Tsaynöpis tantiyashqä Tayta Dios kay patsacho lapan rurashqantaqa pipis mana tantiyashqanta. Imanöpa tantiyanantsipaq yarpachakurpis manami tantiyashunpaqtsu. Yachaq runa “noqaqa tantiyämi” nirpis manami rasunpaqa tantiyantsu.