Job
Eliú nishqan
32 Yaparir yaparir jutsaynaq kashqanta Job niptinmi tsay kimsan runakuna ima niytapis kamäpakärirqantsu.
2 Tsaychömi kaykarqan Ram aylu Baraquelpa tsurin Eliú. Payqa Buz partipitami karqan. Jutsaynaq kaykaptin Tayta Dios castigashqanta Job niptinmi Eliúqa pasaypa rabyakurqan. 3 Tsaynölami rabyakurqan kimsan amïgunkuna Job jutsa rurashqanta acusarpis mana tarishqanpita. 4 Elihúqa karqan paykunapita mas mözularaqmi. Tsaymi shuyararqan kimsan amïgunkuna Jobwan parlayta ushananyaq.
5 Tsayno shuyarpis kimsan amïgunkuna Jobta ima niytapis mana kamäpakuptinmi Eliúqa fiyupa rabyakurqan. 6 Tsaymi paykunata kayno nirqan:
“Rikamashqaykinöpis noqaqa mözularaqmi kaykä.
Qamkunaqa mas awkinnami karkaykanki.
Tsaymi respitar yarpashqäta mana rimakushqätsu.
7 Noqa upälakushqä puntata qamkuna parlanaykipaqmi.
Yarparqä mayor kar Jobta tantiyatsinaykipaq kashqantami.
8 Tsayno kaptinpis lapanpaq munayniyuq Tayta Diosmi tantiyakuyta qomantsi.
Tantiyakuq kanantsipaqmi Espïritunwan tantiyatsimantsi.
9 Tsayno kaptinqa manami awkinkunalatsu tantiyakuq kaykan.
Ni awkin kashqalanpitatsu ali kaqta ni mana ali kaqtapis yachan.
10 Tsayno kaptinqa noqa nishqätapis mayapäkamay.
Tantiyashqätami parlarkamushaq.
11 “Qamkuna parlapäkushqaykita shumaqmi mayashqä.
Jobta anyapayta ushashqaykiyaqmi imatapis mana rimakushqätsu.
12 Mayjina tantiyatsirpis manami mayqaykipis Jobta tantiyatsiyta kamäpakushqankitsu.
13 Jobta tantiyatsiyta mana kamäpakuykarqa ¿imanirtaq nipäkunki yachaq y tantiyakuq karkaykashqaykita?
¿Imanirtaq nipäkunki Jobta Tayta Diosna tantiyatsinanpaq kashqanta?
14 Job parlapämaptinqa manami qamkuna nishqaykinötsu nïman karqan”.
15 Tsayno nirkurmi Jobta kayno nirqan:
“Kay runakunaqa kimsanpis upatakashqami karkaykan.
Shimiynaqtami paykunata rurashqanki.
16 Paykuna parlayta ushananyaqmi noqa upälakushqä.
17 Tsaymi ninäpaq yarpashqäta kanan nishayki.
Yarpashqätaqa manami upälakushaqtsu.
18 “Yarpashqäta ninäpaqqa atskami kaykan.
Tsaytaqa manami upälakümantsu.
19 Vïnu poquptin shilikaykaq urpu mana awantashqannömi noqapis parlanäpaq kaqkunata mana awantakümantsu.
20 Yarpashqäta niptïraqmi shonqüpis atsikyarkunqa.
Parlarqa lapantami tantiyatsishayki.
21 Pipapis favornin mana sharkuylapami parlashaq.
Manami pitapis alabashaqtsu.
22 “Noqaqa manami imaypis manakaqkunapita pitapis alabashqätsu.
Alabaptïqa kamamaqnintsi Tayta Dios jinan hörachari castigamanman.