Proverbios
Alita rurapäkunanpaq yätsishqan
4 Wamrakuna, taytayki yätsishushqaykita shumaq chaskikäriy.
Tsayno chaskikurqa tantiyakuq runakunami kankipaq.
2 Alita ruranaykipaqmi qamkunata yachatsï.
Yachatsishqäta imaypis ama qonqapäkuytsu.
3 Noqapis taytäpa makinchömi winashqä.
Mamäpis kuyamarmi ashmamashqa.
4 Kuyamarmi papänï kayno nimarqan:
“Yätsishqäkunata imaypis yarparanki.
Nishqäkunata wiyakurqa alimi kawankipaq.
5 Tantiyakuq kayta imanöpapis ashiy.
Yachatsishqäkunata imaypis ama qonqaytsu.
6 Tantiyakuytaqa kuyanki.
Imaypis ama kacharinkitsu.
Tsaynöpami lutan ruraykunaman mana jatikankipaqtsu.
7 Tantiyakuq kanaykipaqqa imatapis kachariykur yachakuy.
8 Tantiyakuq kaptikiqa pïmaypis ali rikashushpayki respitashunkipaqmi.
9 Tantiyakuq karqa kuyaylapaq corönan jatishqanömi kankipaq”.
10 Yätsishqäkunata chaskikuy, hïju.
Chaskikurqa atska watami kawankipaq.
11 Noqa yachaykätsï shumaq tantiyakur ali kawanaykipaqmi.
Ali nänipa purinaykipaqmi yachaykätsï.*
12 Ali nänipa purirqa manami mana aliman chayankipaqtsu.
Cörrirpis manami tuninkipaqtsu.
13 Yachatsishqäkunata mana qonqaypa ruray.
Tsaykunata cäsukurqa ali kawaytami tarinkipaq.
14 Fiyu runakuna kawashqannöqa ama kawaytsu.
Paykuna jutsata ruraptinpis qamqa jutsata ama ruraytsu.
15 Paykuna rurashqankunata ama yachakuytsu.
16 Tsay runakuna jutsata mana rurarqa jamaytapis manami taripäkuntsu.
Pitapis jutsaman mana tunitsirqa punuytapis manami taripäkuntsu.
17 Yarqanaypanöraq y yakunaypanöraq jutsa rurayta munapäkun.
Paykunaqa imanöpapis runa mayinta atacaytami munan.
18 Alita ruraq runakuna kawashqanqa patsa waraptin atsikyashqannömi kaykan.
Patsa waraylanta mas atsikyashqannömi tsay runakunapis waranlan waranlan kuyaypaq munaypaq kawapäkun.
19 Jutsa ruraq runakuna kawashqanqa yanawyaykaq tsakaynömi kaykan.
Tsayno karmi jutsa rurashqantapis cuentata mana qokuntsu.*
20 Tantiyatsishqäkunata chaskikuy, hïju.
Nishqäkunata imaypis yarparay.
21 Yätsishqäkunata imaypis ama qonqaytsu.
Nishqäkunata umaykiman churakuy.
22 Nishqäkunata yachakuqkunaqa ali kawaytami tarinqapaq.
Qeshyananpa trukanqa sänumi kawanqapaq.
23 Shonquyki alita yarpaptinqa alimi kawankipaq.
Tsayno kaykaptinqa lutanta mana yarpänaykipaq shonquykita shumaq cuidakuy.
24 Runa mayikita ama tumpaytsu.
Imaypis ama lulakuytsu.
25 Jutsaman mana tuninaykipaq shumaq cuidakuy.
26 Imano kawaykashqaykitapis shumaq tantiyakuy.
Nänipita mana yeqaypa aywaqno imaypis alilata ruray.
27 Lutan ruraykunataqa ama ruraytsu.
Jutsa ruraypita witikuy.