Levítico
Wachakushqanpita imano purificakunanpaq nishqan
12 Mastapis Moisésta TAYTA DIOS kayno nirqan: 2 “Israel runakunata kayno niy: ‘Mayqan warmipis olqu wamrata wacharqa qanchis junaqyaqmi *impüru kanqa. Tsayno impüru kanqa killa qeshyanwan impüru kashqannömi. 3 Wamratanami yurishqanpita pusaq junaqniyuq kaykaptin *señalatsipäkunki.* 4 Tsaypitana kimsa chunka kimsa (33) junaqyaq maman purificakunqa yawarnin aywashqanpita. Tsayyaqqa manami imatapis sagrädu kaqta yatanqatsu ni *Sagrädu Toldu patiumanpis yaykunqatsu. 5 Warmi wamrata wacharqa killa qeshyan aywaptin impüru kashqanno ishkay semänami impüru kanqa. Yawarnin aywashqanpita soqta chunka soqta (66) junaqyaqmi purificakunqa.
6 “ ‘Olquta o warmita wacharpis purificakunanpaq kaq junaqkunata cumplirkur Tinkuna Toldu patiuman rupatsina sacrificiupaq juk watayuq carnishta apamunqa. Tsaynöpis purificatsina sacrificiupaq juk pushapa palumata karpis o juk kulkushta karpis apamunqa. Tsaykunata entreganqa cüratami. 7 Yawarnin aywashqanpita püruna warmi rikakunanpaqmi TAYTA DIOSPA nawpancho* tsay uywakunata rupatsinqa. Olquta wacharpis o warmita wacharpis tsaynölami ruranqa.
8 “ ‘Carnishta rantinanpaq qellaynin mana aypaptinqa ishkay kulkushta o ishkay pushapa palumata apamunqa.* Jukaqmi kanqa rupatsina sacrificiupaq y jukaqnami kanqa purificatsina sacrificiupaq. Tsayno apamuptinmi warmi purificashqa kananpaq TAYTA DIOSTA cüra manakunqa. Tsaynöpami tsay warmiqa püruna kanqa’ ”.