Levítico

Leprapita aliyar purificashqa kananpaq nishqan

14 Mastapis Moisésta TAYTA DIOS kayno nirqan: 2 “*Leprawan qeshyaykashqanpita aliyaq runakuna purificashqa kananpaq kayno ruranqa: Leprawan qeshyaq aliyarkur cüraman wilakatsinqa.* 3 Wilaptinmi campamentupita yarqur cüra aywanqa leprawan qeshyaykaq runa aliyashqanta o mana aliyashqantapis rikananpaq. Tsay runapa lepran aliyashqantana rikarqa 4 purificakunanpaq apatsimunqa ishkay *püru kaq pishqukunata, cedru qeruta, puka tëlata y *hisöpu jachata. 5 Jukaq pishquta wanurkatsir yawarninta jututsinqa pukyupita chaqamushqan yaku winaraykaq mitu mankaman. 6 Tsay yawarwan talushqa yakuman ushmatsinqa kawaykaq pishquta, cedru qeruta, puka tëlata y hisöpu jachata. 7 Nirkurna leprawan qeshyashqanpita aliyaq runata yawarwan qanchis kuti tsaqtsupanqa. Purificashqana kashqanta cüra wilaykurmi kawaykaq pishquta aywakunanpaq kacharinqa.

8 “Purificakurqa röpanta taqshakunqa, aqtsanta shapranta chipyaq rutukunqa y armakunqa. Tsaynöpami püruna rikakur campamentuman kutinqa. Kutiykurpis qanchis junaqyaq toldunman ama yaykutsuntsu. 9 Qanchis kaq junaqchöna seplaypa aqtsanta yapay rutukunqa. Tsaynöla shapranta, cëjasninta y cuerpuncho kaykaq lapan shaprantapis chipyaq rutukunqa. Tsaynöla röpantapis yapay taqshakurir armakunqa. Tsaykunata rurarraqmi purificashqa kanqapaq.

10 “Leprawan qeshyaykashqanpita aliyarkur pusaq kaq junaqchöqa ishkay sänu carnishta y juk watayuq sänu china uyshata sacrificiupaq cüraman apamunqa. Tsaynöla aceitiwan tsapurkur soqta kïlu pula alinnin harinata ofrendapaq apamunqa. Tsaynöpis mediu litrutano aceitita apamunqa. 11 Tsaypitanami purificashqa kananpaq kaq runata ofrendantawan Tinkuna Toldu patiuman cüra apanqa TAYTA DIOSPA nawpancho kananpaq. 12 Nirkurna apamushqan aceitita y juk carnishta TAYTA DIOSPA nawpancho joqarkur wakman kayman cüra kuyutsinqa consagratsina sacrificiu kananpaq. 13 Tsaypitanami uywata imaypis pishtashqan *sagrädu kaqcho tsay carnishta pishtanqa. Tsay carnishpa aytsan sagrädu kar purificatsina sacrificiupaq apamushqan uywapa aytsanno y consagratsina sacrificiupaq apamushqan uywapa aytsannömi cürapa derëchun kanqa.

14 “Nirkurna consagratsina sacrificiupaq pishtashqan carnishpa yawarninwan purificakuq runapa alawqa kaq rinrinta lushipanqa. Tsaynöla lushipanqa alawqa kaq makinpa maman dëdunta y alawqa kaq chakinpa maman dëduntapis. 15 Nirkurnami cüraqa kikinpa itsuq kaq maki paltanman ichikla aceitita winarkur 16 alawqa kaq dëdunta tsay aceitiman jatinqa. Tsaywanmi TAYTA DIOSPA nawpanman qanchis kuti tsaqtsupanqa.

17 “Makincho putsuq kaq aceitiwanmi purificakuq runata cüra lushipanqa alawqa kaq rinrinta y alawqa kaq makinpa y chakinpa maman dëdunta. Tsayno lushipanqa consagratsina sacrificiupaq pishtashqan carnishpa yawarninwan lushipashqan jananman. 18 Tsay aceitita purificakuq runapa umanmanpis lushipanqa. Tsayno ruranqa tsay runa TAYTA DIOSPA nawpancho püru kananpaqmi.

19 “Nirkurnami purificatsina sacrificiupaq apamushqan uyshatapis cüra pishtanqa tsay runa purificashqa kananpaq. Nirkurna rupatsina sacrificiupaq apamushqantapis pishtarkur 20 *altarcho rupatsinqa apamushqan harinatawan takurkatsir. Tsaykunatami cüra ruranqa tsay runa purificashqa kananpaq. Lapanta tsayno rurarkuptinraqmi purificashqa kanqa.

21 “Waktsa karqa consagratsina sacrificiupaq juk carnishta apamunqa. Tsaytami apamuq runa purificashqa kananpaq altar nawpancho joqarkur wakman kayman cüra kuyutsinqa. Tsaynöpis aceitiwan tsapushqa ishkay kïlu alinnin harinata y mediu litruno aceitita ofrendapaq apamunqa.

22 “Tsaynöpis aypäpakushqan tupuyla apamunqa ishkay kulkushta karpis o ishkay pushapa palumata karpis. Jukaq paluma kanqa purificatsina sacrificiupaq y jukaqna kanqa rupatsina sacrificiupaq. 23 Purificakushqanpita pusaq junaqtami tsaykunata Tinkuna Toldu patiuman apaykur TAYTA DIOSPA nawpancho kaykaq cürata entreganqa.

24 “Cürana consagratsina sacrificiupaq apamushqan carnishta y aceitita TAYTA DIOSPA nawpancho joqarkur wakman kayman kuyutsinqa. 25 Tsaypitanami tsay carnishta pishtanqa consagratsina sacrificiupaq. Yawarninta tsarirkurmi purificashqa kananpaq kaq runata lushipanqa alawqa kaq rinrinta y alawqa kaq makinpa y chakinpa maman dëdunta.

26 “Nirkurmi kikinpa itsuq kaq maki paltanman ichikla aceitita cüra winanqa. 27 Alawqa kaq dëdunta tsay aceitiman jatirkurmi TAYTA DIOSPA nawpanman qanchis kuti tsaqtsupanqa. 28 Tsaynöpis makincho kaykaq aceitiman dëdunta jatirkur purificakuq runata cüraqa lushipanqa alawqa kaq rinrinta y alawqa kaq makinpa y chakinpa maman dëdunta. Tsayno lushipanqa consagratsina sacrificiupaq pishtashqan carnishpa yawarninta lushipashqan janalanman. 29 Makincho putsuq kaq aceititana purificakuq runapa umanman lushipanqa. Tsayno ruranqa tsay runa TAYTA DIOSPA nawpancho purificashqa kanqapaqmi.

30 “Nirkur purificakuq runa apamushqan kulkushkunata karpis o pushapa palumakunata karpis altarcho cüra rupatsinqa. 31 Jukaq kanqa purificatsina sacrificiupaq y jukaqna kanqa rupatsina sacrificiupaq. Tsaykunata churanqa tsaki mikuyta apamushqan ofrenda jananman. TAYTA DIOSPA nawpancho cüra tsayno ruranqa tsay runa purificashqa kananpaq. 32 Leprawan qeshyaykashqanpita aliyarkur tsaynömi waktsakuna purificakärinqa”.

Mupalishqa wayikunata purificananpaq nishqan

33 Tsaypitanami Moisésta y Aarónta TAYTA DIOS kayno nirqan: 34 “Qamkunata qoykunäpaq kaq *Canaáncho taykaptiki mayqan wayipis mupaliptinqa 35 wayipa duëñunmi cüraman aywaykur kayno wilanqa: ‘Wayïmi mupaliykan’.

36 “Tsayno wilaptinmi wayicho kaykaqkuna imapis *impüru mana rikakunanpaq cüra ninqa tsay wayita jäkatsinanpaq. Nirkurnami cüraqa wayiman yaykunqa mupalishqan imano kashqantapis rikananpaq.

37 “Wayita rikapakuykashqancho mupalishqa verdiyaykaqta o pukayaykaqta tarirqa y perqa pasmaykaqta tarirqa 38 wayipita yarqurir qanchis junaqyaq cüra wichqaykunqa. 39 Qanchis junaq cumplirkuptin cüra yapay kutinqa wayita rikananpaq. Mupaliykaq miraykashqanta tarirqa 40 cüra ninqa mupalishqa kaq rumikunata jorqurir impüru sitiuman jitananpaq. Tsayqa kanqa markapita juk läduchömi. 41 Tsaynöla wayi rurintapis raspatsinqa. Nirkurna ninqa tsay raspashqan alpata markapita jorqurir impüru sitiuman jitananpaq. 42 Nirkurna jorqushqan rumikunapa trukan juk rumikunatana churarkur juk mituwanna rebucatsinqa.

43 “Tsayno raspaykaptinpis y rumita jitaykaptinpis y rebucaykaptinpis yapay mupaliptinqa 44 cüra yapay yaykunqa wayi imano kaykashqantapis rikananpaq. Wayi rurincho intërupana mupalishqa kaptinqa cüra ninqa tsay wayi impüru kashqanta. 45 Tsayno kaptinqa tsay wayita juchuratsir ruminkunatapis, qerunkunatapis y lapan alpantapis markapita jorqurir impüru sitiuman jitarinqa. 46 Manaraq juchutsiptin pipis tsay wichqaraykashqan kaq wayiman yaykurqa patsa tsakashqanyaqmi impüru kanqa. 47 Tsay wayicho pipis mikurqa o punurqa röpanta taqshakunqa.

48 “Wayiman cüra yaykur rebucashqanpita mupalishqan elqashqata rikarqa püruna tsay wayi kashqantami ninqa. 49 Wayi purificashqa kananpaq apatsimunqa ishkay pishqukunata, cedru qeruta, puka tëlata y *hisöpu jachata. 50 Juk pishquta wanurkatsir yawarninta jututsinqa pukyupita chaqamushqan yaku winaraykaq mitu mankaman. 51 Pishqupa yawarninman ushmatsinqa cedru qeruta, hisöputa, puka tëlata y kawaykaq pishquta. Tsay yawarwanmi wayitapis qanchis kuti tsaqtsunqa. 52 Tsaynömi wayita purificanqa pishqupa yawarninwan, pukyu yakuwan, kawaykaq pishquwan, cedru qeruwan, hisöpu jachawan y puka tëlawan. 53 Tsayno rurarkurnami kawaykaq pishquta markapita yarqurir kacharinqa aywakunanpaq. Tsaynöpami wayi purificashqana kanqa”.

54 Kay leykuna nishqannömi ruranqa pipis *leprawan qeshyar qeri ushaptin, 55 röpan mupalishqa kaptin, wayin mupalishqa kaptin, 56 jakapäkuywan qeshyaptin, pashtapäkuywan qeshyaptin y kancha yuriptin. 57 Kay leykunata cäsukurmi musyapäkunqa püru kashqanta o impüru kashqantapis. Kaykunami leprapaq leykuna kaykan.