Isaías
64 (63.19b) ¡Ima aliraq kanman jana patsata kicharir shamuptiki!
Shamuptikiqa jirkakunapis pasaypami siksikyanman.*
2 (1) Shatakunata nina rupar ushashqanno y manka timpushqannömi shamuptiki nacionkunapis siksikyanman.
Munayniyuq kashqaykitami contraykikunapis tantiyapäkunman.
3 (2) Unay urämushpaykipis fiyupa espantaypaq kaqkunatami rurarqayki.
Tsayno ruraptikimi jirkakunapis pasaypa siksikyarqan.
4 (3) Manami pipis mayashqatsu ni rikashqatsu qamno munayniyuq Dios kashqanta.
Qamman yärakamuqkuna raykumi mantsariypaq kaqkunata ruranki.*
5 (4) Munashqaykino kushishqa kawaqkunata yanapanki.
Tsayno kaptinpis noqakunaqa manami munashqaykinötsu kawarkaykä.
Unaypita patsa kananyaqpis jutsa ruraylacho kawapäkuptïmi fiyupa rabyakushqanki.
Tsaynöla kawarqa ¿imanöparaq salvakärïman?
6 (5) Noqakunaqa qanrano melanaypaqmi karkaykä.
Alita rurashqäkunapis warmipa killa qeshyanwan qanratashqa ratashnömi karkaykan.
Lapanïpis qarwashtaykälar yörapa rapran ushakaqnömi ushakarkaykä.
Imaykatapis wayra apaqnömi mana ali yarpaynïkuna jutsa rurayman aparkaykäman.
7 (6) Manami pipis qamta manakamushunkitsu ni qamman yärakamuntsu.
Tsaymi noqakunapita *pakakushqanki.
Jutsa ruraycho kawapäkuptïmi kachariykamashqanki.
8 (7) TAYTA DIOS, imano kaptïpis qammi noqakunapa Taytä kaykanki.
Noqakunaqa mitunömi kaykä.
Qamnami manka ruraqno kaykanki.
Lapanïpis makiki rurashqalanmi karkaykä.*
9 (8) TAYTA DIOS, tsayjinanpa amana rabyakuynatsu.
Jutsa rurashqäkunatapis amana yarparaynatsu.
Kuyashqayki runakuna kaykaptïqa kuyapaykalämay.
10 (9) Santu markaykikunatapis lapantami ushakätsishqa.
*Sión jirkanta ushakätsiptin Jerusalén markapis raqälanami rikakushqa.
11 (10) Unay aylükuna adorashushqayki kuyaylapaq templuykitapis chipyaqmi rupatsishqa.
Wakin kuyaylapaq kaqkunatapis lapantami ushakätsishqa.
12 (11) TAYTA DIOS, tsayno rurashqanta rikar ¿manatsuraq paykunata castiganki?
¿Manatsuraq yanapamankiman?
¡Imayyaqraq tsaynöla castigamanki!