Lucas
Mana ajayaypa Tayta Diosta manakunantsipaq Jesús yachatsishqan
18 Imaypis mana ajayaypa Tayta Diosta manakärinanpaq discïpulunkunata Jesús imamanpis tinkutsiypa yachatsirmi 2 kayno nirqan: “Juk markachöshi Tayta Diosta mana *mantsakuq ni runakunatapis mana respitaq juez karqan. 3 Tsay markachöshi tarqan juk viüda warmipis. Payshi tsay juezman yaparir yaparir aywar kayno nirqan: ‘Quejakushqäta arreglaykalämay, tayta juez’. 4 Tsayno aywaptinpis juezqa manashi cäsurqantsu. Nirkurnashi kayno nir yarpachakurqan: ‘Diosta mana mantsakurpis ni runakunata mana respitarpis 5 kay warmi quejakamashqanta jukla arreglaykushaq. Mana arreglaptïqa umäta nanätsirmi imay hörapis kutiykämunqa’ ”.
6 Tsayno wilaparkurmi Señor Jesucristo kayno nirqan: “Mana ali juez imata nishqantapis shumaq tantiyakäriy. 7 ¿Manatsuraq Tayta Diospis akrashqankunata yanapanqa paqasta junaqta manakurkaykaptinqa? Mana shuyarätsiylapami yanapanqa. 8 Noqa kaynömi nï: Manakuq kaqtaqa Tayta Dios mana shuyarätsiylapami yanapanqa. Tsayno kaptinpis *Runapa Tsurin kay patsaman kutimur ¿tarinqatsuraq pilapis Tayta Diosman yärakuykaqta?”
Fariseuman y impuestu cobraqman Jesús tinkutsishqan
9 Runa mayinta manakaqman churaq runakunapaqmi Jesús tinkutsiypa wilaparqan kayno nir: 10 “Ishkay runashi aywarqan templuman Diosta manakunanpaq. Jukaqshi karqan *fariseo y jukaqnashi karqan impuestu cobraq. 11 Tsayshi fariseuqa ichirkur Tayta Diosta manakurqan kayno nir: ‘Tayta Dios, qamta agradëcikü wakin runakunano mana kashqäpitami. Paykunaqa karkaykan suwa, jutsasapa y majanta jarukuqmi. Noqaqa manami taqay impuestu cobraq runanötsu kaykä. 12 Ayunäpis semänacho ishkay kutimi. Tsaynölami lapan gänashqäpita imaypis templuman diezmüta apä’.
13 “Impuestu cobraq kaqnashi itsanqa karulacho ichikuykur jana patsaman rikäriylapis rikärirqantsu. Tsaypa trukanqa pasaypa lakikurshi makinta choqpakurkur kayno nirqan: ‘Kuyapaykalämay, Tayta Dios. Noqaqa jutsasapa runami kaykä’.
14 “Noqa kaynömi nï: Impuestu cobraq runami jutsanpita perdonashqana wayinman kutirqan. Fariseo kaqtami itsanqa Tayta Dios mana perdonarqantsu. Orgullösu kaqkunaqa penqayman churashqami kanqa. Humildi kaqkunami itsanqa aliman churashqa kanqa”.
Wamrakunapaq Jesús manakushqan
Mateo 19.13-15; Marcos 10.13-16
15 Tsaypitanami wamrakunata Jesús kaqman apapäkurqan umankunata yataykur Tayta Diosta manakunanpaq. Tsayta rikarmi discïpulunkuna michäpäkurqan. 16 Tsawraqa wamrakunata qayaykur discïpulunkunata Jesús kayno nirqan: “Wamrakunata apakamunanta ama michäpäkuytsu. Wamrano kaqkunapaqmi Tayta Dios *mandaykashqan kaykan. 17 Rasunpami kayno nï: Pipis Tayta Dios mandaykashqanta wamrano mana chaskikurqa manami pay mandaykashqanman yaykunqatsu”.
Rïcu runa sasataraq salvakunanpaq kashqan
Mateo 19.16-30; Marcos 10.17-31
18 Juk mandaq runami Jesústa kayno nirqan: “*Rabí, ali runami kanki. ¿Imatataq ruräman *mana ushakaq kawayta tarinäpaq?”
19 Tsawraqa Jesús kayno nirqan: “¿Imanirtaq ali runa kashqäta nimanki? Tayta Dioslami aliqa. 20 Musyankimi mandamientukuna kayno nishqanta: ‘Majaykita ama jarukunkitsu.* Runa mayikita ama wanutsinkitsu.* Ama suwakunkitsu.* Manakaqtaqa pitapis ama tumpankitsu.* Mamaykita y taytaykita respitanki*’ ”.
21 Tsayno niptinmi tsay runa kayno nirqan: “Tsaykunataqa wamra kashqäpita patsami lapanta cumplishqä”.
22 Tsawraqa Jesús kayno nirqan: “Pishiykanraqmi cumplinaykipaq. Lapan imaykaykikunatapis rantikuykur tsay qellayta waktsakunata qoykuy. Tsayno ruraptikiqa jana patsachömi riquëzayki kanqa. Nirkur qatirämay”.
23 Tsayno niykuptinmi pasaypa rïcu kar tsay runa lakikurqan. 24 Lakishqa kaykaqta rikarmi Jesús kayno nirqan: “¡Pasaypa sasami kaykan rïcu runakuna Tayta Dios *mandaykashqanman yaykunanpaq! 25 Rïcu runa Tayta Dios mandaykashqanman yaykushqanpitaqa mas raslami *camëllupis awjapa uchkunpa ushturinman”.
26 Tsayno niqta mayaqkunami Jesústa tapupäkurqan: “Tsayno kaptinqa ¿piraq salvakunqa?”
27 Niptin Jesús kayno nirqan: “Runakunapaq sasa karpis Tayta Diospaqqa manami sasatsu”.
28 Tsawraqa Pedro kayno nirqan: “Noqakunaqa lapan imaykäkunatapis kachaykurmi qamta qatirpaykä, tayta”.
29 Tsayno niptin Jesús kayno nirqan: “Rasunpami kayno nï: Pipis wayinta, mamanta, taytanta, wawqinkunata, paninkunata, warminta o tsurinkunata Tayta Dios mandaykashqan rayku kacharirqa 30 kay vïdacho mas atskatami chaskinqa. Tsaynölami juk vïdachöpis mana ushakaq kawayta tarinqa”.
Wanutsipäkunanpaq kashqanta Jesús yapay wilakushqan
Mateo 20.17-19; Marcos 10.32-34
31 Chunka ishkay discïpulunkunata qayaykurmi Jesús kayno nirqan: “Jerusalénman chayanantsipaq walkalanami pishiykan. Tsaychömi profëtakuna qelqashqannöla *Runapa Tsurinta lapanpis pasanqa. 32 Mana Israel autoridäkunapa makinmanmi churapäkunqa. Paykunami asipanqa, ashlinqa y toqapanqa. 33 Astarkurmi wanutsipäkunqa. Tsayno kaptinpis kimsa junaqtaqa kawarimunqami”.
34 Tsayno niptin discïpulunkuna manami tantiyapäkurqantsu imapita parlaykashqantapis.
Jericó markacho qaprata aliyätsishqan
Mateo 20.29-34; Marcos 10.46-52
35 Tsaypita Jericó markaman Jesús yaykuykaptinnami juk qapra runa limushnata manakur nänicho jamaraykarqan. 36 Atska runakuna aywarkaykaqta mayashpanmi ima pasaykashqantapis tapukurqan.
37 Tsaymi wilapäkurqan kayno nir: “Nazaretpita kaq Jesúsmi pasaykan”.
38 Tsayno niptinmi qayakur kayno nirqan: “¡*Davidpa Tsurin* Jesús, kuyapaykalämay!”
39 Tsayno niptinmi puntanta aywaykaq runakuna olqüparqan upälakunanpaq. Olqüpaptinpis masraqmi qayakur kayno nirqan: “¡Davidpa Tsurin, kuyapaykalämay!”
40 Tsaymi Jesús ichiykur tsay qaprata qayatsirqan. Nawpanman chayaykatsiptinna kayno tapurqan: 41 “¿Imacho yanapanätataq munaykanki?”
Tsawraqa qapra kayno nirqan: “¡Nawïta aliyaykatsilämay, tayta!”
42 Niptinmi Jesús kayno nirqan: “¡Rikayna! Yärakamashqaykipitami nawiki rikanqa”.
43 Tsayno niptinmi jinan höra nawin aliyarkuptin Tayta Diosta alabaraykar Jesúspa qepanpa aywarqan. Tsayta rikaykurmi lapan runakuna Tayta Diosta alabapäkurqan.