1 Timoteo
Timoteuman apóstol Pablo punta kaq cartata apatsishqan
Carta qalaykunan
1 Noqa Pablumi Jesucristupa *apostolnin kä. Apostolnin kanäpaqmi salvakuq Tayta Dios y yärakushqantsi Señor Jesucristo churamashqa. 2 Timoteo*, Jesucristuman yärakur kuyay tsurïno kaptikimi kay cartata apaykätsimü. Papänintsi Tayta Dios y Señor Jesucristo kuyapäshushpayki ali kawanaykipaq yanapaykuläshunki.
Lutan yachatsikuqkunata michänanpaq yätsishqan
3 Macedonia provinciaman aywarmi Éfeso markacho qamta kachaykamurqä lutan yachatsikuqkunata michänaykipaq. 4 Tsay lutan yachatsikuqkunaqa kikinkunapa yarpaylanta yachatsirmi unay imanöpis kashqanta y unay aylunkuna pï kashqalanta yacharkaykätsin. Tsayno yachatsipäkuptinmi Tayta Diosman yärakärinanpa trukan manakaqkunapita rimanakular kawarkaykan.
5 Tsay lutan yachatsikuqkunata michänaykipaq niykä wawqi panikuna rimanakunanpa trukan kuyanakärinanpaqmi. Tsayno kuyanakunanpaqqa jutsata mana ruraypa alilata rurar kawapäkutsun y lapan shonqunwan Tayta Diosman yärakäritsun.
6 Tsay lutan yachatsikuqkunaqa kuyanakunanpa trukan manakaqkunapita rimanakularmi kawapäkun. 7 Paykunaqa Tayta Diospa leyninkunata ali yachaq kashqanta nirkaykarpis senqan maycho kashqantapis manami musyapäkuntsu.
8 Musyantsimi Tayta Dios munashqanno kawananpaq yachatsiptintsiqa leyninkuna ali kashqanta. 9 Manami jutsaynaq runakunapaqtsu leyninkunata Tayta Dios kamariparqan, sinöqa jutsa ruraqkunapaqmi. Tsaymi leyninkuna kaykan mana cäsukuqkunapaq, fiyu runakunapaq, jutsasapakunapaq, Tayta Diosta manakaqman churaqkunapaq, mamanta y taytanta maqaqkunapaq y runa mayinta wanutsiqkunapaq. 10 Tsaynöpis kaykan majanta jarukuqkunapaq, olqupura kakuqkunapaq, warmipura kakuqkunapaq, runa mayinta rantikuqkunapaq, lulakuqkunapaq, manakaqta jitapar runa mayinpa contran sharkuqkunapaq y ali yachatsikuyta mana cäsukur jutsata ruraqkunapaqmi. 11 Tsayno niykan alabashqa Tayta Diospa ali wilakuyninchömi. Tsay wilakuyninta wilakunäpaqmi Tayta Dios kachamashqa.
Pabluta Tayta Dios kuyashqan
12 Señornintsi Jesucristutami agradëcikü wilakuyninta wilakunäpaq yanapamashqanpita. Tsaynöpis agradëcikü yärakamashpan wilakuyninta wilakur purinäpaq churamashqanpitami. 13 Nawpataqa Jesucristuta manakaqman churarmi payman yärakuqkunata ashi ashiykur carcilman wichqatsirqä.* Mana musyar tsayno rurashqa kaptïpis kuyapämarmi Tayta Dios perdonamashqa. 14 Perdonarkamarmi tantiyatsimashqa Jesucristuman yärakur pïmaytapis kuyanäpaq.
15 Jutsasapa runakunata salvananpaqmi kay patsaman Jesucristo shamushqa. Rasun kaqta niykaptïqa pïmaypis criyipäkutsun. Noqalätapis lapan runakunapita mas jutsayuq kaykaptïmi 16 kuyapämar salvamashqa. Tsayno salvamarqan Jesucristo perdonakuq kashqanta wakin runakunapis tantiyakur payman yärakunanpaq y *mana ushakaq kawayta taripäkunanpaqmi. 17 ¡Tayta Diosmi imayyaqpis munayniyuq rey, imayyaqpis kawaq y mana rikakaq kaykan! Pay japalanmi Dios kaykan. [Manami pipis payno yachaq kantsu.] ¡Imayyaqpis alabashqa kaykulätsun! ¡Amén!
Jesucristupa wilakuyninta imaypis wilakunanpaq yätsishqan
18 Kuyay tsurï Timoteo, Tayta Diospa jutincho wawqikuna nishushqaykinölami noqapis qamta kayno nï: Ali chölu soldädu mana mantsakuypa pelyashqanno qampis mana mantsakuypa Jesucristupa wilakuyninta wilakuy. 19 Tsayno wilakushpayki Jesucristuman yärakur Tayta Dios munashqanno imaypis kaway.
Wakin runakunaqa Tayta Dios munashqanno manana kawarmi Jesucristuman mana yärakunnatsu. 20 Tsaynölami Alejandro y Himeneupis qepaman kutikärishqa. Paykunatami *Satanáspa makinman churaykushqä. Tsaynöpa capazchari tantiyakärishpan lutanta yachaykätsishqanta kacharir Jesucristuman yapay yärakärinmanpis.