Eclesiastés
Tayta Diosta promitishqantsita cumplinantsipaq yätsishqan
5 (4.17) Tayta Diospa wayinman aywar shumaq yarpachakunki tsaycho yachakushqaykita cäsukunaykipaq. Mana tantiyakuq runakunanöqa ama kankitsu. Paykunaqa sacrificiuta aparpis Tayta Diosta manami cäsukärintsu. Mana tantiyakuypami jutsatapis rurapäkun.
2 (1) Lutalaqa Tayta Diosta imatapis ama promitinkitsu. Ni yarpaynilaykichöpis mana cumplinaykipaq kaqtaqa ama promitinkitsu. Payqa jana patsachömi kaykan y qamqa kay patsalachömi kaykanki. Tsayno kaykaptinqa mejor upälakuy.
3 (2) Aläpa yarpachakuqkuna mana alitami sueñupäkun.
Tsaynölami aläpa parlaqkunapis manakaqkunata riman.*
4 (3) Mana tantiyakuq runaqa lutala promitirmi Tayta Diosta rabyanätsin. Tsayno kaptinqa Tayta Diosta imata promitishqaykitapis mana qonqaypa cumplinki.* 5 (4) Mana cumplinaykipaq kaptinqa ama imatapis promitinkitsu.
6 (5) Cuidädu Tayta Diosta imatapis lutala promitirkur cürapa nawpancho kayno niykankiman: “Mana tantiyakuypami promitishqä. Tsaymi cumpliyta mana kamäpakütsu”.
Tsayno nir Tayta Diosta rabyanätsiptikiqa castigashunkipaqmi.
7 (6) Runaqa munashqanta chaskinan kashqami aläpa rimar lutala imatapis promitin. Qamqa Tayta Diosta *mantsakur tsayno ama kaytsu.
Mana ali autoridäkuna kashqan
8 (7) Maytsaychöpis waktsakunata fiyupa nakaykätsiqta rikar o fiyu autoridäkunata rikar ama mantsakaytsu. Autoridäkuna tsayno lutanta rurapäkun mas munayniyuq kaq autoridäkuna favornin sharkuptinmi. Y munayniyuq autoridäkunapapis mas mandaq autoridäkunami favornin sharkun. 9 (8) Autoridäkuna tsayno tsapänakuptin ¿markantsikuna mejoraykantsuraq? Tsaynöpis ¿chakra runakunata rey yanapaykantsuraq?
Tsayjina arur tarishqantsi ushakaqla kashqan
10 (9) Qellaypaq codiciösu kaqkunaqa tarirpis manami contentakuntsu. Rïcukunaqa mas rïcuyarpis manami contentakuntsu. Tsayno kashqanpis manakaqlapaqmi kaykan.
11 (10) Imaykantsikunapis mas atska kaptinqa masmi imaykachöpis gastantsi. Nistashqantsipita masta tsarararpis manami ima provëchutapis jorquntsitsu, sinöqa churaräkunalanpaqmi kaykan.
12 (11) Arukuq runaqa walkata o atskata mikurpis kushishqami punun. Rïcu runami itsanqa imaykanpaqpis yarpachakur punuytapis mana tarintsu.
13 (12) Kay patsacho rikashqä rïcu runa imaykata shuntashqanpis afanlanpaq kashqantami. Tsayqa fiyupa lakikuypaqmi kaykan. 14 (13) Tsay runaqa mana ali negociuman jatikarmi lapan imaykantapis ushan. Tsaymi tsurinta kachapänanpaq imalanpis mana kantsu.
15 (14) Kay patsaman jinayla shamushqantsinömi jinayla aywakushunpaq. Aywakurqa ima shuntashqantsitapis manami apashuntsu.* 16 (15) Tsayno kaykaptinqa ¿imapaqtaq välin tsayjina nakar arushqantsipis? Tsayqa lakikuypaqmi kaykan. 17 (16) Tsay jananmanpis kawashqantsiyaqqa lakikushpantsi fiyupa yarpachakur, nanätsikur y jaqayashqa kawantsi.
18 (17) Tsayno kaptinqa noqapa tantiyaynïpita mikushun, upushun y tsayjina nakar tarishqantsikunata kushishqa gastashun. Tsayno kawashqantsimi päguntsi kaykan. 19 (18) Tsawraqa Tayta Dios kamaripämashqantsita mikur upur kushishqa kawashun. Tsayno kushishqa kawashqantsimi Tayta Diospa bendicionnin kaykan. 20 (19) Kushishqa kawanantsipaq Tayta Dios yanapaykämaptintsiqa manami yarpachakuntsitsu imayyaq kawanantsipaq kashqantapis.