Eclesiastés
12 Mözu kashqaykiyaq kamamaqnintsi Tayta Dios munashqanno kawanaykipaq yarpachakuy. Awkinyarnaqa manami payta shumaq sirvinkipaqnatsu. Kawarpis lakikularnami kawankipaq. 2 Tsayno kaptinqa intita, killata, qoylarkunata y ima atsikyaqtapis rikayta puëdishqaykiyaq y nawikipis manaraq tsakashqanyaq Tayta Diosta sirviy.
3 Awkinyaptikiqa lapan cuerpuykimi siksikyanqa.
Chankaykikunapis mukmukyanqami.
Kiruykipis ushakanqami.
Nawikipis tsakanqanami.
4 Cällicho büllata ruraptinpis manami mayankipaqnatsu.
Mulinu qaparashqantapis manami wiyankipaqnatsu.
Pishqukuna cantashqantapis manami mayankipaqnatsu.
5 Witsaypa aywaytapis mantsankipaqnami.
Nänipa aywarpis tuninkipaqmi.
Almendru jachapa waytannöraqmi aqtsaykipis soquyanqa.
Chuklus purishqannömi purinkipaq.
Majaykitapis manami munapankipaqnatsu.
Wanurnaqa imaypis mana kutimuqnami aywakunkipaq.
Cällichömi juntakanqa waqaraykar pampaq apashunaykipaqpis.
6 Tsayno kaptinqa Tayta Diosta sirvinki qellay walqayki manaraq rachishqanyaq,
qori mankayki manaraq pakishqanyaq,
puyñuyki pözu kuchuncho manaraq pakishqanyaq
y pözupita yakuta jorqunaykipaq waska manaraq rachikashqanyaq.*
7 Alpalapita rurashqa karmi cuerpuntsi yapay alpaman tikranqa.
Tayta Dios qomashqantsi almantsimi itsanqa pay kaqman kutinqapaq.
8 Noqa yachatsikuqmi kayno nï:
“¡Imaykapis ushakaqlami kaykan!
¡Kay patsacho pasashqankuna imanir y imapaq kashqantapis manami tantiyayta kamäpakuntsitsu!”
Libru ushanan
9 Kay libruta qelqaq runaqa waranlan waranlan mas tantiyakuq rikakurmi runakunata yachashqanman tupu yachatsirqan. Runakuna wilapashqan proverbiukunata* shuntarkurmi atskata qelqarqan. Tsaynölami atska proverbiukunata kikinpa yarpaynilanpita qelqarqan. 10 Palabrakunata shumaq kamakätsirmi lapanta qelqarqan. Tsay qelqashqankunaqa lapanpis rasun kaqlami kaykan.
11 Picano y shumaq jawishqa estäcanömi tantiyakuqkuna yätsishqankunaqa kaykan. Tsayno yätsikuq kananpaq Tayta Diosmi tantiyatsin. Payqa ali mitsikuqmi kaykan.
12 Juk libruta liyir cuidädu kaycho qelqaraykashqanpita mas juk yachatsikuyta chaskinkiman, hïju. Runakunaqa tsaytsika librukunatami qelqapäkun. Tsaynölami aläpa yachakuypis utikätsikun.
13 Kay lapan yachatsikuyta mayar tantiyakunki Tayta Diosta *mantsakur mandamientunkunata cumplinaykipaq. Tsaypaqmi kay patsacho runa kawan.
14 Tayta Diosqa imanöpis kawashqantsiman tupumi juzgamäshun. Pakaylapa rurashqantsipitapis juzgamäshunpaqmi.