1 Samuel
Rey kananpaq Davidta akrashqan
16 Tsaypitana Samuelta TAYTA DIOS kayno nirqan: “¿Imayyaqtaq Saúlpaq lakikushpayki waqaykanki? Payqa manami Israel runakunapa mandaqnin reynatsu kanqa. Waqanaykipa trukanqa carnipa waqranwan aceitita apakurkur ayway Beléncho kaykaq Isaíman*. Paypa juk tsurintami akrashqä rey kananpaq”.
2 Tsayno niptinmi Samuel kayno nirqan: “¡Kananqa! ¿Imataraq ruraykuläshaq? ¡Juk reyta churanäpaq aywashqäta musyaykurqa Saúl wanutsimanqachari!”
Tsayno niptinmi TAYTA DIOS kayno nirqan: “Juk ternërata qatikurkur ayway. Pipis tapushuptiki kayno ninki: ‘Tayta Diospaq sacrificiuta rupatsiqmi aywaykä’. 3 Chayaykurna Isaíta pushanki sacrificiuta rupatsinaykipaq kashqanman. Tsaychönami rikatsishayki rey kananpaq mayqan tsurinta akrashqätapis. Paypa umanman aceitita winapanki”.
4 Tsaymi TAYTA DIOS nishqannöla Belén markaman Samuel aywarqan. Chayaykaptinnami mayor runakuna markapita yarqamurqan chaskikärinanpaq. Paywan tinkurmi mantsakashqa tapupäkurqan kayno nir: “¿Imataq kashqa kayman shamunaykipaq, tayta?”
5 Tsayno niptinmi Samuel kayno nirqan: “TAYTA DIOSTA adoraqmi shamushqä. Qamkunapis purificakurir shapäkamuy sacrificiuta rupatsinantsipaq”.
Tsayno nirkushpanmi Isaíta y tsurinkunata yakuwan purificarir sacrificiuta rupaykätsishqanman qayatsirqan.
6 Chayaptinnami Isaípa tsurin Eliabta rikashpan shonqulancho Samuel kayno nirqan: “Paytami Tayta Dios akrashqa kanqa rey kananpaq”.
7 Tsaymi TAYTA DIOS kayno nirqan: “Kuyaylapaq kashqanpita y jatun kashqanpita akrashqäta ama yarpaytsu. Manami paytatsu akrashqä. Kuyaylapaq kashqanpita ali runa kashqanta runa yarpaptinpis noqaqa manami kuyaylapaq kashqanpitatsu pitapis akrä, sinöqa ali shonquyuq kashqanpitami”.
8 Tsaypita Isaí pusharqan tsurin Abinadabta Samuelpa nawpanman. Payta rikaykur Samuel kayno nirqan: “Paytapis TAYTA DIOS manami akrashqatsu”.
9 Tsayno niptinmi Isaí pusharqan tsurin Samata. Tsaymi Samuel nirqan: “Paytapis manami TAYTA DIOS akrashqatsu”.
10 Tsaynölami Isaí pusharqan qanchis tsurinkunata. Paykunata rikaykurpis Samuel kaynömi nirqan: “Pushamushqayki tsurikikunata manami mayqantapis TAYTA DIOS akrashqatsu”.
11 Tsawraqa Samuel tapurqan kayno nir: “¿Tsaylaku lapan tsurikikuna?”
Tsayno tapuptin Isaí kayno nirqan: “Nunush tsurilänami uyshata mitsikaykämun, tayta”.
Tsaymi Samuel kayno nirqan: “Payta jukla qayatsimuy. Pay manaraq chayamuptinqa manami mikushunraqtsu”.
12 Niptinmi nunush tsurin Davidta Isaí qayatsirqan. Tsay mözuqa karqan kuyaylapaq kamaraqlami. Chayaykuptinmi Samuelta TAYTA DIOS kayno nirqan: “Paytami akrashqä. Rey kananpaq umanman aceitita winapay”.
13 Tsayno niptinmi rey kananpaq wawqinkunapa nawpancho Davidpa umanman aceitita Samuel winaparqan. Tsaypita patsami TAYTA DIOSPA Espïritun Davidta shumaq yanaparqan. Nirkurnami Samuelqa Ramá markaman kutikurqan.
Arpata David tukashqan
14 Tsay witsan TAYTA DIOSPA Espïritun Saúlpita yarqushqanami karqan. Tsaymi juk *supayta TAYTA DIOS kachaptin Saúlqa pasaypa löcutar purirqan. 15 Tsaymi yanapaqnin runakuna Saúlta kayno nirqan: “Tayta Dios kachamushqan supaymi löcutaykätsishunki, tayta. 16 ¿Aliku kanman pilatapis arpa tukaqta ashimuptï? Tayta Dios kachamushqan supay löcutaykätsishuptiki paymi tukapäshunkipaq. Tsaynöpami löcutaykashqaykipita aliyankipaq”.
17 Tsawraqa yanapaqnin runakunata Saúl kayno nirqan: “Tsayno kaptinqa jukla aywapäkuy ali tukaqta pushamunaykipaq”.
18 Tsayno niptinmi juk yanapaqnin kayno nirqan: “Belén markacho Isaípa tsurintami rikashqä arpata shumaq tukaykaqta. Tsaynöpis tsay mözuqa pelyaytapis manami mantsakuntsu. Imatapis lutala mana parlantsu y kamaraqlami kaykan. Paytaqa TAYTA DIOSMI shumaq yanapan”.
19 Tsayno niptinmi Saúlqa Isaíman kacharqan kayno ninanpaq: “Uysha mitsiq tsuriki Davidta kachaykalämuy”.
20 Tsawraqa Isaí tsurin Davidta Saúl kaqman kacharqan cabrata janchaparkur, vïnu puritsikuna qaraman vïnuta winaparkur y tantata bürruman cargaparkur. 21 Tsaynöpami Saúl kaqman David chayaykur mandashqanta rurarqan.
Tsaypitanami Davidta kuyashpan arman puritsiq kananpaq Saúl churarqan. 22 Tsaymi Saúl kacharqan Isaíta kayno ninanpaq: “Tsuriki Davidqa kuyatsikuq mözushi. Tsayshi ruwakushunki kachapaykunaykipaq”.
23 Tsaynöpis Tayta Dios kachamushqan supay Saúlta löcutätsiptinmi arpanta David tukapaq. Tukapaptinqa Saúl aliyarkuqmi.