Salmos
Kuyashqan runakunata Tayta Dios ali rikashqan
(1a) Asaf qelqashqan salmumi.
78 (1b) Marka mayikuna, yachatsishqäta shumaq chaskikäriy.
Wilapaptï shumaq mayapäkamay.
2 Imamanpis tinkutsiypami tantiyatsishayki.
Unay pasashqankunata musyanaykipaqmi wilapäshayki.*
3 Tsaykunata musyantsi awkiluntsikuna wilapämashqa kaptinmi.
4 Tsaykunataqa wamrantsikunata wilapäshun.
TAYTA DIOS munayniyuq kashqanta musyatsishun.
Munayninwan mantsariypaq rurashqankunata wilapäshun.
5 Jacobpita miraqkunatami Tayta Dios leyninkunata musyatsirqan.
Tsay leykunachömi tantiyatsirqan Israel runakuna imanöpis kawapäkunanpaq.
Paykunatami nirqan wamrankunata yachatsipäkunanpaq.
6 Tsaynöpami qepa yuriqkunapis musyapäkunqa.
Tsay qepa yuriqkunapis wamrankunatami yachatsipäkunqa.*
7 Noqantsipis tsayno yachatsiptintsimi wamrantsikuna Tayta Diosman yärakärinqa.
Tayta Dios yanapashqankunatapis manami qonqanqatsu.
Paypa mandamientunkunatapis lapantami cumplipäkunqa.
8 Unay ayluntsikunano mana cäsukuq y mana wiyakuq manami kanqatsu.
Unay ayluntsikunaqa mana wiyakuq chukru shonqumi karqan.
Paykunaqa puyñu rinrimi karqan.
Tsayno karmi Tayta Dioswan *pactu rurashqantapis mana cumplipäkurqantsu.
9 Efraín trïbu runakunaqa flëchayta yachaq soldädukunami karqan.
Tsayno kaykarpis guërrapita qeshpirmi aywakärirqan.
10 Tayta Dioswan pactu rurashqantapis manami cumplipäkurqantsu.
Yachatsishqantapis manami chaskikärirqantsu.
11 Tayta Dios yanapashqantapis qonqaykärirqanmi.
Espantaypaq milagru rurashqantapis pasaypami qonqaykärirqan.
12 Unay ayluntsikuna rikaykaptinmi espantaypaq kaqkunata Tayta Dios rurarqan.
Tsayno rurarqan Egiptucho kaykaq Zoán partichömi.*
13 Lamarta ishkayman rakirkurmi chawpinpa paykunata pasatsimurqan.
Pasamunanpaqmi lamar yakuta ishkayman rakishpan tapiatano ichirätsirqan.*
14 Junaqpami pukutaywan pusharqan.
Tsakaypanami rupaykaq ninawan pusharqan.*
15 Chunyaq tsaki jirkachömi qaqatapis shilikätsirqan.
Upupäkunanpaqmi atska yakuta pashtatsimurqan.
16 Qaqapita pashtatsimuptinmi mayunöraq yaku aywarqan.*
17 Tsayno yanapaykaptinpis paykunaqa Tayta Diospa contranmi sharkurqan.
Chunyaq jirkachömi poderniyuq Tayta Diosta rabyanätsirqan.
18 Munashqalanta mikuyta munarmi kikinkuna munashqanta Tayta Diosta ruratsiyta munapäkurqan.
19 Tayta Diospa contranmi rimapäkurqan kayno nir:
“Kay chunyaq jirkachöqa ¿maypitataq mikuyta kamaripämäshun?
20 Musyantsimi Tayta Dios qaqata shilikätsiptin mayunöraq yaku yarqamushqanta.
Tsayno rurarpis ¿maypitataq mikuyta kamaripämäshun?
Aytsatapis ¿maypitataq kamaripämäshun?”
21 Tsayno rimashqanta mayaykurmi TAYTA DIOS pasaypa rabyakurqan.
Jacobpita miraq runakunapaqmi pasaypa rabyakurqan.
22 Paykunaqa Tayta Diosman manami yärakärirqantsu.
Yanapananpaq kashqantapis manami criyipäkurqantsu.
23 Tsayno kaykaptinpis Tayta Diosqa paykunamanmi pukutayta kachamurqan.
Ciëlu punkutapis kikinmi kicharqan.
24 Kuyashqan runakunapaqmi tamyatano *manáta shikwatsimurqan.
Tsayqa jana patsapita shikwamuq mikuymi karqan.
25 *Angilkuna mikushqan tantata mikupäkurqan.
Saksashqanyaq mikunanpaqmi Tayta Dios mikuyta kamaripämurqan.*
26 Tsaynölami inti jeqamunan kaq lädupita y sur kaq lädupita wayrata wayrätsimurqan.
27 Tsay wayrawanmi codornizkunata chayatsirqan.
Tsaynöpami lamar kuchuncho aquyshanöraq tsaytsika aytsa karqan.
28 Tsay codornizkunatami Tayta Dios chayatsirqan runakuna tarkaykashqan campamentuman.
Toldunkuna nawpanmanmi juntaqpaq chayatsirqan.
29 Tsaymi pasaypa melanashqanyaq mikupäkurqan.
Tsaynömi manakärishqanta Tayta Dios kamariparqan.
30 Wakintaqa pachan manaraq saksaptinmi y aytsata tsayraq kachuykaptinmi 31 Tayta Dios rabyakushpan ushakätsirqan.
Mas kalpayuq kaq runakunatami wanuratsirqan.
Israel runakunacho mas ali chölu kaq runakunatami ushakätsirqan.*
32 Tsayta rikaykarpis kashqalanmi jutsata rurapäkurqan.
Milagrukunata rurashqanta rikaykarpis manami Tayta Diosman yärakärirqantsu.
33 Tsaymi Tayta Dios paykunata jämaytanöla desgraciawan ushakätsirqan.
34 Wakinta wanutsishqanta rikaykurraqmi Tayta Diosman yärakärirqan.
Tsaynöparaqmi lapan shonqunwan perdonta manakärirqan.
35 Tsaynöpis tantiyapäkurqan Tayta Dios qaqano tsapaqnin kashqanta.
Tsaynölami yarpapäkurqan poderniyuq Tayta Dios salvaqnin kashqanta.
36 Tsayno yarparpis paykunaqa Tayta Diosta lulaparqanmi.
37 Tayta Diosta cäsukärinanpaq promitirkurpis manami cäsukärirqantsu.
Tayta Dioswan pactu rurashqantapis manami cumplipäkurqantsu.
38 Tsayno kaptinpis paykunata Tayta Diosqa kuyaparqanmi.
Jutsa rurashqankunata perdonar manami ushakätsirqantsu.
Atska kuti pasaypa rabyarpis manami castigarqantsu.
Rabyashpanpis pacienciakurqanmi.
39 Runala kashqanta musyarmi kuyaparqan.
Wayrano pasaqla kaptinmi kuyaparqan.
40 Paykunaqa atska kutimi Tayta Diospa contran sharkapäkurqan.
Atska kutimi chunyaq jirkacho payta rabyanätsirqan.
41 Yaparir yaparirmi Tayta Diosta tentapäkurqan munashqanta kamaripänanpaq.
Tsaynöpami *santu Diosninta pasaypa rabyanätsirqan.
42 Tayta Dios munayniyuq kashqanta pasaypami qonqapäkurqan.
Contrankunapa makinpita salvashqantapis manami yarparqannatsu.
43 Tsaynöpis manami yarparqannatsu Egiptucho kaykaq Zoán particho mantsariypaq milagrukunata rurashqantapis.
44 Tsaychömi mayukunatapis yawarman tikratsirqan.
Tsaymi Egiptucho taq runakuna upuyta melanarqan.*
45 Upuqruykunatapis* y ratsakkunatapis* tsaytsikami paykuna tashqanman juntakätsirqan.
46 Chukluskunatami yuritsirqan chakracho mikuyta ushananpaq.
Lapan murushqankunatapis winaykämuqlatami chipyaq usharqan.*
47 Runtu tamyawanmi üvakunatapis ushakätsirqan.
Qasapawanmi hïguskunatapis chipyaq ushakätsirqan.
48 Runtu tamyawan y räyuwanmi wäkakunatapis y uyshakunatapis wanutsirqan.*
49 Tayta Diosmi rabyashpan Egipto runakunata tsayno castigarqan.
Wanutsikuq angilkunatami paykunaman kacharqan.
50 Mana kuyapaypami paykunata ushakätsirqan.
Mana perdonaypami wanutsirqan.
51 Tsaymi Egiptucho lapanpa qechpa olqu tsurinkunata ushakätsirqan.*
52 Tsaypitanami kuyashqan Israel runakunata uyshata mitsiq runano Egiptupita jorqamurqan.
Chunyaq jirkapami paykunata pushamurqan.*
53 Mana mantsakärinanpaqmi shumaq pushamurqan.
Contrankunatami itsanqa lamarcho shenqaypa ushakätsirqan.*
54 Tsaypitami kuyashqan runakunata promitishqan nacionman pushamurqan.*
Paykunata qoykunanpaqmi tsaycho taq runakunata kikin ushakätsirqan.
55 Kuyashqan runakunapa nawpanpitami tsay runakunata qarqurqan.*
Paykunapa chakrankunata y markankunatami Israel runakunatana aypurqan.
56 Tsayno yanapaykaptinpis poderniyuq Tayta Diosta tentar fiyupa rabyanätsirqan.*
Tayta Dios nishqankunatapis manami cäsukärirqantsu.
57 Unay aylunkunanömi paykunapis Diosta promitishqanta mana cumplirqantsu.
Flëcha wiksu kashqannömi paykunapis karqan.
58 Markakunacho *altarkunata rurarmi Tayta Diosta rabyanätsirqan
Ïdulukunata adorashpanmi rabyanätsirqan.
59 Tsayta rikarmi Tayta Dios fiyupa rabyakurkurqan.
Israel runakunata kacharirmi manana yanaparqannatsu.
60 Kay patsacho täkunan tolduntapis kachariykurqan.
Silo markacho kaykaq tolduncho mananami tarqannatsu.*
61 Contran runakuna apakunanpaqmi *Pactu Babulta kacharirqan.*
62 Kuyashqan runakunata espädawan wanutsinanpaqmi kacharirqan.
63 Nina rupar ushaqnöraqmi mözukunatapis guërracho wanutsir usharqan.
Tsaymi jipashkuna casarananpaq mözukunapis mana karqannatsu.
64 Cürakunatapis espädawanmi wanutsir usharqan.
Viüdankunapis wanutsipäkunanta mantsakurmi mana lüturqannatsu.
65 Tsaypitanami punukashqano kaykashqanpita tantiyakurir kuyashqan runakunata Tayta Dios yapay yanaparqan.
Vïnuta upyakurkur valorta tsariq runanömi 66 contrankunata vincir qatikacharqan.
Tsaynöpami tsay contrankuna imayyaqpis penqaycho kanqa.
67 Tayta Dios manami munarqannatsu Josépita miraq Efraín trïbu runakuna tashqan particho templun kananta.
68 Tsaypa trukanqa Judá trïbu runakuna tashqan partitanami akrarqan.
Tsaychömi kuyashqan *Sión jirkanta akrarqan templunta sharkatsipänanpaq.
69 Templunta sharkatsirmi jana patsayaq altu kananpaq sharkatsirqan.
Kay patsano mana ushakaq kananpaqmi sharkatsirqan.
70 Uysha mitsiqla kaykaptinmi sirviqnin Davidta akrarqan.
71 Jacobpita miraq kuyashqan Israel runakunata rikananpaqmi uyshata mitsir puriykaqta akrarqan.*
72 Tsaymi Davidqa lapan shonqunwan paykunata shumaq rikarqan.
Shumaq yarpachakuykurmi paykunata ali rikarqan.