Job

 2 “Kanan parlapaptï ama rabyakunkitsu.

Rabyakuptikipis manami upälakümantsu.

 3 Qamqa atska runakunatami shumaq yachatsishqanki.

Lakishqa kaykaq runatapis shakyätsishqankimi.

 4 Lutan ruraq runatapis alita rurananpaqmi tantiyatsishqanki.

Mantsariq runatapis mana mantsakunanpaqmi valuratsishqanki.

 5 Tsayno kaykarpis kikikita desgracia pasashuptikiqa juklami desanimädu rikakunki.

Kikiki nakarqa pasaypa turwatanki.

 6 Tayta Diosta *mantsakuq runa kaykarqa ¿manaku payman yärakunkiman?

7 “¡Shumaq tantiyakuy!

Jutsaynaq runaqa manami nakantsu.

Ali kawaq runataqa manami desgracia pasantsu.

 8 Fiyu runami itsanqa imaypis nakan.

Tsaytaqa kikïmi rikashqä.

 9 Fiyu runataqa Tayta Diosmi castigan.

Rabyashpan lapantami ushakätsin.

10 “Fiyu runataqa leonno kaptinpis Tayta Diosmi munayninta qechun.

11 Munayniynaq rikakurmi yarqanaypita león wanushqanno paykunapis wanun.

Maman wanuptin león malwakuna maytsaypapis aywakushqannömi fiyu runapaqa tsurinkunapis aywakärin.

12 “Shapshapyaylapa rinrïcho wilapämashqantami yanqala mayashqä.

13 Punukashqa kaykarmi sueñuynïcho wilapämashqanta mayashqä.

14 Fiyupa mantsakur siksikyaptïmi tulükunapis kawtsukayparaq siksikyashqa.

15 Wayra walwalyämuqta mayaptïmi aqtsäpis kashalikurkushqa.

16 Nawpächo jupay kaykaqta mayarmi lantuytanöla rikashqä.

Imapis mana kashqan hörami yachaylapa kayno parlaqta mayashqä:

17 ‘Tayta Diospaqqa ¿juklaylapis jutsaynaq runa kantsuraq?

Kamamaqnintsipaq ¿alilata ruraq runa kantsuraq?

18 *Angilninkunamanpis manami yärakuntsu.

Angilkunapis lutanta ruraykaptinqa 19 masraqchari runaqa lutanta ruran.

Runaqa alpalapita kamashqa karmi puyuno lapiriylapaq kaykan.

20 Elaqpita wanurmi imaypis mana kutimuq aywakun.

Wanuptinqa jutintapis qonqapäkunmi.

21 Kay patsacho ushakaqla karmi Dios munashqanno kawanantsipaq shumaq manaraq yachakur wanukuntsi’.