Bibliapita INTERNETCHO PUBLICACIUNNINCHICUNA

INTERNETCHO PUBLICACIUNNINCHICUNA

Quechua de Huánuco (Huallaga)

Job 25
Tayta Diospa wilakuynin (Las sagradas escrituras en el quechua de Margos-Yarowilca-Lauricocha Huánuco)

Job 25:2

*
mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).

Tayta Diosta mantsakunantsipaq yachakuntsi (Deut. 4.10; 14.23; 17.19; Sal. 34.11). Tayta Diosta mantsakuq runaqa yachaq y tantiyakuqmi kaykan (Job 28.28; Sal. 111.10; Prov. 1.7).

Mushuq Testamentuchöpis Tayta Diosta mantsakunantsipaq kashqanpitami parlan. Tsaychömi niykan payta mantsakuqkunata Tayta Dios kuyapashqanta (Luc. 1.50; Hech. 10.35) y Tayta Diosta mantsakur pay munashqanno kawashqantsita (2Cor. 7.1; 1Ped. 1.17; 2.17). Tsaynöpis niykan Tayta Diosta mantsakuqkuna premiuta chaskinanpaq kashqanta (Apoc. 11.18).

Itsanqa Jesucristuta chaskikur jutsata rurashqantsipita perdonashqana kaykantsi (Rom. 3.23-25; 1Juan 1.9). Tsaymi musyantsi Tayta Dios manana castigamänantsipaq kashqanta (1Juan 4.18) y payta mana mantsakuypa manakunantsipaq kashqanta (Rom. 8.15; Efe. 3.12).

Job 25:5

*
püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).

Unay Testamentuchömi atska leykuna kaykan Israel runakuna püru kananpaq. Wakin tsay leykuna kaykan jutsaynaq kawananpaq (Lev. 18.1–20.27) y wakinnami kaykan imata mana mikunanpaq (Lev. 11.1-47; Deut. 14.3-21) y imata mana yatananpaq (Lev. 5.2-3; 11.1-47; 15.1-33; 21.1-4). Tsaynölami mas leykunapis kaykan unay Israel runakuna püru kananpaq y impüru kashqanpita yapay püru kananpaq (Lev. 11.1–15.33).

Jesucristo shamushqanpitaqa manami tsay leykunata cumpliypatsu püru rikakuntsi (Rom. 3.31; 8.4), sinöqa Jesucristuman yärakurmi (Heb. 9.13-14; 1Juan 3.3). Tsayno püru rikakuntsi noqantsi rayku Jesucristo wanushqanpitami (Heb. 1.3; 9.13-14).

Tayta Diospa wilakuynin (Las sagradas escrituras en el quechua de Margos-Yarowilca-Lauricocha Huánuco)

Job 25:1-6

Job

Bildad yapay nishqan

25 Tsaypitanami Súa partipita shamuq Bildad kayno nirqan:

2 “Tayta Diosqa lapanpaq munayniyuq karmi *mantsakuypaq kaykan.

Jana patsachöpis lapantami munaynincho tsararan.

3 Paypa soldädunkunaqa yupaytapis mana atipaypaqmi kaykan.

Atskinpis lapanpaqmi atsikyan.

4 “Tayta Diospa nawpanchöqa manami pipis jutsaynaqqa kantsu.

Lapan runakunapis jutsayuqmi karkaykan.

5 Tayta Diospaqqa killapa atskinpis manami shumaqlaqa atsikyantsu.

Qoylarkunapis manami *pürutsu kaykan.

6 Tsayno kaykaptinqa peorraqchari runaqa kurunöla kar impüru kaykan”.