Isaías
Jerusalénman Diosta adoraq aywapäkunanpaq nishqan
2 Kaychömi qelqaraykan Amóspa tsurin Isaíasta Tayta Dios revelashqan. Tsay revelacionchömi rikatsirqan shamuq watakuna Judá nacionta y Jerusalén markata ima pasananpaq kashqantapis.
2 Shamuq watakunachömi TAYTA DIOSPA wayin kaykashqan jirkanqa wakin jirkankunapita mas respitashqa kanqapaq.
Tsaymanmi maytsay nacionpitapis runakuna aywapäkunqa Tayta Diosta adorapäkunanpaq.
3 Tsaynölami *Sión jirkanpita TAYTA DIOSPA yachatsikuyninta maytsaymanpis apapäkunqapaq.
Jerusalénpita patsami palabranta wilakärinqapaq.
Maytsay nacionpitami runakuna Jerusalénman aywaykur kayno nipäkunqapaq:
“Lapanintsi witsäshun TAYTA DIOS akrashqan jirkanman.
Jacobpita miraq runakuna yärakushqan TAYTA DIOSPA templunman yaykushun.
Tsaychömi kikin yachatsimäshun mandamientunkunata imano cumplinantsipaq kashqantapis.
Tsaynöpami pay munashqanno lapantsi kawashunpaq”.*
4 Atska nación runakuna chikinakäriptinpis TAYTA DIOSMI arreglanqapaq.
Tsay nacionkuna jatun kaptinpis paymi juzganqapaq.
Juk markawan juk marka guërrata manami ruranqanatsu.
Guërracho pelyananpaqpis manami kamarikunqanatsu.
Maytsaychöpis runakuna espädanpita rëjantanami ruratsipäkunqa.
Lanzanpitanami ösita ruratsipäkunqa.*
5 Jacobpita miraq runakuna, shapäkamuy.
TAYTA DIOS nimashqantsita cäsukur kawashun.
Mana cäsukuqkunata castigananpaq nishqan
6 Tayta Dios, kuyashqayki runakunami inti jeqamunan läducho taq runakunano rikakuq kayta yachakärishqa.
Tsaynöpis filisteo runakunanömi brüju kayta yachakärishqa.
Jäpa runakunawan amistäta rurarmi paykunano lutanta rurar kawarkaykan.
Tsayno kaptinmi Jacobpita miraq kuyashqayki runakunata kacharishqanki.
7 Judá nacioncho runakunapa qorin, qellaynin y imayka riquëzankunapis atskami kaykan.
Cawallunkunapis y guërra carrëtankunapis yupayta mana atipaypaqmi kaykan.*
8 Tsaynöpis maytsaychömi ïdulunkunata rurapäkushqa.
Kikinkuna rurashqan ïdulutami qonqurpaykur adorarkaykan.
9 Tsayno rurarmi penqaytukushqa uysurpaykan.
Paykunata ama perdonaytsu, Tayta.
10 ¡Qaqa uchkukunaman y alpa rurinman pakakäriy!
¡Mantsakuypaq, chipchipyaykaq y munayniyuq TAYTA DIOSPITA pakakäriy!*
11 Runa tukuqkunatapis penqaymanmi churanqa.
Yachaq tukuqkunatapis ruwakatsinqami.
Tsay junaqqa TAYTA DIOSLATAMI pïmaypis alabanqa.
12 Lapanta mandaq TAYTA DIOS castiganan junaqmi orgullösukunata, mana cäsukuqkunata y runa tukuqkunatapis qonqurpakatsinqa.
13 Líbanucho jatunkaray cedru yörakunatapis y Basáncho encina yörakunatapis Tayta Dios ushakätsinqami.
14 Altu jirkakunatapis jatun puytukshukunatapis ushakätsinqami.*
15 Pakakunanpaq ruratsishqan jatun törrikunatapis ushakätsinqami.
Marka tsaparaq murällakunatapis ushakätsinqami.
16 Tarsispita shamuq kuyaylapaq *büquikunatapis ushakätsinqami.
17 Tsaynöpami runa tukuqkunata penqakuyman churanqapaq.
Yachaq tukuqkunatapis ruwakatsinqami.
Tsay junaqqa TAYTA DIOSLATAMI pïmaypis alabanqa.
18 Tsay witsanqa runakuna adorashqan lapan ïdulukunatapis elqätsinqami.
19 Mantsakuypaq, chipchipyaykaq y munayniyuq TAYTA DIOSMI runakunata castigananpaq kay patsaman shamunqa.
Tsayta rikarmi pasaypa mantsakushpan machaykunaman y patsapa shiminkunaman pakakärinqa.
20 Tsay junaqqa qoripita y qellaypita rurashqan ïdulunkunata manana adorarmi ukushkuna y chikchikuna tänan uchkukunaman jitaykärinqa.
21 Nirkurmi pasaypa mantsakur qaqakunaman y machaykunamanpis pakakärinqa.
Tsayno pakakärinqa chipchipyaykar munayniyuq TAYTA DIOS castigananpaq shamuqta rikarmi.
22 Runakunamanqa amana yärakäriytsu.
Runakunaqa jämayno ushakaqlami kaykan.