Salmos

141 (1b) TAYTA DIOS, qamtami manakamü.

Yanapamänaykipaq jukla aywaykalämuy.

Ruwakamuptï jukla yanapaykalämay.

 2 Manakamushqäpis inciensuno nawpaykiman chaykalämutsun.

Makïta joqarkur ruwakamushqäpis tutapa rupatsishqan sacrificiuno kaykulätsun.*

 3 TAYTA DIOS, lutankunata mana rimanäpaq shimïta tsapaykulay.

Mana alikunata mana parlanäpaq imaypis yanapaykalämay.

 4 Lutankunata mana yarpachakunäpaq tantiyaykatsilämay.

Jutsa ruraqkunawan cumpinchi kanäta ama munaykulaytsu.

Paykunawan mikur upur juntakänätapis ama kachapaykalämaytsu.

 5 Ali runa corrigir astamaptinqa chaskikümi.

Anyapämashqantapis chaskikümi.

Jutsa ruraqkuna yätsimashqantami itsanqa mayaytapis mana munätsu.

Paykunata castigananpaqmi Tayta Diosta imaypis manakuykä.

 6 Cabecïllankunataqa desgraciami pasanqapaq.

Tsayraqmi tantiyakärinqa noqa wilapashqäkuna rasun kaq kashqanta.

 7 Yapyaptin kurpakuna mashtarashqannömi tulunkunapis panteoncho mashtaranqa.

 8 TAYTA DIOS, qamlamanmi yärakamü.

Ama kachaykalämaytsu.

 9 Fiyu runakuna trampata churapämashqanman mana tuninäpaq tsapaykalämay.

10 Trampata churapämashqanman kikinkuna jeqatsun.

Noqata itsanqa salvaykalämay.