Éxodo
Inciensuwan qoshtatsikuna altarta ruratsinanpaq tantiyatsishqan
30 “Inciensuwan qoshtatsinaykipaq *altarta ruratsinki acacia qerupita. 2 Tsay altarpa largunpis anchunpis chusku chunka pitsqa (45) centïmetrumi kanqa. Altunmi kanqa isqun chunka (90) centïmetru. Chuskun kuchunkunacho altarwan juk piëzala kananpaq waqratano ruratsinki. 3 Tsay altarta jananta, lädunkunata y waqrankunatapis qoriwan enchapatsinki. Tsaynöpis intëru kuchunpa rebëtinta qoripita rurarkur churatsinki. 4 Tsay rebëtin chakinpana cada esquïnanman tanatsinki qoripita rurashqa argöllakunata. Tsay argöllakunapami qerukunata pasatsinqa altarta wintupäkunanpaq. 5 Tsay qerukunata acacia qerupita rurarkatsir qoriwan enchapatsinki. 6 Tsaypitana tsay altarta churanki *Pactu Babulta tsaparaq cortïnapa jukaq lädunman. Tsay *babulpa tsapanan kaqchömi qamwan tinkushun.
7 “Cada tuta candelabruta kamarishqan hörami altarcho inciensuta Aarón rupatsinqa. 8 Tsaynölami cada tardi candelabruta ratatsishqan höra tsay altarcho yapay inciensuwan qoshtatsinqa. Aarón, tsurinkuna y paykunapita miraqkunapis noqapa nawpächo tsayno imaypis rurapäkunqa. 9 Tsay inciensuwan qoshtatsikuna altarchöqa ama jukniraq inciensuwan qoshtatsinkitsu.* Tsaynöpis tsaychöqa ama rupatsina sacrificiuta ni tsaki mikuy ofrendakunatapis rupatsinkitsu. Vïnutapis ama tsaymanqa winapankitsu.
10 “Purificatsina sacrificiuta rupatsishpan watacho juk kutilami uywapa yawarninta altarpa waqrankunaman Aarón lushinqa. Tsay altar sagrädu kaptinmi purificatsina sacrificiuta cada wata imayyaqpis tsayno rupatsinqa”.
Sagrädu Toldupa gastunkunapaq qellayta shuntashqan
11 Moiséstami TAYTA DIOS kayno nirqan: 12 “Israel runakunata censaptikiqa noqa TAYTA DIOSPAQ cada ünun ofrendata apamunqa. Tsaynöpami censakushqanpita qeshya mana ushanqatsu. 13 Lapan censashqa kaqkunami noqa TAYTA DIOSPAQ pulan siclo* qellayta apamunqa. Ofrendashqan qellaytami Tinkuna Tolducho kaykaq pësakunawan pësanqa. Tsay pësakunawan pësaptinmi juk siclo qellay chunka juk grämu kanqa. 14 Ishkay chunka (20) watayuqpita janaman censashqa kaqkuna lapanmi noqa TAYTA DIOSPAQ tsayno ofrendata apamunqa. 15 Mana ushakänanpaq ofrendata apamurqa rïcu karpis manami masta apamunmantsu ni pobri karpis mënusta apamunmantsu. Tsaypa trukanqa lapanpis iwal-lami pulan siclo qellayta apamunqa. 16 Tsay qellayta Israel runakunapita chaskirqa churanki Tinkunantsi Toldupa gastunkunapaq. Tsaynöpami censakärishqaykipita mana ushakätsishaykitsu”.
Broncipita lavatoriuta ruratsinanpaq tantiyatsishqan
17 Mastapis Moisésta TAYTA DIOS kayno nirqan: 18 “Maylakärinanpaq lavatoriutapis jamakunantinta broncipita ruratsinki.* Tsay lavatoriuta Tinkunantsi Toldupita *altarman aywana chawpinman jamaykatsir yakuta winatsinki. 19 Tsay lavatoriucho kaykaq yakuwanmi Aarón y tsurinkuna makinkunata y chakinkunata maylakunqa. 20 Tinkunantsi Tolduman manaraq yaykurmi tsayno maylakunqa mana wanunanpaq. Tsaynöpis maylakunqa altarcho NOQAPAQ sacrificiuta manaraq rupatsirmi. 21 Makinta chakinta mana maylakurqa wanunqapaqmi. Tsay nishqäkunaqa imayyaqpis leymi kanqa Aarónpaq, tsurinkunapaq y paypita miraqkunapaqpis”.
Sagrädu aceitita ruratsinanpaq tantiyatsishqan
22 Mastapis Moisésta TAYTA DIOS kayno nirqan: 23 “Shuntanki soqta kïlu mïrra yörapa weqinta, kimsa kïlu canëlata, kimsa kïlu ali asyaq* cäñata 24 y soqta kïlu casia yörapa qarantapis. Tsaykunata pësanki Tinkunantsi *Sagrädu Tolducho kaykaq pësakunawan. Nirkur kimsa litru pulanta olïvupita rurashqa aceitita kamarikunki. 25 Tsay shuntashqaykita lapanta takutsinki perfümita ruraqkuna takutsishqanno. Tsayqa kanqa *sagrädu aceitimi. 26 Tsay aceitita winapanki Tinkunantsi Tolduta y *Pactu Babulta. 27 Tsaynöpis winapanki mësata manëjuntinta, candelabruta manëjuntinta y inciensuwan qoshtatsikuna *altarta. 28 Tsaynöpis winapanki sacrificiuta rupatsina manëjuntinta y lavatoriutapis jamakunantinta. 29 Tsayno winapaptiki lapanpis sagrädunami kanqa. Tsaykunata töpaq kaqkunapis sagrädumi rikakunqa.
30 “Sirvimaq cürakuna kananpaq tsay aceitita Aarónpa y tsurinkunapa jananmanpis winapanki. 31 Israel runakunata kayno ninki: ‘Kay sagrädu aceitita imaypis rurapäkunki imamanpis winapaptin sagräduna kananpaq. 32 Pitapis lutalaqa tsay aceitita ama winapankitsu. Lutala manijakunaykipaqqa tsay sagrädu aceititano ama rurankitsu. 33 Pitapis tsay aceititano ruraq kaqtaqa o lutala winapaq kaqtaqa Israel runakunapita qarqupäkunki’ ”.
Inciensuta ruratsinanpaq tantiyatsishqan
34 TAYTA DIOS yapay Moisésta kayno nirqan: “Shuntanki estacte yörapa weqinta, lamarcho kaq qewshuta, gálbano jachapa weqinta y inciensu yörapa weqinta. Tsaykuna kanqa lapanpis tsay tupula. 35 Tsay lapan shuntashqaykiwan ali asyaq inciensuta ruranki. Perfümi ruraq takutsishqanno lapanta shumaq takutsinki. Tsaymanqa imatapis mastaqa ama takutsinkitsu. Tsay inciensu *sagrädumi kanqa. 36 Pulanta shumaq ñutqu aqarkur Tinkunantsi Tolduman apaykur churanki *Pactu Babulpa nawpanman. Tsay inciensuqa sagrädumi kanqa. 37 Tsay inciensutanöqa pipis ama ruranqatsu. Sagrädu kar NOQALAPAQMI kanqa. 38 Tsay inciensutano ruraq kaqtaqa pitapis Israel runakunapita qarqupäkunki”.