Hebreos
Tayta Dios promitishqan jamayman yaykunantsipaq kashqan
4 Unay Israel runakunata jamayman yaykatsinanpaq promitishqannölami noqantsitapis Tayta Dios niykämantsi jamayman yaykatsimänantsipaq kashqanta.* Tsayno promitiykämaptintsiqa cuidädu payta mana cäsukur tsay jamayman mana yaykushwantsu.
2 Unay Israel runakuna Tayta Diospa wilakuyninta musyashqannömi noqantsipis musyaykantsi. Tsay runakunaqa musyaykarpis mana criyishqanpitami Tayta Dios promitishqan jamayman mana yaykurqantsu. 3 Noqantsimi itsanqa payman criyir promitimashqantsi jamayman yaykushun. Mana criyiq kaqkunapaqmi Tayta Dios kayno nirqan: “Rabyarmi kayno nir jurarqä: ‘Paykunaqa promitishqä jamayman manami yaykupäkunqatsu’ ”.*
Mana criyiqkuna Tayta Dios promitishqan jamayman mana yaykuptinpis kay patsata kamashqanpita patsami tsay jamayman yaykunantsipaq kamarishqa kaykan. 4 Kamarishqa kaykashqanta musyantsi qanchis kaq junaqpita palabrancho kayno niptinmi: “Lapanta kamarkurmi qanchis kaq junaqcho Tayta Dios jamarqan”.*
5 Mastapis kaynömi niykan: “Paykunaqa promitishqä jamayman manami yaykupäkunqatsu”.*
6 Tsay nishqannölami unay Israel runakuna Tayta Diospa wilakuyninta chaskikushqa kaykarpis mana cäsukärishpan tsay jamayman mana yaykapäkurqantsu. Tsayno kaptinpis tsay jamay kaykanraqmi yaykunantsipaq. 7 Tsay jamayman yaykunantsipaqmi Tayta Dios tantiyatsiptin David kayno nir qelqarqan: “Tayta Dios nishqanta kanan junaq mayaykarqa chukru shonqu ama kapäkuytsu”.*
8 Israel runakunata *Canaánman pusharpis Josuéqa manami paykunata jamayman yaykatsirqantsu.* Yaykatsishqa kaptinqa Tayta Dios manami yapayqa rimakunmantsu karqan. 9 Tsaymi Tayta Diosman yärakuq runakunapaqqa kaykanraq jamayman yaykupäkunanpaq. 10 Kay patsata kamayta usharkur Tayta Dios jamashqannömi noqantsipis tsay jamayman yaykur lapan nakashqantsikunapita jamashun. 11 Tsayno kaykaptinqa shumaq yarpachakushun Tayta Dios kamarishqan jamayman yaykunantsipaq. Israel runakunano mana cäsukuq karqa noqantsipis manami yaykushunpaqtsu.
12 Tayta Diospa palabran kawaq karmi munayniyuq kaykan. Ishkan waqtanpa ali afilashqa espädapitapis mas mikuq karmi* shonquntsimanpis, yarpaynintsimanpis y toqshuntsimanpis chayan imano kashqantsitapis tantiyatsimänantsipaq. 13 Lapan kamashqankunata rikaptinmi Tayta Diospita pakakuyta mana kamäpakuntsitsu. Imata ruraptintsipis payqa rikaykämantsimi. Imano kawashqantsiman tupumi payta cuentata qoshun.
Mandaq cüra Jesucristo kashqan
14 Tayta Diospa Tsurin Jesucristo gloriacho mandaq cüra kaykaptinqa qepaman mana kutikuypa imaypis payman yärakushun. 15 Kay patsacho kaptinmi mandaq cürantsi Jesucristuta noqantsitano *Satanás tukuynöpa tentarqan. Tsayno tentaptinpis manami jutsata rurarqantsu. Tsaymi noqantsitapis Satanás tentamaptintsi Jesucristo kuyapämashpantsi yanapamantsi. 16 Imaypis yanapamänantsipaq kaykaptinqa kuyapäkuq Tayta Diosta mana mantsakuypa manakushun. Payta manakurqa trönuncho paywan parlaykaqnömi kaykantsi. Tayta Diosta manakuptintsiqa ima nakaycho kaptintsipis paymi kuyapämashpantsi yanapamäshun.