Isaías
Israel runakuna salvashqa kananpaq wilakushqan
61 TAYTA DIOS akrarkamarmi Espïritunta noqaman kachamushqa.
Paymi kachamashqa waktsakunata ali wilakuyninta wilanäpaq,
lakishqa kawaqkunata shakyätsinäpaq,
juk lädu nacionman prësu apashqankuna librina kashqanta wilanäpaq
y carcilcho wichqaraykaqkunatapis yarqamunanpaq kashqanta wilanäpaq.*
2 Tsaynöpis TAYTA DIOS kachamashqa pay salvananpaq kaq tiempu chayamushqanta wilakunäpaq,*
contrantsikunata jutsata rurashqanman tupu castigananpaq kashqanta wilakunäpaq
y waqaqkunatapis shoqanäpaq.*
3 *Sióncho lakishqa kaqkunata shumaq tantiyatsirmi shakyätsishaq.
Tsaymi umanman uchpata winakunanpa trukan corönatana jatikärinqa,
lütuta jatikunanpa trukan aceitiwan lushikärinqa
y lakishqa kananpa trukan kushishqana cantapäkunqa.
Tsayno kaptinmi TAYTA DIOS plantashqan kuyaylapaq encina yörano kashqanta nipäkunqa.
Tsaynöpami TAYTA DIOSTA pïmaypis alabanqa.
4 Unay juchutsishqan raqäkunatapis altsapäkunqami.
Markakuna pasaypa ushakashqa kaptinpis yapaymi sharkatsipäkunqa.
5 Kuyashqä runakuna, uywaykikunatapis jäpa runakunami mitsipäshunkipaq.
Chakraykikunata y üva plantaykikunatapis paykunami arupäshunkipaq.
6 Qamkunataqa TAYTA DIOSPA cürankuna kashqaykitami nipäkushunkipaq.
Tayta Diosnintsita sirviq kashqaykitami parlapäkunqa.
Juk lädu nación runakunapa riquëzankunawanmi quëdapäkunkipaq.
Pasaypa chanin cuestaq adornunkunata jatikurmi kushikärinkipaq.
7 Nawpata penqayman y manakaqman churarkushushpaykipis respitapäkushushpayki favornikinami parlapäkunqa.
Atska riquëzata chaskirmi nacionnikicho imayyaqpis kushishqa kawapäkunkipaq.
8 TAYTA DIOSMI kayno nin:
“Alita rurar kawaq runata kuyämi.
Suwakuqkunata y mana ali ruraqkunatami itsanqa chikï.
Tsaymi ali kawapäkunaykipaq yanapashayki.
Qamkunawanmi *pactuta rurashaq imayyaqpis yanapanäpaq.
9 Qamkunapita miraqkunaqa maytsay nacionchöpis y markakunachöpis reqishqami kanqa.
Qamkunata yanapashqätami pïmaypis tantiyakunqa”.
10 TAYTA DIOSNÏ yanapamaptinmi kushikuypita shonqüpis atsikyarkun.
Paymi salvación röpata jatipämashqa.
Kuyaylapaq röpänömi ali ruraykunapis kaykan.
Casarananpaq alinnin röpata jatikuq mözunömi kaykä.
Casaraq jipash kuyaylapaq röpan jatishqa kaykaqnömi kaykä.*
11 Maytsay nacionchöpis alilatana rurar payta alabananpaqmi TAYTA DIOS kamakätsinqa.
Qewata winatsimushqanno y huertacho plantata tsintsitsimushqannömi salvacionta chätsimunqa.