Proverbios
Fiestaman qayatsiq warmiman tantiyakuyta tinkutsishqan
9 Tantiyakuyshi wayinta ali sharkatsirqan.
Kamaränanpaqshi qanchis tushakunata laqlaykur jawirqan.
2 Nirkurnashi uywakunata pishtarkur ali alilata yanukurqan.
Tsaynöshi ali vïnuta rurarkur mikuytapis mësaman sirvirqan.
3 Sirvirkurnashi ashmayninkunata kacharqan marka janaqanman aywaykur qayakunanpaq.
4 Qayakurshi kayno nirqan: “¡Mana tantiyakuq mözukuna y jipashkuna!
¡Fiestaman shapäkamuy!”
Mana yarpachakuqkunatapis kayno nirshi qayakurqan:
5 “Yanukushqä mikuyta mikunaykipaq y rurashqä vïnuta upunaykipaq fiestaman shapäkamuy.
6 Mana ali ruraykunata kachapäkuy.
Kacharirqa alimi kawankipaq.
Tantiyakuq runano shumaq kawapäkuy”.
Tantiyakuq y mana tantiyakuq runa imano kashqanpis
7 Urkus* runaqa corrigiptikipis ashlishunkimi.
Lutanta ruraykashqanta niptikipis olqüpäshunkimi.
8 Awilan ashmashqa runaqa anyapaptikipis chikishunkimi.
Tantiyakuq runami itsanqa anyapaptikipis kuyashunki.
9 Tantiyakuq runaqa tantiyatsiptiki masmi tantiyakunqa.
Ali runaqa yachatsiptiki masmi yachakunqa.
10 Tantiyakuq kaytaqa qalaykunki TAYTA DIOSTA *mantsakurmi.
*Santu Tayta Diosta *reqiqkunaqa mas yachaqmi kaykan.*
11 Yachaq karqa atska watami kawankipaq.
12 Tantiyakuq karqa mas tantiyakuqmi rikakunkipaq.
Awilan ashmashqa karqa mana ali rikashqami kankipaq.
Mana tantiyakuq kayta juiciuynaq warmiman tinkutsishqan
13 Mana tantiyakuq kayqa tulu shimi*, juiciuynaq y toqshun tsakishqa warminömi kaykan.
14 Wayi punkunman karpis o marka janaqanman karpis jamakun 15 tsaypa pasaq ali kawaqkunata inkitar kayno ninanpaq:
16 “¡Mana tantiyakuq mözukuna y jipashkuna!
¡Kayman shapäkamuy!”
Tsaynölami mana yarpachakuqkunatapis kayno nir qayan:
17 “Suwakuy yakuqa masmi mishkin.
Mikuypis pakaylapa mikuptintsiqa maypis mikuypaqmi kaykan”.
18 Tsayno nishqanta chaskipaqkunaqa manami musyapäkuntsu wanunanpaq kashqanta.