Salmos

102 (2) TAYTA DIOS, manakamushqäta mayaykalämay.

Qayakamushqäta chaskiykulay.

 2 (3) Lakikushqä höra noqapita ama *pakakuykulaytsu.

Ruwakaykämuptï chaskiykalämay.

Manakamushqäta jukla mayaykalämay.

 3 (4) Qoshtay elqashqannömi vïdäpis ushakaykan.

Ninanöraqmi tulükunapis rupapaykan.

 4 (5) Qewa qawshur ushakashqannömi shonqüpis ushakaykan.

Mikunäpaq gänasnïpis manami kannatsu.

 5 (6) Lakikuylawanmi tulükunapis yupariylapaqna kaykan.

 6 (7) Chunyaq jirkacho tukunömi kaykä.

Raqäkunacho chushiqnömi kaykä.

 7 (8) Manami punuytapis tarïtsu.

Wayi janancho waktsa pichiwchankanömi kaykä.

 8 (9) Mana jamaypami contrapartïkuna achäquita ashipaykäman.

Imay hörapis jutïta joqarirmi maldicionaman.

 9 (10) Mikunäpa trukanqa uchpa janalanchömi jamaraykä.

Yakutapis weqïtawan talushqatami upuykä.

10 (11) Tsayno kaykä rabyar castigamaptikimi.

Joqarkamarmi saqtariykamashqanki.

11 (12) Lantuy pasashqannömi vïdä ushakaykan.

Qewa tsakishqannömi pasaypa tsakiykäna.*

12 (13) TAYTA DIOS, qammi imayyaqpis rey kaykanki.

Qamtaqa imayyaqpis yarparäshunkimi.

13 (14) *Siónta kuyashpayki favornin sharkuykulay.

Kuyapar perdonanaykipaq kaq höra chayamushqanami.

14 (15) Sirvishuqnikikunaqa tsaycho kaq rumikunatapis kuyanmi.

Raqälana kaykaqta rikarmi fiyupa lakikärin.

15 (16) Siónta kuyapaptikimi maytsay nacioncho taq runakunapis respitashunkipaq.

Kay patsacho lapan reykunami munayniyuq kashqaykita tantiyapäkunqapaq.

16 (17) Tsayno tantiyapäkunqa Siónta yapay sharkatsiptikimi.

Tsayta rikarmi pïmaypis musyanqa munayniyuq kashqaykita.

17 (18) Waktsakuna manakamushqanta mayankipaqmi.

Manakamushuptiki cäsunkipaqmi.

18 (19) Qepa yuriqkunapis TAYTA DIOSTA alabapäkunanpaq pay rurashqankunata qelqashun.

19 (20) TAYTA DIOSMI jana patsacho kaykaq *sagrädu wayinpita kay patsata rikamurqan

20 (21) waqaykaq prësukunata mayar yanapananpaq

y wanunanpaq kaq runakunata wanuypita salvananpaq.

21 (22) Tsaymi Sióncho TAYTA DIOSPA jutinta joqarir adorapäkunqa.

Alita ruraq kashqanpitami Jerusaléncho alabapäkunqa.

22 (23) Tsaychömi lapan nación runakuna TAYTA DIOSTA adorananpaq juntakanqa.

23 (24) Tayta Diosmi kalpätapis ushakätsishqa.

Walka watalana kawanäpaqmi kamakätsishqa.

24 (25) Tsaymi manakur kayno nirqä:

“Tayta Dios, manaraqpis awkinyaptïqa amaraq shuntakamaytsu.

Qamqa mana ushakaypami kawaykanki.

25 (26) Kamashqayki hörami kay patsatapis shumaq takyatsishqanki.

Jana patsatapis makikiwanmi kamashqanki.

26 (27) Lapan kamashqayki ushakaptinpis qamqa imaypis kaykankimi.

Röpa makwayar ushakashqannömi lapanpis ushakanqa.

Röpata trukatsiqnölami trukaratsinkipaq.

Trukarkatsirnaqa manami cäsupankipaqnatsu.

27 (28) Lapan ushakaptinpis qamqa imaypis kashqalanmi kaykanki.

Qamqa manami imaypis awkinyankitsu.*

28 (29) Sirvishuqnikikunapita miraqkunataqa imaypis yanapankipaqmi.

Paykunaqa nawpaykichömi imaypis kawapäkunqa”.