Salmos
Fiyu runa ali tukushqan
(1-2) Cantaqkunapa mandaqninpaqmi. Doeg jutiyuq edomita runa Saúl kaqman aywaykur Ahimelecpa wayincho David kashqanta wilarkuptinmi kay salmuta David qelqarqan.*
52 (3) Munayniyuq kashpayki ¿imanirtaq mana alita rurashqaykipita runa tukunki?
Tayta Diosqa imaypis kuyakuqmi.
2 (4) Qamqa mana alita ruranaykipaqmi yarpachakuykanki.
Runa mayikita lutala tumpashqaykimi puñalno kaykan.
3 (5) Alita ruranaykipa trukanqa lutankunatami ruraykanki.
Rasun kaqta rimanaykipa trukanqa lulakuylapaqmi wanuykanki. Selah
4 (6) Pitapis manakaqman churarmi imaypis lulakuykanki.
5 (7) Tsayno kashqaykipitami wayikipita Tayta Dios qarqushunkipaq.
Wanutsishushpaykimi chipyaq ushakätsishunkipaq. Selah
6 (8) Tayta Diosta cäsukuqkunaqa tsayta rikar mantsakunqami.
Asiparmi kayno nipäkunqa:
7 (9) “Tsay runata Tayta Dios castigashqanta maski rikapäkuy.
Payqa Tayta Diosman yärakunanpa trukan rïcu kashqanmanmi atiënikurqan.
Jutsa ruraytapis manami kacharirqantsu”.
8 (10) Noqaqa rämasapa olïvu yöranömi Tayta Diospa wayincho kaykä.
Kuyakuq Tayta Diosmanmi imayyaqpis yärakü.
9 (11) Tayta Dios, alilata ruraq kashqaykipitami imaypis agradëcikushayki.
Qamman yärakamuqkunapa nawpanchömi imaypis alabashayki.