1 Corintios
Jesucristo cruzcho wanushqanta Pablo wilakushqan
2 Wawqi panikuna, qamkuna kaqman shamur manami yachaq runakuna parlashqannötsu ni paykuna yarpashqannötsu Tayta Diospa wilakuyninta yachatsirqä. 2 Tsayno yachatsinäpa trukanqa Jesucristo noqantsi rayku cruzcho wanushqalantami yachatsirqä.
3 Qamkunaman chayamur mana tantiyatsinäpaq kashqanta yarparmi fiyupa lakikurqä. 4 Yachaq runakuna parlashqanno y yarpashqanno yachatsinäpa trukanqa Espíritu Santupa munayninwanmi yachatsirqä. 5 Tayta Diospa munayninwan yachatsiptï manami runakuna yachaq kashqanmantsu yärakurkaykanki, sinöqa Tayta Diosmanmi.
Tayta Dios yarpashqankunata Espíritu Santu tantiyatsishqan
6 Yachaq runakuna yarpashqanno mana yachatsirpis Tayta Diospa wilakuyninta shumaq tantiyakurmi payman yärakuqkunata yachatsï. Tayta Diospa wilakuyninqa manami yachaq runakuna ni munayniyuq runakuna yarpashqannötsu kaykan. Tsay runakunaqa ushakaqlami kaykan. 7 Diospa yachayninta yachatsishqäqa runakuna mana musyashqanmi kaykan. Tsay yachaynintami imapis manaraq kaptin Tayta Dios churarqan gloriacho kushishqa kawanantsipaq. 8 Kay patsacho mandaqkunaqa manami mayqanpis tsayta tantiyapäkurqantsu. Tantiyarqa manami munayniyuq Señor Jesucristuta cruzcho wanutsinmantsu karqan. 9 Mana tantiyapäkushqantami Tayta Diospa palabranchöpis kayno qelqaraykan:
“Pipis mana rikashqanta
ni mana mayashqanta
ni mana yarpashqantami
kuyaqninkunapaq Tayta Dios kamarishqa”.*
10 Tsay kamarishqantaqa Espíritu Santuwanmi Tayta Dios musyatsimashqantsi. Espíritu Santu lapanta musyarmi Tayta Dios yarpashqankunatapis musyan. 11 Runa imata yarpashqanta shonqun musyashqannömi Espíritu Santupis Tayta Dios imata yarpashqantapis musyaykan. 12 Noqantsiqa manami kay mundupa espïrituntatsu chaskishqantsi*, sinöqa Tayta Dios kachamushqan Espíritu Santutami. Tsaynöpami musyantsi Tayta Dios salvamashqantsita.
13 Qamkunataqa manami runakunapita yachakushqätatsu wilapaykä, sinöqa Espíritu Santu tantiyatsimashqantami. Tsaymi Espíritu Santuta chaskikärishqa kaptiki paypa yarpayninkunata tantiyaykätsï. 14 Espíritu Santuta mana chaskikuqkunaqa paypa yarpayninkunata manami chaskikärintsu. Paykunapaqqa upa yarpaymi kaykan. Espíritu Santu mana tantiyatsiptinmi tantiyayta mana kamäpakärintsu. 15 Espíritu Santuta chaskikuqkunami itsanqa yachatsishqankuna ali kashqanta tantiyar chaskikärin. Imanir chaskikärishqantapis wakin runakunaqa manami tantiyapäkuntsu. 16 Tayta Diospa palabranchöpis kaynömi qelqaraykan:*
“Tayta Dios yarpashqankunata ¿pilaqa musyantsuraq?
Yachaq kananpaq ¿pilaqa payta yachatsintsuraq?”*
Noqantsipa yarpaynintsimi itsanqa Jesucristupa yarpayninno kaykan.