Job
37 “Tayta Dios munayniyuq kashqanta tantiyakuptïmi shonqüpis fiyupa kurun kurunyan.
2 ¡Tayta Dios rimamushqanta mayapäkuy!
Pay rimamushqanqa räyunöraqmi mayakämun.
3 Paymi jana patsata elquywan atsikyätsin.
Tsayno atsikyaptinmi intëru kay patsapis rikakan.
4 Jana patsapitami pasaypa mantsariypaq bunrurümun.
Tsayno bunrurümuptin elquypis manami chawantsu.
5 Tayta Dios tsayno bunrurütsimuptin imata ruraykashqantapis mana tantiyarmi pasaypa mantsakuntsi.
6 “Paymi rajutapis kay patsaman rajutsimun y tamyatapis fiyupa tamyatsimun.
7 Tsayno tamyatsimuptinmi lantukunanpaq wayinkunaman qeshpikärin.
Tsaynöpami Tayta Dios lapanpaq munayniyuq kashqanta tantiyakärin.
8 Uywakunapis machaykunamanmi lantukuq aywapäkun.
9 Sur lädupitami löcu wayrata wayrätsimun.
Norti lädupitanami qasätsimun.
10 Pükaptinmi tsururupis rurakan.
Tsaynölami lamar yakupis tintikan.
11 “Tayta Diosmi kamakätsin yakuta pukutay joqarinanpaq.
Tsaynölami pukutaypita räyutapis pashtatsimun.
12 Pukutaytaqa munashqanpami maypapis puritsin.
Intëru kay patsachömi pay mandashqanta ruran.
13 Kay patsaman tamyatsimurmi bendicionninta churamun.
Aläpa tamyatsimurqa castiganmi.
14 “Job, mantsariypaq kaqkunata Tayta Dios rurashqanta shumaq tantiyakuy.
15 ¿Qam musyankiku imanöpa lapan tsaykunata rurashqanta?
¿Musyankiku elquyta imanöpa atsikyätsimushqanta?
16 ¿Musyankiku pukutayta imanöpa espantaypaq puritsishqanta?
Tsaykunata rikarmi tantiyantsi Tayta Dios yachaq kashqanta.
17 “¿Musyankiku sur kaq lädupita wayrätsimuptin imanir aläpa shanätsikushqaykita?
18 ¿Tayta Diosta yanapankimantsuraq jana patsapita chinyaypa shanätsimunanpaq?
19 “Noqakunaqa tsakäpakushqano karmi musyapäkütsu Tayta Dios juzgamaptin imata ninäpaqpis.
Yachaq karqa mä tantiyatsimay.
20 Noqaqa paywan parlayta mantsakümi.
Parlar imarqa wanukushaqchari.
21 “Pukutay tsaparaptinqa intipis manami rikakantsu.
Pukutay kicharkuptinmi itsanqa ciëlupis atsikyarkun.
22 Norti kaq lädupami rancha pukutayno atsikyay rikakämun.
Tsayqa kaykan Tayta Dios munayninwan shamushqanmi.
23 Payqa pasaypa munayniyuq karmi imaypis alilata ruran.
Manami pitapis lutalaqa nakatsintsu.
Rurashqanta manami tantiyayta atipantsitsu.
24 Lapanpaq munayniyuq kashqanta tantiyarmi runakuna *mantsakun.
Yachaq tukuq runakunataqa manami imaypis cäsupantsu”.