Nehemías
Jerusalénman Nehemías aywananpaq rey Artajerjes awnishqan
2 Ishkay chunka (20) watana Artajerjes rey kaykaptin Nisán killacho payta vïnuta sirviykarqä. Sirviykaptïmi rey tantiyarqan lakishqa kaykashqäta. 2 Tsaymi tapumarqan kayno nir: “¿Imanirtaq lakishqa kaykanki? Manami qeshyaykaqnötsu kaykanki. Tsayno kanaykipaq imalapis pasaykäshunkimi”.
Tsayno nimaptinmi fiyupa mantsakarqä. 3 Nirkurmi reyta kayno nirqä: “¡Tayta rey, imayyaqpis kawaykulay! Unay aylükuna tashqan marka pasaypa raqälanami kaykan. Punkunkunapis pasaypa rupashqami kaykan. Tsayno kaykaptinqa ¿imanirtaq mana lakikümantsu, tayta?”
4 Tsawraqa rey kayno nimarqan: “¿Imano yanapanätataq munaykanki?”
Tsayno nimaptinmi jana patsacho kaykaq Tayta Dios yanapamänanpaq shonqulächo jinan höra manakurir 5 kayno nirqä: “Tayta rey, qamta ruwakü Judáman kachamänaykipaq. Awnimaptikiqa unay aylükuna tashqan marka juchushqa kaykaqta altsatsinäpaqmi aywashaq”.
6 Ruwakushqä hörami reypa nawpancho reina jamaraykarqan. Tsayno ruwakuptïmi rey kayno nir tapumarqan: “¿Imayyaqtaq tsaycho qoyämunki? ¿Imaytaq kutimunki?”
Imay kutimunäpaq kashqanta wilaptïmi Judáman aywanäpaq awnimarqan. 7 Tsawraqa mastapis ruwakurqä kayno nir: “Mana rabyakuylapa Éufrates mayu wak tsimpancho kaykaq gobernadorkunapaq cartata rurapaykalämay. Tsaynöpami Judáman chayanäyaq pipis tsapata mana churapämanqatsu. 8 Tsaynöpis muntikita täpaq Asafpaq cartata rurapaykalämay qeruta kamaripämänanpaq. Tsay qeruta nistashaq templu punkukunata ruratsinäpaq, marka murälla punkukunata ruratsinäpaq y tänäpaq kaq wayita ruratsinäpaq”.
Tsayno manakuptïmi kuyapäkuq Tayta Dios yanapamarqan rey awnimänanpaq.
9 Susapita yarquptïnami yanaqämänanpaq rey kachamurqan cawallu muntashqa soldädukunata y capitanninkunata. Éufrates mayu wak tsimpancho kaykaq gobernadorkunaman chayaykurmi rey apatsimashqan cartakunata entregarqä.
10 Israel runakunata yanapanäpaq Jerusalénman chayashqäta musyaykurmi horonita aylu Sambalat y amonita aylu autoridä Tobíaspis fiyupa rabyakärirqan. 11 Jerusalénman chayashqäpita kimsa junaqtanami 12 juk ishkay runakunawan tsakaypa rikapakuq yarqurqä. Pitapis manami wilaparqätsu Jerusaléncho imata ruranäpaq Tayta Dios yarpayta qomashqanta. Rikapakuq aywar noqalami cawallü muntashqa aywarqä.
13 Tsay tsakaylami Raqra jutiyuq punkupa yarqur Dragón jutiyuq pözu kaq lädupa tumarqä. Nirkurnami Muka Jitakuna jutiyuq punku kaqman chayarqä. Tsaypa purirmi rikarqä Jerusalénpa murällan juchushqa kaykaqta y punkunkunapis rupashqa kaykaqta. 14 Tsaypitanami pasarqä Pukyu jutiyuq punku kaq lädupa y Rey Armakunan Pözu kaq lädupa. Tsaypitaqa cawallü pasananpaq näni manami karqannatsu. 15 Tsaymi raqralanpa witsar perqa murälla imano kaykashqantapis rikapakurqä. Patsa manaraq waraptin rikapakuyta usharkurmi Raqra jutiyuq punkupa kutirqä.
16 Tsaycho kaykaq autoridäkunaqa manami musyarqantsu rikapakur puriykashqäta. Tsayyaqqa manaraqmi wilaparqäraqtsu Israel runakunata, cürakunata, mayor runakunata, autoridäkunata ni murällata altsananpaq kaqkunatapis. 17 Tsaypitanami paykunata kayno nirqä: “Qamkuna musyapäkunkimi Jerusalén raqälana kaykashqanta y punkunkunapis pasaypa rupashqa kaykashqanta. Jerusalén murällata yapay sharkatsishun. Sharkatsiptintsiqa manami pipis asipaykämäshunpaqnatsu”.
18 Tsaychömi paykunata wilaparqä Tayta Dios kuyapämar yanapamashqanta y rey imata nimashqantapis. Tsayno wilaptïmi nipäkamarqan jukla yapay sharkatsipäkunäpaq. Tsawraqa lapanï shakyätsinakurqä arupäkunäpaq.
19 Tsayta musyaykurmi horonita aylu Sanbalat, amonita aylu autoridä Tobías y Arabiapita kaq Gesem noqakunata asipämar kayno nipäkamarqan: “¿Ima ruraytataq yarparkaykanki? ¿Reypa contran sharkuytaku yarparkaykanki?”
20 Tsawraqa kayno nirqä: “Jana patsacho kaykaq Tayta Diosmi noqakunata yanapamanqa marka murällata altsatsinäpaq. Paypa sirviqnin karmi murällata altsatsiyta qalaykärishaq. Jerusalén murällata altsapäkushqäman manami jatikämunkimantsu”.