Jueces
Madianita runakunata Gedeón vincishqan
7 Tsaypitanami Jerobaal nipäkushqan Gedeón y paywan kaykaq runakuna tutala yarqur Harod pukyukuna nawpancho campamentunta sharkatsipäkurqan. Madianita runakunapa campamentunnami Israel runakunapita norti kaq lädupa kaykarqan. Tsayqa More jirka sikin pampachömi kaykarqan.
2 Tsaychömi Gedeónta TAYTA DIOS kayno nirqan: “Aläpa atska runakunawanmi aywarkaykanki. Madianita runakunata vincipäkunaykipaq yanapaptï yarpapäkunkiman atskaq kar vincipäkushqaykita. Tsayno yarparqa alabakurmi rabyanätsipäkamanki. 3 Tsayno mana kananpaq kanan ninki mantsakuq kaqkuna wayinkunaman kutikunanpaq”.*
Kutikärinanpaq Gedeón niptinmi ishkay chunka ishkay waranqa (22,000) runakuna kutikurqan. Chunka waranqalanami (10,000) Gedeónwan quëdarqan.
4 Tsaypita yapaymi Gedeónta TAYTA DIOS kayno nirqan: “Kananpis atskaraqmi runakuna karkaykan. Kananqa paykunapita akranaykipaq yakuta upunanpaq pushapäkuy. Tsaychömi musyatsishayki mayqankuna guërraman aywananpaq kashqanta y mayqankuna wayinpa kutikunanpaq kashqantapis”.
5 Tsaymi Gedeónqa runakunata pusharqan yaku kaqman. Tsaychöna Tayta Dios kayno nirqan: “Makinwan chaqarkur alquno laqwaypa upuqkunata juk läduman akranki. Tsaynöpis qonqurpaykur upuqkunata juk läduman akranki”.
6 Yakuta makinwan chaqarkur laqwaypa upuqkuna karqan kimsa pachak (300) runakunami. Wakin kaqqa qonqurpaykurmi upupäkurqan.
7 Tsawraqa Gedeónta TAYTA DIOS kayno nirqan: “Tsay kimsa pachak (300) runakunalawan madianita runakunata vincinaykipaqmi yanapashayki. Wakin kaq runakunaqa wayinpa kutikäritsun”.
8 Tsawraqa tsay runakunata Gedeón nirqan *cornëtankunata y mirkapanta kachaykur wayinman kutikärinanpaq. Kutikuptinmi akrashqan kimsa pachak runakunalawanna quëdarqan. Madianita runakunapa campamentunqa ura pampachömi kaykarqan.
9 Tsay tsakaymi Gedeónta Tayta Dios kayno nirqan: “Jukla aywaykur madianita runakunata atacapäkuy. Qamkunapa makikimannami paykunata churamushqä. 10 Atacayta mantsakurqa ashmayniki Furalawan puntata campamentunman rikapakuq ayway. 11 Chayaykur paykuna imata parlashqantapis shumaq mayamuy. Parlashqanta mayarmi musyanki mana mantsakuypa paykunawan pelyanaykipaq”.
Tayta Dios tsayno niptinmi contran runakunapa campamentun kuchunman ashmaynin Furawan Gedeón aywarqan. 12 Campamentunchömi madianita runakuna, amalecita runakuna y inti jeqamunan kaq lädupita shamuq wakin runakunapis pitishnöraq tsaytsika juntarpaykarqan. Tsaynölami *camëllunkunapis yupayta mana atipaypaq tsaytsika kaykarqan. 13 Tsayman chayaykur mayaparaykashqanchömi Gedeón mayarqan juk soldädu sueñuyninta wilapar kayno nishqanta: “Sueñuynïchömi rikashqä cebäda tanta janapita kuchpamur tolduntsita juchutsishqanta”.
14 Tsayno wilapaptinmi yanaqin kayno nirqan: “Tsayqa kanqa Joáspa tsurin Gedeónpa espädanmi. Madianita runakunata y lapan campamentuntami Gedeónpa makinman Tayta Dios churanqa”.
15 Sueñushqanta wilashqanta mayarmi Gedeónqa Tayta Diosta agradëcikurqan. Nirkurna Israel runakuna kaykashqan campamentuman kutiykur kayno nirqan: “¡Sharkapäkuy! ¡TAYTA DIOSMI madianita runakunata makintsiman churamushqa!”
16 Tsaymi kimsa pachak (300) soldädunkunata kimsa puntaman rakiykur cornëtakunata y puyñukunata aypurqan. Puyñukuna rurinman aceitiwan ushmashqa rupaykaq träpukunata winarkur 17 soldädunkunata kayno nirqan: “Madianita runakunapa campamentun kuchunman tumariq churakanki. Campamentu jukaq kuchunman noqa chayaykur rurashqäno qamkunapis rurapäkunki. 18 Tsaycho cornëtata tukapäkamuptï qamkunapis madianita runakunapa campamentunkunata jirurupaykur tukapäkamunki. Nirkur lapan kalpaykiwan kayno nipäkamunki: ‘¡TAYTA DIOSPA espädanwan y Gedeónpa espädanwan contrantsikunata atacashun!’ ”
19 Tsayno yätsirkurmi ishkay punta runakunata Gedeón puntata kacharqan. Paykunapa qepantanami pachak (100) runakunawan Gedeón aywar pulan paqas chayapäkurqan madianita soldädukunapa campamentun kuchunman. Tsay hörami täpaq soldädukuna trukanakuykarqan. Campamentuman chayaykurmi cornëtata tukapäkurqan y apashqan puyñukunata pakipäkurqan. 20 Tsaymi wakin kaq runakunapis cornëtata tukashpan puyñunkunata pakipäkurqan. Itsuq kaq makinwan atskita aptararqan y alawqa kaq makinwanna cornëtata tukarqan. Tsay hörami fuertipa kayno nipäkurqan: “¡TAYTA DIOSPA espädanwan y Gedeónpa espädanwan contrantsikunata atacashun!”
21 Tsayno nirmi Israel runakunaqa maypapis mana yarquypa madianita runakunapa campamentun chuchunman tumariq churanakushqalancho ichirpaykarqan. Tsawraqa madianita runakunaqa qaparashpan qeshpiyta munar wakpa kaypa cörrikacharqan. 22 Cornëtakunata kimsa pachak (300) Israel runakuna tukaykaptinmi madianita runakunata TAYTA DIOS pantakätsirqan kikinpura espädawan wanutsinakunanpaq. Wakin kaq madianita soldädukunanami Zereraman aywaq nänikunapa qeshpir Bet-sita lädupa aywakärirqan. Wakinkunaqa chayapäkurqan hasta Tabatpa nawpan Abel-meholapa lindërunyaqmi.
23 Madianita soldädukuna qeshpir aywakäriptinmi Neftalí trïbu runakuna, Aser trïbu runakuna y Manasés trïbu runakuna juntakaykur qatikacharqan. 24 Tsaynöpis Efraín jalqakunaman Gedeón wilakatsirmi kayno nirqan: “Qamkunapis shapäkamuy madianita runakunata atacanaykipaq. Bet-bara väduta y Jordán mayu väduta manaraq pasaptin yalipaykur atacapäkuy”.
Tsayno niptinmi Efraín trïbu runakuna lapan juntakaykur Bet-bara väduman y Jordán mayu väduman atacananpaq aywapäkurqan.
25 Tsayman chayaykurmi madianita runakunapa mandaqnin Orebta y mandaqnin Zeebta prësu tsariykurqan. Orebtami qaqacho wanutsipäkurqan y Zeebtanami üva jarukunan pözu kaqcho wanutsipäkurqan. Tsaypita patsami Orebta wanutsishqan qaqapa jutin kaykan Oreb Qaqa y Zeebta wanutsishqan pözupa jutin kaykan Zeeb Pözu. Madianita runakunata karuyaq qatiparkurmi Efraín trïbu runakuna Jordán tsimpanman kutiykur Orebpa y Zeebpa umanta Gedeónman apapäkurqan.