Bibliapita INTERNETCHO PUBLICACIUNNINCHICUNA

INTERNETCHO PUBLICACIUNNINCHICUNA

Quechua de Huánuco (Huallaga)

Salmos 112
Tayta Diospa wilakuynin (Las sagradas escrituras en el quechua de Margos-Yarowilca-Lauricocha Huánuco)

Salmos 112:1

*
mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).

Tayta Diosta mantsakunantsipaq yachakuntsi (Deut. 4.10; 14.23; 17.19; Sal. 34.11). Tayta Diosta mantsakuq runaqa yachaq y tantiyakuqmi kaykan (Job 28.28; Sal. 111.10; Prov. 1.7).

Mushuq Testamentuchöpis Tayta Diosta mantsakunantsipaq kashqanpitami parlan. Tsaychömi niykan payta mantsakuqkunata Tayta Dios kuyapashqanta (Luc. 1.50; Hech. 10.35) y Tayta Diosta mantsakur pay munashqanno kawashqantsita (2Cor. 7.1; 1Ped. 1.17; 2.17). Tsaynöpis niykan Tayta Diosta mantsakuqkuna premiuta chaskinanpaq kashqanta (Apoc. 11.18).

Itsanqa Jesucristuta chaskikur jutsata rurashqantsipita perdonashqana kaykantsi (Rom. 3.23-25; 1Juan 1.9). Tsaymi musyantsi Tayta Dios manana castigamänantsipaq kashqanta (1Juan 4.18) y payta mana mantsakuypa manakunantsipaq kashqanta (Rom. 8.15; Efe. 3.12).

Tayta Diospa wilakuynin (Las sagradas escrituras en el quechua de Margos-Yarowilca-Lauricocha Huánuco)

Salmos 112:1-10

Salmos

Ali runa imano kawashqan

112 ¡Aleluya!

Kushishqami kawan Tayta Diosta *mantsakuq runaqa.

Tsay runaqa Diospa mandamientunkunata cumplirmi kushikun.

2 Paypita miraqkunami Israel nacioncho munayniyuq kanqapaq.

Paykunaqa bendiciontami chaskinqapaq.

3 Wayincho imaykankunapis putsuy putsuymi kanqapaq.

Paykunaqa pïmaypaqpis ali shonqumi kanqapaq.

4 Wakin runakuna tsakäpakushqano kaykaptinpis ali runaqa atskichönömi kaykan.

Payqa ali shonqumi, kuyapäkuqmi y alilata ruraqmi kaykan.

5 Pipis manakuptin ali runaqa juklami makyaykun.

Ima ruraykunatapis shumaq yarpachakuykurmi ruran.

6 Manami imaypis lutanta rurantsu.

Paytaqa pïmaypis yarparkunmi.

7 Mana ali noticiata mayarpis manami mantsakuntsu.

Ima kaptinpis TAYTA DIOSLAMANMI yärakun.

8 Imaypis jawkalami kawan.

Manami imatapis mantsakuntsu.

Contrankuna ushakashqantapis rikanmi.

9 Waktsakunata imaypis yanapanmi.

Alilatami imaypis ruran.

Pïmaypis paytaqa respitanmi.

10 Tsayta rikarmi fiyu runaqa payta chikin.

Rabyashpan kiruntapis uchunraqmi.

Lutanta rurananpaq yarpachakushqankunaqa manami kamakanqatsu.